O V Plan director da cooperación galega 2023-2026 da Xunta recibe o informe favorable do Consello Galego de Cooperación para o Desenvolvemento
O órgano asesor no que están representados a Administración autonómica e o resto dos axentes de cooperación apoiou o novo plan
O V Plan director da cooperación galega segue a apostar polo aliñamento coa Axenda 2030 de desenvolvemento sostible das Nacións Unidas e polo reforzo da identidade singular, as vantaxes comparativas e o valor engadido da cooperación galega
O director xeral de Relacións Exteriores e coa Unión Europea, Jesús Gamallo, presidiu esta mañá a reunión plenaria do Consello Galego de Cooperación para o Desenvolvemento na que se presentou o anteproxecto do V Plan director de cooperación galega para o desenvolvemento 2023-2026. O documento estratéxico que rexerá a política de cooperación da Xunta de Galicia nos próximos 4 anos foi informado favorablemente no encontro de hoxe.
O director xeral sinalou que este V Plan director da cooperación galega terá un carácter máis estratéxico e buscará a posta en valor dos aspectos cualitativos da cooperación, afondará na concentración xeográfica da axuda galega, que xa se iniciou cos catro plans anteriores, e apostará por unha orientación estratéxica das actuacións de cooperación que reforce as singularidades e vantaxes comparativas da comunidade galega, poñendo énfase na especialización en determinados sectores nos que Galicia dispón de demostrada experiencia.
