O delegado territorial participou na presentación do Festival Mundial de Ilusionismo que este domingo arranca nunha praza pontevedresa

Pontevedra, 7 de setembro de 2023

O delegado territorial da Xunta en Pontevedra, Agustín Reguera, participou esta mañá na presentación do Festival Mundial de Ilusionismo – Galicia Ilusiona, un evento que traerá a Galicia a algúns dos mellores ilusionistas do mundo e que a Xunta patrocina para que todos poidan gozar dos seus espectáculos.

O acto de presentación tivo lugar na sede de Afundación Abanca de Pontevedra, onde os directores do Festival, Pedro Burgarín e Dani Polo expuxeron a programación deste ano que arrancará este domingo cunha actuación pública na Praza de Ourense de Pontevedra.

Así, o Festival dividirase entre os grandes espectáculos nas principais cidades galegas e os shows gratuítos e abertos ao público que son posibles grazas ao apoio da Xunta de Galicia. No caso de Pontevedra, este espectáculo chegará nunha caravana que baixo o título “Maxia Itinerante” ofrecerá actuacións de balde de vinte minutos para audiencias moi reducidas.

Durante a súa intervención, o delegado territorial quixo destacar a vertente social desta iniciativa, que o ano pasado acadou máis de 50.000 espectadores, e que nesta edición ten planeada unha actuación na planta de pediatría do Hospital Montecelo para que todos os nenos e nenas poidan gozar dunha xornada máxica. Ademais, amosou o total apoio da Xunta, que “está decidida a seguir patrocinando e apoiando en todo o posible esta iniciativa que xa destaca polo seu éxito e que esperamos que en non moito tempo se converta nun referente internacional no mundo do ilusionismo”.

As entradas para o gran espectáculo que terá lugar en Pontevedra o día 14 de outubro están practicamente esgotadas. O Festival conta con dez artistas que forman parte da elite de mellores ilusionistas do mundo, un deles galego.