Pola Alcaldía Presidencia, con data do 29 de maio de 2000, foi dictada a seguinte resolución:

Primeiro.-Incoar expediente para a aprobación de bases e estatutos da xunta de compensación que se constituirá para a execución do polígono APE E3.01 do Plan Xeral de Ordenación Municipal vixente.

Segundo.-Aprobar inicialmente o proxecto de bases e estatutos presentado por Mercedes Mª de la Iglesia Soriano, en nome e representación da comisión xestora constituída a estes efectos.

Terceiro.-Ordena-la citación persoal no expediente a aqueles que aparezan como interesados na súa calidade de titulares de bens e dereitos afectados, así como a publicación no Diario Oficial de Galicia do anuncio correspondente segundo o modelo oficial que se achega, facultando a comisión xestora, e no seu nome, a Luis de la Iglesia Mantiñán como presidente dela, para a súa presentación e dilixenciamento ante o órgano correspondente.

O que se fai público, de conformidade co disposto no artigo 133.4º en relación do 102, ambos da Lei 1/1997, do 24 de marzo, do solo de Galicia (BOE número 103, do 30 de abril), advertíndolles ós interesados de que o expediente se encontra á súa disposición nas oficinas de Xestión do Servicio de Urbanismo, sitas na avda. da Mariña nº 18, entre as 12 e as 13.30 horas de luns a venres durante o prazo de 20 días a partir da publicación ou notificación do acordo que se traslada, onde poderá consultalo e presentar cántas alegacións teña por conveniente na defensa dos seus dereitos.

A presente publicación terá tamén os efectos previstos no art. 59.4º da Lei 30/1992, de réxime xurí

dico das administracións públicas e do procedemento administrativo común para aqueles supostos de interesados ós que non poidan serlles practicada a notificación persoal e, en particular, as persoas que a continuación se relacionan por descoñecer algún dos datos necesarios para practica-la notificación ou tratarse dunha comunidade hereditaria ou propiedades litixiosas:

Parcela	Ref. catastral	Propietario	Interesados

2	7028002	Provico, S.L.
3	7028004	Propiedad litigiosa	Martínez Orro, S.L. Promociones Bermúdez e López S.L. Mª Fernanda e Carmen de la Iglesia Santos. José, Luis e Antonio de la Iglesia Mantiñán. Miguel Ángel, José Antonio e Alejandro Rodríguez de la Iglesia.
5 8	7028006 7028009	Herederos de Manuel Seoane Suárez	Pedro Montoro Seoane e outros.

A Coruña, 30 de maio de 2000.

O alcalde

P.D.

Salvador Fernández Moreda

Comisión Xestora para o Desenvolvemento da Área de Planeamento Específico APE-E3.01. Labañou.

Estatutos e bases de actuación da xunta de compensación para o Desenvolvemento da Área de Planeamento Específico de Labañou (APE-E3-01) do Plan Xeral de Ordenación Municipal da Coruña.

Estatutos da xunta de compensación para o Desenvolvemento da Área de Planeamento Específico de Labañou (APE-E3-01) do Plan Xeral de Ordenación Municipal da Coruña.

Capítulo I

Disposicións xerais

Artigo 1º.-Denominación, natureza e réxime.

1. Coa denominación de xunta de compensación para o Desenvolvemento da Área de Planeamento Específico de Labañou (APE-E3.01) do Plan Xeral de Ordenación Municipal da Coruña, constitúese unha entidade urbanística colaboradora, de natureza xurídica administrativa, con personalidade xurídica propia e plena capacidade xurídica de obrar para o cumprimento dos seus fins.

2. A xunta réxese polos presentes estatutos e polas bases de actuación que os complementan e, no non disposto nestas normas, polo establecido na lexislación urbanística que resulte de aplicación.

Artigo 2º.-Ámbito territorial, obxecto e fins.

1. O ámbito territorial de actuación da xunta de compensación é o correspondente ó do polígono de solo urbano determinado polo Plan Xeral de Orde

nación Municipal da Coruña como Área de Planeamento Específico APE-E3.01, delimitación que como polígono único POL-E3.01 foi aprobada definitivamente por acordo da Comisión de Goberno do Concello da Coruña con data do 18 de febreiro de 2000.

2. É obxecto da xunta a actuación compensatoria sobre os terreos delimitados; a achega a favor do Concello da Coruña dos terreos de cesión obrigatoria e gratuíta incluídos na área de reparto destinados ó sistema viario, de espacios libres e equipamentos; a cesión igualmente dos terreos que corresponden con base no 10% do aproveitamento non apropiable nos termos da lexislación reguladora do réxime de solo; a execución da correcta urbanización, que, pola súa vez, haberá de ser cedida ó concello, con equidistribución de beneficios e cargas entre os propietarios afectados.

