A Xunta saca a concurso preto de 227.000 metros cadrados de solo empresarial propiedade do Instituto Galego da Vivenda e Solo
O Diario Oficial de Galicia publica hoxe o anuncio para a venda de 84 parcelas en 17 parques empresariais que se suman ao concurso publicado por Xestur Galicia o pasado 13 de febreiro con 251 parcelas en 20 parques e preto de 518.000 metros cadrados
O Executivo galego pon así a disposición das empresas preto de 745.000 metros cadrados de solo empresarial con bonificacións do 50 ou 30 % do seu prezo
Santiago de Compostela, 26 de febreiro de 2024
A Xunta de Galicia saca a concurso preto de 227.000 metros cadrados de solo empresarial propiedade do Instituto Galego da Vivenda e Solo (IGVS) poñéndoos a disposición das empresas interesadas. O concurso materialízase no anuncio publicado hoxe polo Diario Oficial de Galicia (DOG) para a adxudicación de solo empresarial distribuído en 84 parcelas de 17 parques empresariais.
A meirande parte dos parques teñen unha bonificación do 50 % -aplicable a todos os parques das provincias de Lugo e Ourense e aos emprazados en Ferrolterra- e o valor total do solo incluído no concurso, a prezo bonificado, rolda os 10 millóns de euros.
O Executivo galego pon así a disposición das empresas preto de 745.000 metros cadrados de solo empresarial pois a estas parcelas propiedade do IGVS engádense os arredor de 518.000 metros cadrados -repartidos en 251 parcelas de 20 parques- do concurso publicado por Xestur Galicia o pasado 13 de febreiro.
As parcelas propiedade do IGVS adxudicaranse en réxime de compravenda e os adxudicatarios estarán obrigados a construír as súas instalacións e obter a licenza de actividade no prazo máximo de tres anos desde a formalización da compravenda en escritura pública. O prazo das empresas para presentar ofertas polas distintas parcelas estará aberto ata o 27 de marzo.
Concurso de Xestur
O procedemento aberto pola empresa pública Xestur para a adxudicación de 251 parcelas repartidas en 20 parques empresariais -cunha superficie de preto de 518.000 metros cadrados- prevé bonificacións do 50 ou 30 % sobre o seu prezo orixinal, dependendo do emprazamento dos mesmos.
Neste caso, o prazo que teñen as empresas para a presentación de ofertas remata o 12 de marzo. As bases do concurso de Xestur e a relación de parcelas ofertadas poden consultarse na web da sociedade.
CONCURSO DE ADXUDICACIÓN DE SOLO PROPIEDADE DO IGVS 2024 | |||
PARQUE | NÚMERO PARCELAS | SUPERFICIE m2 | PREZO BONIFICADO mínimo e máximo €/m² |
As Somozas | 3 | 50.000 | 8,90 – 10,56 |
Curtis | 3 | 25.317,59 | 37,20 |
Melide 1ª fase | 2 | 4.680 | 35,62 |
Pontedeume | 1 | 1.139 | 20,40 |
Culleredo (Alvedro) | 1 | 4.700 | 6,00 |
Bóveda 2ª fase | 2 | 836 | 10,82 |
Lourenzá 2ª fase | 6 | 8.080,88 | 21,37 – 22,33 |
Porto Seco de Monforte 1ª fase | 12 | 36.211 | 25,50 - 36 |
Monterroso | 23 | 39.403 | 17,20 - 18 |
Quiroga f. D | 3 | 1.950 | 20,50 |
Taboada 1ª fase | 5 | 5.400 | 33 |
Xermade 2ª fase | 8 | 6.977 | 10,13 – 12,75 |
Barco de Valdeorras 2-3ª fase | 9 | 28.567 | 28 |
Carballiño 2ª fase | 1 | 2.158 | 31,29 |
Celanova 1ª fase | 1 | 3.274 | 14,63 |
Ribadavia Pol 2 | 1 | 1.880,32 | 30,40 |
Pazos fase 2.1 | 3 | 6.355,25 | 31,50 – 34 |
TOTAL | 84 | 226.929,04 | |
Imaxes relacionadas
