En virtude da Orde do 27 de setembro de 1995 delegáronse nos delegados provinciais desta consellería determinadas atribucións en materia de urbanismo, coa finalidade de conseguir unha xestión máis áxil e eficaz, en beneficio tanto dos intereses xerais como dos administrados, acorde cos principios de economía, celeridade e eficacia que deben presidi-la actuación administrativa.

Unha parte das atribucións obxecto de delegación correspondían a competencias reguladas no texto refundido da Lei sobre réxime do solo e ordenación urbana aprobado polo Real decreto lexislativo 1/1992, sendo boa parte destes preceptos recentemente declarados inconstitucionais por sentencia do Tribunal Constitucional do 20 de marzo pasado.

O novo marco legal vixente está consituído pola Lei 1/1997, do 24 de marzo, do solo de Galicia, que nos seus preceptos regula os órganos e competencias en materia de urbanismo. No seu artigo 189.3º, prevese que os órganos urbanísticos da Xunta de Galicia poidan delega-lo exercicio das súas competencias urbanísticas nos termos previstos nos artigos 43 e 44 da Lei 1/1983.

Na súa virtude, e no uso das facultades conferidas polo artigo 43.3º da Lei 1/1983, do 22 de febreiro, reguladora da Xunta e o seu presidente,

DISPOÑO:

Artigo 1º

Deléganse nos delegados provinciais da Consellería de Política Territorial, Obras Públicas e Vivenda as seguintes competencias atribuídas na Lei 1/1997, do 24 de marzo, do solo de Galicia:

1. Emisión de informes sobre plans parciais e plans especiais, previstos nos artigos 41.3º e 42.5º da lei.

2. Actuación por subrogación nos procedementos de aprobación de instrumentos de xestión urbanística, nos supostos e cos requisitos que determinan os artigos 102 e concordantes da lei.

3. Aprobación definitiva de expropiacións forzosas polo procedemento de taxación conxunta, en virtude do disposto no artigo 145.6º da lei.

4. Outorgamento de autorizacións previas á licencia municipal, para as construccións e instalacións de interese xeral no solo rústico e para edificacións en núcleos rurais preexistentes, en virtude do dis

posto no artigo 77.4º e disposición adicional terceira da lei.

5. Inspección urbanística e adopción das medidas dirixidas á protección da legalidade urbanística nos supostos sinalados no artigo 180 da lei.

6. Rexistro de entidades urbanísticas colaboradoras.

Artigo 2º

Os actos dictados por delegación farán constar expresamente esta circunstancia e consideraranse como propios do órgano delegante que, en calquera momento, poderá revoga-la delegación outorgada.

Artigo 3º

O órgano delegante poderá, en calquera momento, avocar para si o coñecemento dun asunto determinado, de conformidade co disposto no artigo 14 da Lei 30/1992, do 26 de novembro.

Disposición derrogatoria

Queda derrogada a Orde do 27 de setembro de 1995 e cantas se opoñan ó establecido na presente orde.

Disposición derradeira

A presente orde entrará en vigor o día seguinte ó da súa publicación no Diario Oficial de Galicia.

Santiago de Compostela, 19 de agosto de 1997.

José Cuíña Crespo

Conselleiro de Política Territorial, Obras Públicas e Vivenda

97-6324