Rueda afirma que as axudas pioneiras de ata 12.000 € anuais da Xunta para enfermos de ELA son “de xustiza” e anima ao Goberno central e a outras CC.AA. a aplicalas

Santiago de Compostela, 28 de xaneiro de 2023 O presidente da Xunta, Alfonso Rueda, afirma que as axudas pioneiras de ata 12.000 euros anuais da Xunta para enfermos de esclerose lateral amiotrófica (ELA) son “de xustiza” e anima ao Goberno central e a outras comunidades autónomas a aplicalas. O mandatario galego afirmouno nunha entrevista por videoconferencia que lle fixo Jordi Sabaté, diagnosticado de ELA que conta cunha canle en YouTube para acadar fondos en apoio desta doenza, e na que Rueda estivo acompañado pola conselleira de Política Social e Xuventude, Fabiola García.

Na conversa con Jordi Sabaté -catalán de 39 anos diagnosticado hai 8 de ELA-, Alfonso Rueda subliñou que as achegas aprobadas no Consello da Xunta o 27 de outubro do 2022 entrarán en vigor proximamente con carácter retroactivo desde xaneiro, e que están pensadas para que os enfermos fagan fronte aos elevados gastos que lles supoñen os tratamentos e a adaptación á súa incapacidade física. De feito, permitirán afrontar custes de alimentación, coidados, rehabilitación, compra de material sanitario e accesibilidade dos fogares.

As axudas aprobadas pola Xunta serán dun máximo de 12.000 euros anuais por paciente. Con ese fin, o Goberno galego conta cunha partida orzamentaria de 3,2 millóns de euros para este ano. En Galicia hai máis de 250 persoas con ELA e cada ano diagnostícanse 30 novos casos.

O presidente da Xunta recoñeceu que a medida adoptada en Galicia -primeira comunidade autónoma en poñer a disposición das persoas con ELA unha axuda directa e inmediata- ten como obxectivo “botar unha man” para paliar as necesidades dos afectados. Se ben é consciente de que esas necesidades son moitas, Alfonso Rueda díxolle a Jordi Sabaté que “este é só o principio” e que a intención do Goberno galego era “abrir unha pequena brecha pola que animo a entrar ao resto das Administracións”. Así, alentou a outras comunidades autónomas a facer o mesmo porque “é de xustiza”; de feito, asegurou que desde algunhas xa pediran información desta novidosa medida galega. “Oxalá tomen exemplo”, desexou.

Alfonso Rueda pediu tamén un compromiso maior do Goberno central, xa que o Congreso aprobou o ano pasado a Lei ELA para que se investigue sobre a enfermidade pero, de momento, a norma está paralizada e non entrou en vigor.

No encontro tamén houbo tempo para anécdotas e conversas de tipo persoal. Jordi Sabaté ten raíces galegas por parte materna e quixo aproveitar a entrevista para render homenaxe á súa avoa María. Interesouse, ademais, pola xuventude do presidente da Xunta, polos seus estudos e pola súa vocación política, así como polas súas afeccións, entre as que Rueda destacou a bicicleta, a moto, o Camiño de Santiago, as viaxes en xeral, o escaso tempo que ten para desfrutar da familia, e as conversas cos amigos.

Sabaté recoñeceu que se emocionara cando soubo das axudas aprobadas polo Goberno galego e deulle as grazas “de todo corazón” por un xesto “tan humano e bondadoso”. O entrevistador despediuse en galego: “Es moi boa persoa”, díxolle ao presidente da Xunta, e Rueda amosouse “orgulloso e agradecido” por poder botar unha man nesta causa.

Outras medidas do Goberno galego

As axudas directas postas en marcha desde a Consellería de Política Social non son as únicas iniciativas desenvolvidas polo Goberno galego en apoio aos diagnosticados de ELA. No ano 2018, Galicia foi pioneira tamén na creación do Proceso asistencial integrado de esclerose lateral amiotrófica, que estableceu vías rápidas sanitarias para axilizar o diagnóstico e para que as axudas de dependencia se tramiten, como máximo, no prazo dun mes.

A entrevista está dispoñible na canle de YouTube de Jordi Sabaté (https://youtu.be/xJ2m8gFO2SQ).