3. Para a consecución deste obxectivo primordial, asignanse á xunta o cumprimento dos seguintes fins:

a) Agrupa-las persoas físicas e xurídicas que a integran para a xestión e execución da Área de Reparto ARE-E3.01, con solidariedade de beneficios e cargas.

b) Redactar e tramitar ante a Administración municipal toda clase de instrumentos de desenvolvemento do planeamento, de proxectos de urbanización e de compensación, así como a contratación e execución das obras necesarias para levalos para o efecto.

c) Tramitar e exercita-las actuacións e solicitudes precisas para a inscrición da xunta no Rexistro de Entidades Urbanísticas Colaboradoras; para a expropiación forzosa, en beneficio da xunta, tanto respecto ós propietarios que non se incorporen a esta en tempo oportuno, como respecto dos incorporados que incumpran as súas obrigas; e para o cobro en vía de prema administrativa das cantidades endebedadas á xunta polos asociados.

d) Adquisición, posesión, venda, gravame de toda clase de bens, mobles ou inmobles, por calquera título, incluso por expropiación forzosa, actuando neste caso en calidade de beneficiaria da expropiación.

e) Adquisición, posesión, venda, gravame e calquera outros actos de dominio ou administración dos terreos achegados á xunta polos propietarios incorporados a esta, actuando en calidade de fiduciaria dos socios propietarios.

f) Cesión ó concello dos terreos que correspondan.

g) Adxudica-las parcelas resultantes da actuación ós membros incorporados á xunta e, na proporción correspondente, ó concello da Coruña, na forma que se determine no proxecto de compensación.

h) Formalizar e suscribir operacións de crédito ou préstamo, incluso con garantía hipotecaria sobre os terreos achegados e con emisión de títulos, nas condicións establecidas no art. 154 da Lei hipotecaria, para a execución das obras de urbanizacións neles.

i) Inscribi-lo proxecto de compensación no Rexistro da Propiedade.

j) Asumi-la xestión e defensa dos intereses comúns dos socios da xunta, ante persoas físicas ou xurídicas, autoridades e organismos das administracións actuantes, así como ante os órganos da Administración de xustiza.

k) O exercicio de cantos dereitos e actividades correspondan con base na lexislación vixente.

Artigo 3º.-Control administrativo.

1. A xunta de compensación actúa baixo control administrativo do Concello da Coruña.

2. No exercicio desta función de control correspóndelle ó concello a adopción dos actos e acordos que lle atribúe a lexislación urbanística vixente.

Artigo 4º.-Duración.

A xunta de compensación estará habilitada para comenza-las súas funcións desde a súa inscrición no Rexistro de Entidades Urbanísticas Colaboradoras e durará ata que se cumpra totalmente o seu obxectivo, salvo que se produza a súa disolución nos termos establecidos nestes estatutos.

Artigo 5º.-Domicilio social.

A xunta ten o seu domicilio social no municipio da Coruña, rúa avda. da Habana, 32 baixo dereita. Este domicilio poderá ser modificado por acordo da asemblea, debendo ser notificado ó concello para a súa posterior anotación no rexistro correspondente.

Capítulo II

Socios e constitución da xunta

Artigo 6º.-Requisitos para a incorporación á xunta dos propietarios.

A xunta intégrase polas persoas físicas ou xurídicas, propietarias dos terreos comprendidos no ámbito da Área de Reparto ARE-E3.01 que voluntariamente se incorporaron a ela, así como polas empresas urbanizadoras que se incorporen á xestión conforme o previsto no artigo 134.2º da Lei do solo de Galicia (LSG) e no artigo 165 do Regulamento de xestión urbanística (RXU).

Artigo 7º.-Constitución.

1. O concello, de acordo co establecido no art. 163 do Regulamento de xestión urbanística, convocará a tódolos propietarios para a constitución da entidade, dentro dun prazo non superior ós tres meses desde que sexa firme en vía administrativa o acto de aprobación dos estatutos e bases, nin inferior a un mes a partir da notificación do acordo de aprobación citado, realizándose a convocatoria mediante carta certificada, coa antelación mínima de dez días hábiles á data prevista.

2. A constitución farase mediante escritura pública na que deberá consta-la relación de propietarios e, se é o caso, empresas urbanizadoras que se incorporen; relación e descrición dos predios das que son titulares; acordo de constitución; e persoas que se designen para ocupar cargos nos órganos de goberno.

3. Trasladarase ó concello copia autorizada da escritura de constitución que adoptará, se procede, acordo aprobatorio e elevará ambos ó órgano competente da Comunidade Autónoma para a súa inscrición no Rexistro de Entidades Urbanísticas Colaboradoras.

Artigo 8º.-Incorporación de empresas urbanizadoras.

1. Poderán incorporarse á xunta, como membros dela, as empresas urbanizadoras que acheguen total ou parcialmente fondos ou medios necesarios para a urbanización.

2. A incorporación poderá instrumentarse no acto de constitución da xunta, reflectíndose no acordo constitutivo; noutro caso será preciso que sexa acordada pola asemblea co voto favorable de membros dela que representen, polo menos, o 51% das cotas de participación.

Será necesario que as empresas urbanizadoras incorporadas garantan a súa xestión en forma e contía que determine, de se-lo caso, a asemblea. Para a valoración das achegas da empresa urbanizadora e das adxudicacións ó seu favor haberá que aterse ó sinalado nas bases de actuación.

