O Decreto 223/1998, do 24 de xullo, creou a Oficina de Tramitación Única como unha unidade administrativa coa misión fundamental de informar e asesora-los particulares interesados na posta en fun
cionamento de calquera establecemento industrial e de coordinar e impulsa-los expedientes relativos ás autorizacións administrativas que, en relación coa dita materia, solicitasen á Xunta de Galicia.
O espírito que informou aquel decreto viña determinado pola liña marcada nas accións emprendidas para a modernización e reforma da actuación da Administración, dirixidas á eliminación de trámites innecesarios que repercutían na celeridade da actuación administrativa, dentro da seguridade xurídica que debe presidir esta, ten que imprimir ós seus actos resolutorios.
Seguindo na mesma dirección e buscando, máis se cabe, facilitarlle ó administrado a tramitación e resolución das súas peticións, a Xunta de Galicia arbitra, mediante o presente decreto, a posibilidade de habilitar entidades de carácter asociativo e representativas dos diversos sectores comercial e industrial, como instrumentos que actúen en colaboración coa Administración para a información e recepción das solicitudes e demais documentación relacionados coa posta en funcionamento de novas industrias, traslado ou ampliación dun establecemento industrial.
Na súa virtude, por proposta do conselleiro da Presidencia e Administración Pública e logo de deliberación do Consello da Xunta de Galicia na súa reunión do día cinco de febreiro de mil novecentos noventa e nove,
DISPOÑO:
Artigo 1º
1. A Consellería da Presidencia e Administración Pública, poderá habilita-las cámaras oficiais de Comercio, Industria e Navegación e ás confederacións de empresarios de Galicia, como instrumentos coadxuvantes da Oficina de Tramitación Única de Industrias (OTU), para o exercicio de funcións de información e asesoramento en materia de creación de industrias, e recepción de solicitudes e demais documentación relativa á posta en funcionamento de novas industrias ou traslado ou ampliación de establecementos industriais xa existentes, nos termos establecidos no artigo 38.4º e) da Lei 30/1992, do 26 de novembro, de réxime xurídico das administracións públicas e do procedemento administrativo común.
2. A recepción das solicitudes e demais documentación á que fai referencia o artigo anterior terá carácter oficial para tódolos efectos desde o momento no que as anteditas solicitudes ou documentación tivesen entrada no Rexistro Informático das OTU, para o que existirá un terminal deste en tódalas entidades habilitadas.
Artigo 2º
A habilitación a que se refire o artigo anterior levarase a cabo trala concertación dos convenios de colaboración que foren precisos entre a Consellería
da Presidencia e Administración Pública e as entidades mencionadas.
Estes convenios, que deberán cumpri-los requisitos establecidos no acordo do Consello da Xunta de Galicia do 27 de marzo de 1991, regularán, en todo caso, as funcións que van desenvolve-las entidades asinantes, as obrigas da Administración no referente á formación do persoal responsable do servicio e o seu prazo de vixencia.
Artigo 3º
De conformidade co disposto no artigo 1º, as solicitudes, escritos e comunicacións relativas ós expedientes administrativos para a posta en funcionamento dunha nova industria ou o traslado ou ampliación dun establecemento industrial, poderán presentarse ante as entidades habilitadas de conformidade co establecido no artigo anterior.
Para este efecto as entidades habilitadas obríganse:
a) A entregarlle ó interesado un xustificante da súa solicitude.
b) A introducir nas bases de datos da OTU a información relativa ás solicitudes, escritos ou comunicacións presentadas, sen dilación e dentro do mesmo día da súa presentación e pola orde na que foron presentadas.
c) A remitir, con carácter inmediato, á Oficina de Tramitación Única de Industrias que lles corresponda, as solicitudes e documentos presentados polos particulares interesados nos expedientes administrativos regulados no Decreto 223/1998, do 24 de xullo.
Artigo 4º
O recoñecemento oficial da habilitación a favor das entidades ás que se refire o presente decreto efectuarase, en cada caso concreto, mediante orde da Consellería da Presidencia e Administración Pública na que, igualmente, se sinalará a data do comezo efectivo da actividade obxecto da habilitación outorgada.
Disposicións derradeiras
Primeira.-Este decreto entrará en vigor o día seguinte ó da súa publicación no Diario Oficial de Galicia.
Segunda.-Facúltase o conselleiro da Presidencia e Administración Pública para dicta-las normas necesarias para a execución e desenvolvemento do presente decreto.
Santiago de Compostela, cinco de febreiro de mil novecentos noventa e nove.
Manuel Fraga Iribarne
Presidente
Dositeo Rodríguez Rodríguez
Conselleiro da Presidencia e Administración Pública