Perante este Xurado Provincial de Montes Veciñais en Man Común tramítase o expediente de clasificación do monte coas características que a seguir se indican:

Expediente número 2/1999.

Denominación: montes de Pedriña.

Comunidade propietaria: veciños dos lugares de Lama de Rei, O Mosteiro e Queirugal.

Parroquia: O Mosteiro.

Concello: Cervantes.

Superficie: 82 ha.

Estremas:

Norte: monte de San Tomé de Cancelada. Leste: predios particulares dos lugares de Lama de Rei, O Mosteiro e Queirugal. Sur: monte de San Martiño das Cañadas. Oeste: monte de Santo André das Nogais.

Descrición do perímetro: empezando polo extremo noroeste en Monte Redondo no límite co concello das Nogais, baixa na dirección oeste-leste por un teso limitando co monte de San Tomé de Cancelada, por Marco Solleiro, Penachá, Lameira Longa e Regueiro de Biduedo, xa nos predios particulares. Polo leste segue un cerramento cos termos de Vilafrial, Bolois e Vilaxán, e polo sur co monte de San Martiño das Cañadas sobe polo Teso do Barbeito ata Pena da Bruita, xa no límite co concello das Nogais, que despois segue cara ó norte polos marcos de termos ata chegar a Monte Redondo, onde se comezou.

Dentro deste termo veciñal descrito quedan comprendidos predios particulares e os núcleos de poboación de Lama de Rei, O Mosteiro e Queirugal.

En virtude do acordado polo xurado na sesión que tivo lugar o 9 de decembro de 1998, e en cumprimento da orde do instructor, conforme o disposto na Lei de montes veciñais en man común do 10 de outubro de 1989 e demais disposicións de apli

cación, por este edicto faise pública a iniciación do expediente indicado co obxecto de que, de acordo co previsto no artigo 23 do Regulamento aprobado polo Decreto 260/1992, do 4 de setembro, para a execución da citada lei, cantas persoas, organismos e corporacións resulten interesadas, poidan comparecer e intervir no expediente iniciado e formularen perante o xurado, no prazo dun mes contado a partir do día seguinte ó da publicación deste edicto no Diario Oficial de Galicia, cantas alegacións coiden oportunas na defensa dos dereitos que crean asistirlles en relación cos montes, achegando, se é o caso, a documentación que consideren conveniente ó respecto.

Lugo, 31 de agosto de 1999.

Luis González Vázquez

Presidente do Xurado Provincial de Montes

Veciñais en Man Común de Lugo