A Fundación Galicia-Europa convoca catro bolsas para financia-la estadía non remunerada en institucións comunitarias, ó longo do ano 2000, de licenciados ou titulados superiores equivalentes polas universidades galegas.
Requisitos:
1. Posuí-lo compromiso escrito da correspondente institución no que se acepte a solicitude do candidato para a realización dunha estadía non remunerada.
2. Contar cun expediente académico universitario con, polo menos, media de notable.
3. Acredita-lo coñecemento dunha lingua comunitaria de traballo, ademais do castelán e do galego.
4. Ter nacido despois do 31-12-1970.
5. Residir en Galicia antes da publicación deste anuncio.
6. Posuí-la nacionalidade dalgún dos Estados membros da Unión Europea.
A Fundación Galicia-Europa efectuará a selección dos peticionarios en función dos méritos acreditados
por estes, entre aqueles que sexan admitidos polas correspondentes institucións. Entre eses méritos serán de especial consideración a realización en Galicia de estudios universitarios oficiais de posgrao sobre asuntos de integración europea axeitados á realidade galega e doutros equivalentes en centros europeos de referencia.
Duración da bolsa:
Ata cinco meses por estadía.
Contía da bolsa:
A contía da bolsa será de 867,63 euros/mes para aloxamento e manutención. Os gastos de transporte e seguros serán por conta dos candidatos.
Data de presentación da solicitude da bolsa:
As solicitudes poderanse presentar ata o 15 de setembro do 2000.
Información e presentación de solicitudes:
Xunto coa solicitude de bolsa, segundo o modelo do anexo I, deberá presentarse currículum vitae e copias do expediente académico, e da restante documentación acreditativa do cumprimento dos requisitos esixidos.
As solicitudes deberán presentarse ou dirixirse por correo certificado con xustificante de recepción á Fundación Galicia-Europa, rúa dos Feáns, 5 - baixo,
15706 Santiago de Compostela. Poderá solicitarse información adicional de luns a venres, e de 9 a 14 horas, polos seguintes medios:
Teléfono: 981 54 10 12.
Fax: 981 54 10 13.
Correo electrónico: santiago*fundaciongaliciaeuropa.org
Santiago de Compostela, 5 de novembro de 1999.
Jaime Pita Varela
Secretario xeral da Fundación Galicia-Europa