Artigo 9º.-Incorporación de propietarios non adheridos.

Poderán incorporarse á xunta, como membros dela (con igualdade de dereitos e obrigas), con posterioridade á súa constitución, os propietarios que non o teñan feito con anterioridade, nas condicións previstas no art. 134.1 LSG.

Artigo 10º.-Titularidades especiais.

1. Cando os predios pertenzan a menores ou incapacitados formarán parte da xunta os seus representantes legais e a disposición de tales predios pola xunta non estará suxeita ás limitacións de carácter civil.

2. No caso de existir cotitularidade sobre un predio ou dereito, os cotitulares haberán de designar unha soa persoa para o exercicio das súas facultares como asociado, respondendo solidariamente fronte á entidade de cantas obrigas dimanen da súa condición. Se non designaren representante no prazo que para o efecto sinale a xunta, será nomeado por esta entre os condominios.

A persoa designada polos copropietarios como representante pode non ser un copropietario, poderá ser un apoderado do dito copropietario con poderes suficientes para garantir tódolos actos do representante.

Polo menos dous comuneiros poderán convoca-la reunión da comunidade para nomear ó representante ou destituílo, facéndoo constar na misiva, que será enviada ós comuneiros por correo certificado. Calquera comuneiro poderá propoñe-la destitución do representante da comunidade nunha reunión validamente constituída, punto que será automaticamente incluído na orde do día da seguinte reunión. Será deber ineludible do representante da comunidade de bens a convocatoria de polo menos unha reunión

do proindiviso entre a recepción da notificación de calquera reunión da xunta de compensación coa orde do día axustada ó previsto no sexto parágrafo deste punto. Se non existise polo menos unha reunión do indiviso validamente constituída no dito prazo, o representante non poderá emitir voto do indiviso na xunta de compensación. As reunións da comunidade de bens entenderanse validamente constituídas sen necesidade de convocatoria cando concorra o 100% do indiviso. Entenderase validamente a primeira convocatoria cando concorra ó menos o 70% do indiviso e en segunda convocatoria calquera que sexa a cota presente, no caso de que dúas persoas foran designadas cada unha por iguais cotas de participación, será nomeada a que o fora por maior número de comuneiros. Para tal efecto levantarase acta da reunión da comunidade expresando as porcentaxes do indiviso que cada copropietario represente e a persoa que designa, que se remitirá ó órgano actuante.

Para destituír a un representante nomeado pola xunta ou pola comunidade será necesario o acordo de polo menos un tercio das cotas do indiviso, tomado coas formalidades anteriormente descritas, e as sinaladas no sexto parágrafo do presente punto. No mesmo acordo será nomeado un novo representante que substituirá ó destituído nos órganos de goberno.

A persoa designada polo proindiviso para o exercicio das súas facultades obrígase a manter informados os copropietarios de cantas cuestións afecten a xunta e a comunicar a tódolos copropietarios as convocatorias das reunións dos órganos de goberno da xunta, coa orde do día e coa antelación suficiente á súa celebración. As convocatorias poderán ser efectuadas por servicios de mensaxeira.

As decisións do indiviso relativas á orde do día da xunta de compensación tomaranse nas reunións do indiviso validamente constituídas. Cada punto da orde do día da seguinte reunión da xunta de compensación incluirase na orde do día da reunión do proindiviso e as decisión relativas á orde do día serán tomadas por maioría na cota de participación. No caso de que un punto da orde do día fose votado de diversa maneira por igualdade de cotas do proindiviso, será aceptada a que o fose por maior número de comuneiros.

Os gastos derivados da xestión e administración do proindiviso serán aboados polos copropietarios en proporción a súa cota de participación e nun prazo máximo de seis meses con posterioridade á súa aprobación polo proindiviso. O socio que non aboara a súa parte de gastos no prazo de tempo será considerado moroso e como tal perderá o seu dereito ó voto automaticamente en tanto que non se poña ó corrente dos gastos.

3. No caso dalgún predio pertenza en propiedade a unha persoa e calquera outra teña dereito real limitativo de dominio sobre esta, ou no caso da existencia de arrendamento, a calidade de socio corresponderá ó propietario, sen prexuízo de que o titular do dereito real ou persoal perciba o rendemento económico correspondente.

Artigo 11º.-Transmisión de bens e dereitos.

1. A incorporación dos propietarios á xunta non implica a transmisión a esta da propiedade dos inmobles, actuando aquela como fiduciaria con poder de disposición. Tódolos terreos quedan directamente afectados ó cumprimento das obrigas inherentes ó sistema.

2. Os membros da xunta poderán transmiti-los seus terreos e a correlativa cota de participación na xunta, coas seguintes condicións e efectos:

a) O transmitente notificará fidedignamente á xunta as circunstancias do adquirente e as condicións da transmisión, para os efectos da necesaria constancia.

b) O adquirente, por calquera clase de título, queda subrogado nos dereitos e obrigas vinculados á participación transferida, debendo facerse expresa mención diso no título de transmisión.

c) A condición de socio é inseparable da propiedade dos terreos correspondentes.

