A irrupción de Internet como ferramenta de comunicación nos últimos anos e o continuo incremento na súa utilización por parte da Administración da Comunidade Autónoma de Galicia fai necesaria a introducción dunha normativa que regule a utilización desta nova canle por parte da Administración galega e do persoal ó seu servicio.

Esta regulación ten que ter en conta que Internet constitúe unha nova alternativa para achega-la Administración ó cidadán e incrementa-los servicios que presta, pero, ó mesmo tempo, que é unha posible vía para a incorrecta utilización dos datos subministrados polos cidadáns á Administración, que debe protexerse do acceso e uso indebido.

Así mesmo, a utilización de Internet como ferramenta para o traballo diario dentro da Administración debe ser regulada, para que a utilización deste novo recurso sirva para mellora-lo funcionamento interno e o servicio prestado ós cidadáns.

Para iso, establécese a Rede Corporativa da Xunta de Galicia, como único medio de acceso a Internet para os servicios que se encontren integrados naquela, co fin de garanti-la seguridade, confidencialidade e continuidade da información e dos servicios virtuais que se establezan. Con isto, proponse unha plataforma única de acceso que poida ser máis facilmente protexible e sirva tamén de correa de transmisión dos novos avances tecnolóxicos que poidan incorporarse con carácter corporativo.

Por último, cómpre regula-lo papel da Administración da Comunidade Autónoma de Galicia como difusora e impulsora desta nova tecnoloxía no ámbito territorial da súa competencia.

Na súa virtude, por proposta do conselleiro da Presidencia e Administración Pública e logo de deliberación do Consello da Xunta de Galicia na súa reunión do día cinco de febreiro de mil novecentos noventa e nove,

DISPOÑO:

CAPÍTULO I

Disposición xerais

Artigo 1º.

A presente norma ten por obxecto regula-la utilización da rede Internet pola Administración da Comunidade Autónoma de Galicia, no exercicio das súas competencias e no desenvolvemento das súas actividades tanto no ámbito interno dela como nas súas relacións cos cidadáns.

Artigo 2º.

1. Para os efectos da presente norma, enténdese por Rede Corporativa da Xunta de Galicia o conxunto

dos recursos e sistemas que serven de plataforma para a comunicación electrónica entre os distintos servicios da Administración autonómica e entre estes e o exterior, así como os que, dando servicio a terceiros, forman parte da mesma arquitectura de telecomunicacións, comparten sistemas de seguridade comúns ou se encadran baixo a mesma autoridade de xestión.

2. Correspóndelle á Consellería da Presidencia e Administración Pública a planificación e xestión da Rede Corporativa da Xunta de Galicia.

CAPÍTULO II

Da utilización da rede Internet como canle de información e comunicación co cidadán

Artigo 3º.

A Xunta de Galicia porá á disposición dos cidadáns a información necesaria sobre o funcionamento dos seus servicios e o desenvolvemento das súas actividades, na medida en que o permitan os recursos dispoñibles.

Con carácter xeral, a información subministrada será de acceso libre e gratuíto, sen prexuízo das limitacións que se establezan nas leis específicas que regulen o tratamento da información ou a esixencia das correspondentes taxas e prezos.

Artigo 4º.

Correspóndelle a cada consellería da Administración autonómica:

a) A fixación e mantemento actualizado da información correspondente ás súas competencias que vaia ser subministrada a través da rede Internet.

b) A atención e resposta ás solicitudes de información dos cidadáns a través da rede Internet.

Artigo 5º.

Correspóndelle á Consellería da Presidencia e Administración Pública:

a) A proposta á Comisión de Informática:

-Dos principios que deben rexe-la coordinación xeral da publicación de todo tipo de información a través de Internet.

-Das normas xerais de estilo, de presentación do contido, de imaxe corporativa da Xunta de Galicia en relación con Internet.

-As normas de carácter técnico, en relación con Internet, que afecten á Rede Corporativa da Xunta de Galicia.

b) A publicación e a difusión de información xeral sobre estructura organizativa e funcional, procedementos administrativos, estado dos expedientes e calquera información relacionada coa Administración da Comunidade Autónoma de Galicia no seu conxunto.

c) A publicación e a difusión do Diario Oficial de Galicia a través de Internet.

Artigo 6º.

