Nos derradeiros anos vénse detectando un importante aumento de actividades de reparación de vehículos automóbiles en talleres clandestinos, que non están legalmente habilitados, tal e como se establece no Decreto 70/2011, do 7 de abril, polo que se regulan a actividade industrial e a prestación de servizos nos talleres de reparación de vehículos automóbiles e dos seus equipamentos e compoñentes.
As actuacións destes talleres clandestinos poñen en perigo a seguridade viaria e o ambiente, e supoñen ademais unha competencia desleal respecto dos talleres debidamente habilitados, que cumpren con todas as obrigas que establece o marco normativo e garanten que as reparacións son feitas por profesionais que contan cos medios técnicos adecuados para iso.
A Dirección Xeral de Enerxía e Minas é competente na dirección e seguimento de todas as actuacións relativas á inspección técnica de vehículos, así como na prestación de servizos nos talleres de reparación de vehículos automóbiles.
Polo dito, e para contribuír á loita contra a clandestinidade nas actividades de reparación de vehículos automóbiles, dítase a presente
Instrución
1. Os titulares dos vehículos automóbiles que sexan declarados desfavorables ao realizar a inspección nunha estación ITV por defectos graves ou moi graves en elementos esenciais de seguridade ou de control ambiental incluídos nos capítulos 5 (emisións contaminantes), 6 (freos), 7 (dirección), 8 (eixes, rodas, pneumáticos e suspensión) e 9 (motor e transmisión) do Manual de procedemento de inspección das estacións ITV, deberán presentar, cando acudan de novo á estación ITV para nova inspección, o certificado de reparación emitido polo taller.
2. A estación ITV solicitará o dito certificado, comprobará que o taller que o emite é un taller habilitado como taller de reparación de vehículos automóbiles e anotará no informe de inspección: «acredítase ter efectuado as reparacións en taller habilitado».
3. No caso de que non se facilite o certificado de reparación á estación ITV, ou que esta comprobe que o taller que o emite non consta como habilitado, farase constar no informe de ITV: «non se acredita ter efectuado as reparacións en taller habilitado», o cal non suporá impedimento para que a inspección sexa declarada favorable.
4. Os talleres de reparación de vehículos automóbiles deberán entregar aos seus clientes, cando estes os informen de que queren efectuar reparacións das recollidas no punto 1 da presente instrución e lles presenten o informe da estación ITV, un certificado de reparación segundo o modelo que se recolle como anexo.
5. No caso de que se presente á estación ITV un certificado de reparación emitido por un taller que non consta como taller habilitado de reparación de vehículos automóbiles, a estación ITV remitirá o dito certificado á xefatura territorial da Consellería de Economía, Emprego e Industria da provincia correspondente á localización do taller, para a adopción das medidas sancionadoras que correspondan.
6. A Dirección Xeral de Enerxía e Minas manterá unha consulta telemática para que as estacións ITV e o público en xeral poidan consultar en tempo real se un taller determinado está habilitado como taller de reparación de vehículos automóbiles. Así mesmo, poderase descargar o modelo de certificado de reparación da páxina web da Consellería de Economía, Emprego e Industria.
Santiago de Compostela, 23 de xaneiro de 2017
Ángel Bernardo Tahoces
Director xeral de Enerxía e Minas