Capítulo III

Dereitos e obrigas dos membros da xunta

Artigo 12º.-Dereitos dos socios.

Serán dereitos dos socios:

a) Elixi-los compoñentes dos órganos de goberno e administración, e poder ser elixibles para eles.

b) Exerce-las facultades dominicais sobre os predios da súa propiedade achegadas, coas limitacións derivadas da afección daquelas ó cumprimento das obrigas inherentes ó sistema de compensación e dos actos de disposición ou administración efectuados pola xunta en exercicio das súas facultades fiduciarias.

c) Participar no reparto de beneficios e cargas derivados do planeamento que se executa e no patrimonio resultante da liquidación, en proporción ás súas respectivas cotas.

d) Asistir, en por sí ou por medio de representante, ás sesións da asemblea xeral, emitindo a súa voz e o voto de acordo á proporcionalidade derivada da súa cota de participación, e presentar proposicións e suxestións.

e) Coñoce-las actuacións dos órganos de goberno da xunta, mediante os informes e contas rendidas por estes ante á asemblea xeral.

f) Interpoñe-los recursos que procedan contra os acordos adoptados polos órganos de goberno da xunta.

g) Os demais dereitos que lle correspondan segundo as disposicións legais aplicables a estes estatutos.

Artigo 13º.-Obrigas dos socios.

1. Son obrigas dos socios:

a) Poñer á disposición dos órganos de goberno da xunta os documentos acreditativos da súa titularidade e, de se-lo caso, indica-las circunstancias

dos titulares de dereitos reais ou persoais, con expresión da natureza e contía das cargas e gravames.

b) Sinalar un domicilio para os efectos de notificacións, comunicando á xunta os cambios del.

c) Cumpri-los acordos adoptados polos órganos de goberno da xunta, sen prexuízo da posibilidade de interpoñe-los correspondentes recursos.

d) Satisfacer puntualmente as cantidades establecidas polos órganos de goberno.

e) Notificar á xunta as transmisións, ou actos de gravame, dos terreos da súa propiedade.

f) Regulariza-la titularidade e situación rexistral dos terreos achegados, dentro dos prazos que sinale o consello rector.

g) Permiti-la ocupación dos seus predios para a execución das obras de urbanización, depósito de materiais e instalacións complementarias.

h) En xeral cumprir cantas obrigas sexan inherentes ó sistema.

2. Os dereitos e obrigas dos socios poderán ser exercidos persoalmente ou por medio de representantes designados para o efecto.

Artigo 14º.-Cotas de participación.

1. A participación dos propietarios nos beneficios e cargas derivados do planeamento que se executa será proporcional á superficie dos predios achegados, non obstante, os propietarios, por unanimidade, poderán adoptar un criterio distinto.

2. A cada un dos socios da xunta de compensación atribuiráselle unha cota de participación proporcional á superficie real achegada, unha vez deducida a parte que corresponde ó concello. A dita cota definirá o voto porcentual dos socios nos acordos dos órganos de goberno.

3. O valor das edificacións, obras, plantacións e instalacións existentes nos predios achegados non influirá na atribución das cotas de participación ós socios. As que deban extinguirse valoraranse independentemente, e pagaranse ó propietario con cargo ós gastos de urbanización.

4. No suposto de incorporación á xunta de empresas urbanizadoras, procederase ó reaxuste das participacións porcentuais dos socios propietarios, asignándolle a cota correspondente a súa achega á empresa urbanizadora.

Capítulo IV

Órganos de goberno e administración

Artigo 15º.-Enumeración.

1. A xunta de compensación réxese pola asemblea xeral e o consello rector.

2. O presidente, vicepresidente e secretario do consello rector serano, tamén, da asemblea xeral.

3. O representante do Concello da Coruña formará parte, como vocal, do consello rector.

4. Tódolos socios, incluso os ausentes e os disidentes, quedan sometidos ós acordos validamente adoptados polos órganos de goberno, dentro das súas respectivas atribucións.

Artigo 16º.-Da asemblea xeral.

1. A asemblea xeral é o órgano supremo de decisión da xunta de compensación e forman parte dela tódolos asociados.

2. A primeira reunión terá carácter constituínte e será convocada polos promotores dentro do prazo sinalado polo concello para o outorgamento da escritura de constitución.

3. Reunirase en forma ordinaria, polo menos, dúas veces ó ano; unha, dentro dos tres primeiros meses de cada exercicio (que coincidirá co ano natural), para aproba-la memoria, contas e balance do exercicio anterior; e a outra, nos tres últimos meses de cada exercicio, para aproba-lo orzamento do ano seguinte. Se non se aprobase prorrogarase o do exercicio anterior

4. Toda reunión da asemblea xeral que non sexa unha das sinaladas no punto anterior terá carácter extraordinario.

A asemblea xeral extraordinaria reunirase cando o acorde o seu presidente, o consello rector, ou por proposta de socios que representen, polo menos, o 30 por 100 das participacións, debendo indicarse na proposta os asuntos que se van tratar. Se o presidente ou o consello non convocase a asemblea dentro dos seis días seguintes ó da solicitude, os interesados poderán dirixirse ó concello para que sexa este quen a convoque. Entre a convocatoria e a celebración da sesión non poderá transcorrer máis dun mes.

