A Xunta destinará 11 M€ ao complemento autonómico do Bono Social Térmico para axudar a 74.400 fogares nas facturas da enerxía

“Trátase dun acordo importante para seguir garantindo a protección dos cidadáns máis vulnerables e que máis precisan a axuda da Administración”, defende o mandatario galego sobre este complemento para facer fronte ao aumento do prezo da enerxía no consumo para calefacción, cociña e auga quente

As familias non teñen que facer ningún trámite e recibirán o ingreso nas súas contas de maneira automática

Santiago de Compostela, 27 de abril de 2023

O presidente do Goberno galego, Alfonso Rueda, salientou o visto e prace dado hoxe polo Consello da Xunta ao pagamento do bono social térmico e do complemento autonómico de 150 euros que axudará a 74.400 fogares galegos —44.000 deles considerados vulnerables severos— co pagamento das facturas da enerxía para calefacción, cociña e auga quente. Deste xeito, o Executivo autonómico destina 11,2 millóns de euros a este complemento.

“Trátase dun acordo importante para seguir garantindo a protección dos cidadáns máis vulnerables e que máis precisan a axuda da Administración”, argumentou o mandatario galego para defender este complemento que, segundo concretou, oscilará entre un mínimo de 412 euros e un máximo de 947 euros, en función da situación económica da familia e da zona climática de Galicia onde resida.

Rueda explicou que os fogares que sexan destinatarios desta axuda, que son os mesmos que teñen descontos na súa factura co bono social eléctrico do Goberno central, non teñen que facer ningún trámite e recibirán o ingreso na súa conta de xeito automático. Nos vindeiros días recibirán na súa casa unha carta que lles informará da contía que se lles transferirá e da conta bancaria en que se fará o ingreso.

Unha vez confirmados os datos por parte do beneficiario, considérase que se comecen a realizar os pagamentos progresivamente a mediados do vindeiro mes de maio. Con este complemento, a Xunta de Galicia axuda aos fogares a aliviar parte da carga que supón o incremento dos gastos enerxéticos.

Imaxes relacionadas

Benestar

Departamento:

A Presidencia da Xunta; C. de Política Social e Igualdade

Data de actualización: 27/04/2023

Novas relacionadas

A Xunta publicará o xoves 23 de maio a orde para a creación de 20 novas casas do maior no rural galego

A Xunta inviste 380.000 € na construción da nova escola infantil de Ordes que contará con 61 prazas

Fabiola García reitera o compromiso da Xunta de Galicia coas persoas maiores nun encontro en Lousame