Con data do 24 de maio de 1996, a Consellería de Agricultura, Gandería e Montes publicou a Orde do 13 de maio de 1996, de axudas a accións de desenvolvemento e ordenación dos bosques.
Con data do 17 de xuño de 1998, a Consellería de Medio Ambiente publicou a Orde do 15 de xuño de 1998, de axudas a accións de desenvolvemento e ordenación dos bosques. De conformidade co disposto na súa disposición adicional segunda, foron tidas en conta as solicitudes presentadas ó abeiro da Orde do 13 de maio de 1996, de axudas a accións de desenvolvemento e ordenación dos bosques. Nembargantes, quedaron aínda sen atender solicitudes por falta de crédito.
Dado o importante volume de novas solicitudes de axuda recibidas, ó abeiro da Orde do 15 de xuño de 1998, de axudas a accións de desenvolvemento e ordenación dos bosques, con data do 9 de decembro de 1998, a Consellería de Medio Ambiente publicou a Orde do 27 de novembro de 1998 pola que se amplía o prazo para comunica-la aprobación e a contía das axudas que se concedan ás solicitudes formuladas ó abeiro da Orde do 15 de xuño de 1998, de axudas a accións de desenvolvemento e ordenación dos bosques, quedando sen atender solicitudes por falta de crédito.
Por todo o exposto, é preciso continuar no ano 1999 a tramitación das solicitudes presentadas ó abeiro das ordes de axudas a accións de desenvolvemento e ordenación dos bosques, do 13 de maio de 1996 e do 15 de xuño de 1998.
En consecuencia e de acordo co disposto na Lei 1/1983, do 22 de febreiro, reguladora da Xunta e do seu presidente, o Decreto 482/1997, do 30 de decembro, e demais normativa concorrente,
DISPOÑO:
Artigo 1º
As solicitudes formuladas ó abeiro da Orde do 13 de maio de 1996, de axudas a accións de desenvolvemento e ordenación dos bosques, ás que non lles foi concedida a subvención solicitada por falta de crédito, poderán ser tidas en conta ó abeiro da presente orde durante o exercicio de 1999.
A tramitación administrativa dos expedientes efectuarase conforme os criterios e requisitos indicados
na dita orde, e continuará a partir do trámite no que se atopen os expedientes no momento da publicación no DOG da presente orde.
Artigo 2º
As solicitudes de axuda presentadas ó abeiro da Orde do 15 de xuño de 1998, de axudas a accións de desenvolvemento e ordenación dos bosques, poderán ser tidas en conta na presente orde durante o exercicio de 1999.
Para a tramitación administrativa dos expedientes seguirán vixentes os criterios e requisitos indicados na devandita orde, e continuará a partir do trámite no que se atopen os expedientes no momento da publicación no DOG da presente orde.
Artigo 3º.-Financiamento.
As accións previstas na presente orde financiaranse, no exercicio do ano 1999, con cargo ás dispoñibilidades orzamentarias existentes na aplicación 15.02.614-C 770.0 por un importe de 650.000.000 de pesetas, que poderá ser incrementado con fondos comunitarios, do Estado ou da Comunidade Autónoma.
Disposición derradeira
Única.-A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 27 de maio de 1999.
José Carlos del Álamo Jiménez
Conselleiro de Medio Ambiente