5. As reunións da asemblea, ordinaria ou extraordinaria, serán convocadas polo presidente mediante carta con xustificante de recepción, remitida ós socios da xunta, polo menos, con cinco días de antelación á data sinalada. A convocatoria sinalará o lugar, día e hora da reunión, en primeira e segunda convocatoria e os asuntos incluídos na orde do día. Entre a primeira e a segunda convocatoria deberá mediar, polo menos, o prazo dunha hora. Estando presentes, ou representados, tódolos membros da xunta poderá celebrarse a asemblea se así se acorda por unanimidade, sen que sexa preciso, neste caso, convocatoria previa.

6. A asemblea xeral quedará validamente constituída, en primeira convocatoria, cando concorran a ela, en por si ou representados, socios na que as cotas de participación representen, polo menos, o 51 por 100 do total. En segunda convocatoria será válida a constitución da asemblea calquera que sexa o número de socios que concorran a ela, sempre que estea presente, ademais do presidente e o secretario ou quen legalmente lles substituían, polo menos un socio.

7. Os acordos adoptaranse por maioría de cotas de participación presentes ou representadas. Isto non

obstante, os acordos de modificación de estatutos, sinalamento de cotas e rectificación destas, incorporación de empresas urbanizadoras, transmisión de predios propios dos socios, emisión de empréstitos e disolución da xunta, requirirán o voto favorable de socios na que as cotas de participación representen máis do 50 por 100 do total. Os acordos serán inmediatamente executivos, constando en acta da sesión que se levantará ó termo dela e será aprobada a continuación ou na inmediata seguinte. Por requirimento dos socios, ou do concello, o secretario, co visto e prace do presidente, expedirá certificación do contido do libro de actas, no que constarán todas, pola súa orde, e unha vez aprobadas.

8. Son atribucións da asemblea:

a) A designación e cesamento dos membros do consello rector, a aprobación do orzamento de cada exercicio e das contas del.

b) A modificación dos estatutos, sen prexuízo da necesaria aprobación posterior polo concello.

c) A imposición de derramas extraordinarias para atende-los gastos non previstos no orzamento anual ou para atender a insuficiencias temporais de tesourería.

d) A realización de toda clase de actos de dominio tales como adquirir, transmitir e gravar toda clase de bens e dereitos; e constituír, modificar ou cancelar dereitos reais impostos sobre os bens ou dereitos pertencentes á xunta. Non obstante, os actos de disposición nos supostos en que a xunta actúa como fiduciaria dos socios sobre os bens destes requirirán o voto favorable de socios que representen, polo menos, o 51 por 100 das cotas.

e) Acorda-la redacción do proxecto de compensación e as súas modificacións, aprobación de plans o proxectos urbanísticos ou constructivos, para sometelos á correspondente tramitación administrativa.

f) Acorda-la aprobación inicial do proxecto de compensación de conformidade co previsto no artigo 133.8º da LSG.

g) A aprobación do prego tipo de condicións e a forma ou modo de execución das obras de urbanización.

h) A formalización de créditos e a emisión de títulos, prestando garantía-hipotecaria cos terreos integrados na xunta.

i) A resolución procedente respecto da incorporación á xunta de empresas urbanizadoras, sinalando a cota o cotas de participación e a correlativa modificación das asignadas inicialmente ós socios propietarios.

j) A prestación das garantías que sexan esixidas pola Administración urbanística.

k) A disolución e liquidación da xunta de compensación.

l) En xeral, cantas sexan precisas para a xestión común.

Artigo 17º.-Do consello rector.

1. O consello rector é o órgano permanente de goberno e administración da xunta para o exercicio de cantas funcións non estean expresamente reservadas á asemblea polos presentes estatutos ou por acordo expreso dela.

2. Son funcións especificas do consello rector:

a) Executa-los acordos da asemblea xeral.

b) Administra-los fondos da xunta, para o cal poderá abrir, manter e cerrar contas correntes, de aforro e de crédito en institucións financeiras, ingresando e retirando fondos delas a súa conveniencia; facer e esixir pagamentos, cobros e liquidacións, calquera que sexa a súa causa xurídica e a persoa ou entidade obrigada; librar, endosar, avaliar e descontar letras de cambio; e, en xeral, realizar toda clase de actos e contratos en beneficio dos intereses da xunta.

c) Elevar proposta á asemblea xeral das achegas económicas que han de realiza-los socios da xunta, facéndoas figurar no orzamento anual ordinario, así como das derramas extraordinarias que sexan necesarias. Unha vez acordadas pola asemblea ás derramas ordinarias ou extraordinarias, o consello establecerá a forma e prazos de pagamento en que han de satisfacerse e procederá contra os socios morosos.