A Xunta de Galicia fomentará a utilización da rede Internet como medio de comunicación oficial cos cidadáns e outras administracións públicas e para estes efectos regulará esta utilización e establecerá as condicións técnicas necesarias para garanti-la identidade,

autenticidade, integridade, confidencialidade, recepción polo interesado e conservación do contido da comunicación.

Artigo 7º.

Correspóndelle á Consellería da Presidencia e Administración Pública o establecemento das infraestructuras e sistemas necesarios para a incorporación destas condicións técnicas á Rede Corporativa da Xunta de Galicia.

Capítulo III

Da utilización de Internet polo persoal ó servicio da Administración autonómica

Artigo 8º.

Os servicios e os organismos autónomos da Administración autonómica ou calquera outro integrado na Rede Corporativa da Xunta de Galicia accederán a Internet, exclusivamente, a través da dita rede.

Artigo 9º.

A utilización de Internet polo persoal ó servicio da Administración da Comunidade Autónoma de Galicia axustarase en todo momento ás necesidades do traballo desempeñado e á normativa específica reguladora desta utilización.

Sobre a xestión do servicio de acceso a INTERNET na Rede Corporativa da Xunta de Galicia

Artigo 10º.

Será competencia da Comisión de Informática:

a) Aprobar, por proposta da Consellería da Presidencia e Administración Pública:

-Os principios de coordinación xeral da publicación de todo tipo de información a través de Internet.

-As normas de estilo, de presentación do contido, de imaxe corporativa e de carácter técnico da Xunta de Galicia en relación con Internet.

b) Elaborar e aprobar, se é o caso, as normas reguladoras da utilización da rede Internet polo persoal ó servicio da Administración autonómica.

c) Autorizar calquera proxecto de utilización de Internet por parte das consellerías.

d) Regula-la utilización dos protocolos, algoritmos, software e hardware necesarios para o uso de Internet.

Artigo 11º.

Será competencia da Consellería da Presidencia e Administración Pública:

-O establecemento, administración, xestión e mantemento do acceso a Internet desde a Rede Corporativa da Xunta de Galicia.

-A creación, administración, xestión e mantemento das infraestructuras necesarias para a difusión de información a través de Internet.

-O establecemento, administración, xestión e mantemento de infraestructuras básicas relacionadas con Internet, como servicio de directorio, mensaxería electrónica, xestión de claves de sinatura e cifrado, telefonía a través de Internet, rexistro de entrada e saída, servicio de busca de información e, en xeral, calquera outra que, polas súas características, afecte máis dunha consellería.

-A xestión administrativa e técnica de calquera nome de dominio da Xunta de Galicia, integrado na Rede Corporativa da Xunta de Galicia.

-A elaboración de estatísticas e a súa coordinación sobre a utilización de Internet.

-A proposta á Comisión de Informática das normas de uso de Internet por parte do persoal ó servicio da Xunta de Galicia.

-A proposta de protocolos, algoritmos, sofware ou hardware que utilizará a Administración autonómica para acceder a Internet, desde a Rede Corporativa da Xunta de Galicia.

-A administración do acceso a Internet e a supervisión da súa correcta utilización por parte do persoal adscrito á Xunta de Galicia.

-A creación, xestión e mantemento dos sistemas de xestión necesarios da Rede Corporativa da Xunta de Galicia.

Artigo 12º.

Correspóndelle a cada consellería velar pola correcta utilización do acceso a Internet por parte do seu persoal adscrito.

Disposición transitoria

Aqueles servicios da Administración da Comunidade Autónoma de Galicia integrados na Rede Corporativa da Xunta de Galicia que actualmente conten con acceso a Internet por un medio diferente a ela, elaborarán, nun prazo máximo de tres meses desde a publicación do presente decreto, un plan de adaptación da súa situación a esta norma.

Disposición derradeira

A Consellería da Presidencia e Administración Pública nun prazo máximo de seis meses a partir da publicación desta norma, elaborará un plan para o establecemento dos sistemas necesarios para realiza-las comunicacións oficiais a través de Internet segundo o disposto no artigo 6º.

Santiago de Compostela, cinco de febreiro de mil novecentos noventa e nove.

Manuel Fraga Iribarne

Presidente

Dositeo Rodríguez Rodríguez

Conselleiro da Presidencia e Administración Pública