d) Solicitar dos órganos urbanísticos competentes o exercicio das potestades públicas, en beneficio dos intereses da xunta, para proceder á expropiación ou ocupación directa dos predios dos propietarios que non se integren na xunta de compensación, para proceder á expropiación dos membros da xunta que estean en descuberto das súas obrigas con ela, ou para proceder, de se-lo caso, en vía de constrinximento administrativa contra estes últimos.

e) Adxudicar e contrata-las obras de urbanización derivadas dos proxectos previamente aprobados en asemblea xeral, por un importe que en ningún caso exceda do orzamento ou orzamentos aprobados en asemblea.

f) Exercer cantas facultades lle sexan delegadas pola asemblea xeral de entre as asignadas como atribucións delas; non podendo delegarse a aprobación do orzamento nin a censura de contas.

g) Nomear, sancionar e separar ó persoal necesario para a xestión da xunta.

3. O consello rector componse de catro membros:

a) Presidente, vicepresidente e secretario, designados pola asemblea xeral.

b) Un vocal representante do Concello da Coruña.

4. As designacións haberán de recaer, necesariamente, en persoas físicas. O nomeamento efectuarase por un ano, podendo procederse á súa reelección por períodos iguais en virtude de acordo expreso da asemblea xeral. En caso de falecemento, renuncia ou acordo de cese dun ou máis membros, o propio consello poderá designar a quen deba sustituílos ata a súa renovación regulamentaria.

5. O consello rector determinará o seu propio réxime de actuación, sesións, acordos e actas. En calquera caso os acordos do consello rector adoptaranse por maioría dos seus membros.

Artigo 18º.-Do presidente, vicepresidente e secretario.

1. O presidente é representante legal, xudicial e extraxudicial, da xunta de compensación e dos seus órganos de goberno, podendo outorgar poderes para o exercicio da dita representación. Correspóndelle ó presidente convocar, presidir, suspender e levanta-las sesións da asemblea xeral e do consello rector; fixa-la orde do día, dirixi-las deliberacións e dicidi-los empates con voto de calidade; executar e facer cumpri-los acordos da asemblea e do consello rector, autoriza-las súas actas, certificados e cantos documentos o requiran; exercer, na forma que o consello rector determine, calquera actividade bancaria que esixa o funcionamento da xunta; e, en xeral, exercer cantas funcións sexan inherentes ó seu cargo ou lle sexan delegadas pola asemblea xeral u polo consello rector.

2. O vicepresidente substituirá o presidente en casos de vacante, ausencia, delegación, enfermidade ou imposibilidade.

3. O secretario é o fedatario da xunta. Levantará acta das sesións que celebren a asemblea xeral e o consello rector, transcribíndoas ó libro de actas, e expedindo, a petición de parte, certificados delas, co visto e prace do presidente. O cargo de secretario poderá ser atribuído a unha persoa que non sexa membro da xunta. En caso de vacante, ausencia, delegación, enfermidade ou imposibilidade, o secretario será substituído polo vocal de menor idade. O secretario non terá dereito ó voto.

Capítulo V

Réxime económico e xurídico

Artigo 19º.-Patrimonio.

O patrimonio da xunta estará integrado polos bens e dereitos que, por calquera título, sexan adquiridos por esta.

Artigo 20º.-Ingresos e gastos.

1. Serán ingresos da xunta de compensación:

a) As achegas iniciais dos socios.

b) As cantidades satisfeitas polos socios, con carácter ordinario ou extraordinario.

c) As subvencións e doazóns que se obteñan.

d) Os productos das transmisións de bens de que sexa titular a xunta.

e) As rendas e productos do seu patrimonio.

f) As participacións e ingresos que procedan de convenios con outras entidades e organismos para a realización de fins urbanísticos.

2. Serán gastos da xunta de compensación os de:

a) Promoción da actuación urbanística.

b) Execución das obras de urbanización e, de se-lo caso, de edificación.

c) Aboamento de honorarios profesionais, administrativos, de gardería, vixilancia, etc.

d) Indemnizacións por expropiacións de bens e dereitos, cando a xunta fora beneficiaria da expropiación

e) Gastos de administración da propia xunta de compensación.

f) Gastos de conservación da urbanización ata a entrega dela á Administración municipal.

g) Cantos foran esixidos polo cumprimento do obxecto social da xunta.

Artigo 21º.-Achegas: clases.

As achegas dos membros da xunta están constituídas:

a) Pola totalidade dos terreos afectados pola actuación.

b) Polas achegas das empresas urbanizadoras en caso de incorporarse á xunta.

c) Polas cotas ordinarias en metálico e extraordinarias.

d) Polos productos das transmisións de bens de que sexa titular a xunta.

Artigo 22º.-Aportación de terreos.

O dereito de cada propietario na xunta vén determinado pola superficie das respectivas parcelas achegadas.

1. Se os terreos estiveran gravados con algunha carga real, o propietario afectado haberá de compartir co titular do dereito real a cota atribuída. Se non se declara a carga ou se as declaradas non se axustan á realidade, os prexuízos que puideran resultar serán por cargo do propietario que houbese incorrido en omisión, e do valor das parcelas que lle correspondan deducirase o que resulte das cargas omitidas.

2. O valor dos demais bens e dereitos afectados pola execución do plan, que non deban subsistir ó levarse a efecto a urbanización, non influirá na participación dos asociados, pero determinarase para efectos de indemnización tal e como sinalan as bases.

Artigo 23º.-Achegas dos socios.

1. Sinaladas pola asemblea xeral as achegas que, con carácter ordinario ou extraordinario, deban efectúa-los socios, ou consello rector definirá a forma e condicións do seu pagamento. A contía de tales achegas será proporcional ás cotas de participación social.

2. Salvo acordo en contrario, o ingreso das cantidades que van satisfacer os socios realizarase na conta bancaria designada para o efecto, dentro do mes seguinte á data de notificación do acordo do consello rector polo que se require o pagamento.

Transcorrido o dito prazo, o socio moroso incorrerá nunha recarga de demora do 5 por 100 da cantidade endebedada, procedendo o consello rector a solicitar do concello o cobramento da débeda en vía de constrinximento administrativo ou, alternativamente, a expropiación dos terreos do socio moroso, segundo conveña ós seus intereses, de conformidade co art. 181 do Regulamento de xestión.

Artigo 24º.-Interpretación dos estatutos.

A interpretación dos presentes estatutos correspóndelles ós órganos de goberno da xunta de compensación.

Capítulo VI

Da responsabilidade da xunta de compensación

Artigo 25º.-Responsabilidade da xunta ante a Administración actuante.

1. A xunta de compensación será directamente responsable, fronte á Administración actuante, da urbanización completa do polígono de actuación e, de se-lo caso, da edificación dos soares resultantes e de calquera outras obrigas inherentes ó sistema.

En canto ás obrigas de urbanizar, a responsabilidade será esixible tanto no que afecte as características técnicas da obra de urbanización executada como os prazos en que esta debera rematarse e entregarse á Administración.

2. O incumprimento pola xunta das súas obrigacións habilitará a Administración actuante para substituí-lo sistema de compensación polo de expropiación, podendo adoptarse o sistema de cooperación nas condicións establecidas e no art. 138 da LSG.

3. Cando no exercicio das súas atribucións, a xunta de compensación incorra en infraccións cualificables legalmente como graves ou moi graves, segundo a tipificación establecida no artigo 182 da LSG e no seu Regulamento de disciplina urbanística, a Administración actuante poderá, non só sancionar economicamente a xunta, senón tamén desistir de executa-la actuación polo sistema de compensación e aplicar no seu lugar o de cooperación, impoñendo, de se-lo caso, a reparcelación, ou o de expropiación.

Capítulo VII

Da impugnación dos acordos dos órganos da xunta de compensación

Artigo 26º.-Recursos.

1. Os acordos dos órganos da xunta de compensación son executivos e non se suspenderán pola súa impugnación, salvo que así o acorde o órgano que deba resolve-lo recurso.

2. Os acordos de consello rector poderán ser impugnados ante a asemblea xeral no prazo de quince días hábiles desde a súa notificación, impugnación que deberá resolverse no prazo de dous meses, transcorrido o cal sen resolución entenderase desestimada.

3. Contra os acordos da asemblea xeral, expresos ou por silencio, cabe recurso de alzada ante o concello, no prazo dun mes ou tres meses respectiva

mente desde a súa notificación ou desestimación presunta.

4. Os socios da xunta non poderán promover interdictos de reter ou recobrar, nin os de obra nova, fronte ás resolucións e actos de ocupación da xunta. Tampouco e en ningún caso procederá a acción interdictal cando a xunta ocupe os bens que sexan necesarios para as obras de urbanización, de conformidade co proxecto que se execute.

Capítulo VIII

Disolución e liquidación

Artigo 27º.-Disolución.

1. A xunta de compensación disolverase polas seguintes causas:

a) Por mandato xudicial ou prescrición legal.

b) Por cumprimento dos fins sociais.

c) Por acordo da asemblea xeral, adoptado co voto favorable de socios que representen máis do 70 por 100 das cotas de participación. Os socios, por subrogación, quedarán obrigados ó cumprimento das obrigas contraídas pola xunta e suxeitos ás responsabilidades subsidiarias a que puidese haber lugar.

2. O acordo de disolución requirirá a aprobación do concello e o cumprimento do disposto para o efecto na normativa urbanística.

Artigo 28º.-Liquidación.

Acordada validamente pola asemblea xeral a disolución da xunta e obtida a aprobación do concello, terá lugar a liquidación na forma seguinte:

1. O consello rector procederá á liquidación con observancia das instruccións dictadas para o efecto pola asemblea xeral.

2. O patrimonio que poida existir en terreos, dereitos ou metálico, distribuirase entre os asociados en proporción ás súas respectivas participacións na xunta de compensación.

Bases de actuación da xunta de compensación da Área de Planeamento Específico de Labañou (APE-E3.01).

Base 1ª.-Ámbito territorial e finalidade.

1. As presentes bases de actuación regularán conxuntamente cos estatutos, as actuacións da xunta de compensación da Área de Planeamento Específico de Labañou (APE-E3.01), prevista polo Plan Xeral de Ordenación Municipal da Coruña.

2. A finalidade destas bases é regulamenta-la incorporación á xunta de compensación dos propietarios de terreos no ámbito da actuación, a valoración das súas achegas, a execución da urbanización, a cesión ó concello dos terreos que correspondan ó 10% de aproveitamento non patrimonializable nos termos da lexislación reguladora do réxime de solo, a adxudicación dos predios resultantes e o reparto de cargas e beneficios derivados do planeamento que se executa.

3. En desenvolvemento destas bases formularase un proxecto de compensación conforme o artigo 133.6º da LSG que servirá de medio de distribución de beneficios e cargas e de título para a adxudicación dos terreos.

Base 2ª.-Réxime legal e regulamentario aplicable.

1. A compensación no ámbito da Área de Reparto ARE-E3.01 rexerase polo disposto nas presentes bases e, no non previsto nelas polos preceptos contidos nos artigos 133 a 138 da Lei do solo de Galicia e 157 a 185 do Regulamento de xestión urbanística.

2. A aprobación das presentes bases polo Concello da Coruña supón o seu obrigado cumprimento por parte dos propietarios e empresas urbanizadoras que se incorporen á xunta de compensación.

3. Toda modificación das presentes bases esixirá que sexa aprobada en asemblea xeral extraordinaria, co voto favorable de membros que representen máis do 50 por 100 das cotas de participación. Á modificación daráselle o trámite previsto no artigo 102 da LSG.

Base 3ª.-Funcións e actuacións que comprende.

1. Estas bases conteñen un conxunto de regras que permiten, mediante a utilización dos seus criterios, establece-lo cálculo de achegas e adxudicacións no marco das normas estatutarias que regulan a organización e funcionamento da xunta.

2. A actuación por compensación comprenderá, entre outras:

a) A formulación do proxecto de compensación, conforme o establecido na LSG e no Regulamento de xestión urbanística.

b) A expropiación dos predios dos propietarios non incorporados á xunta ou que non teñan aceptado o sistema de compensación, expropiación da que será beneficiaria a xunta de compensación. O procedemento expropiatorio será o regulado na lexislación urbanística para expropiacións illadas e, en canto á valoración, efectuarase conforme os criterios sinalados nas presentes bases. Alternativamente á expropiación, a xunta de compensación poderá solicitar da Administración actuante a ocupación dos predios en favor da xunta co fin de posibilita-la execución das obras de urbanización previstas, nas condicións sinaladas no art. 134.1º da LSG.

c) A transmisión gratuíta ó concello, en pleno dominio e libre de cargas de tódolos terreos que lle correspondan e deban urbaniza-los propietarios á súa custa, conforme o Plan Xeral de Ordenación e ó estudio de detalle que o desenvolve. A efectividade das ditas cesións producirase a través do proxecto de compensación, título que se inscribirá no Rexistro da Propiedade.

d) A redacción do proxecto de urbanización e o custeamento íntegro por parte da xunta das obras de urbanización previstas, así como os demais gastos inherentes e/ou asimilados.

e) A xunta de compensación, con independencia dos outros cometidos propios dela, conforme a lei e os seus estatutos, poderá acordar por maioría de cotas e logo de convenio co propietario ou propietarios afectados que a propia xunta de compensación proceda a edificar todos ou parte dos soares.

3. A xunta de compensación deberá constituírse no prazo máximo de tres meses, desde que sexa firme en vía administrativa o acto de aprobación dos estatutos e das bases de actuación. De acordo co establecido nas bases de actuación, a xunta de compensación formulará o correspondente proxecto de compensación. Para a definición dos dereitos achegados, valoración dos predios resultantes, regras de adxudicación, aprobación e inscrición no Rexistro da Propiedade do mencionado proxecto haberá de aterse ó disposto para a reparcelación na lexislación vixente. Con independencia do anterior, por acordo unánime de tódolos afectados poderanse adoptar criterios diferentes, sempre que non sexan contrarios á lei ou ó planeamento aplicable, nin lesivos para o interese público ou de terceiros.

Base 4ª.-Valoración dos predios achegados.

1. Os dereitos e deberes dos propietarios determínanse en proporción ás súas respectivas cotas de participación. Non obstante os propietarios por unanimidade poderán adoptar un criterio distinto.

2. A cota de participación dos asociados establécese en proporción á superficie dos predios da súa pertenza. A determinación das superficies efectuarase de conformidade ó que resulte dos títulos de propiedade, prevalecendo, en caso de discordancia entre estes e a realidade física, esta sobre aqueles.

3. Nos supostos de discrepancia sobre a propiedade dun terreo, parte del ou dos seus lindeiros, a superficie discutida considerarase pertencente por partes iguais ós discrepantes, ata que se resolva por acordo ou resolución xudicial. De non ser aplicable esta regra, a propiedade conceptuarase de litixiosa, asumindo o Concello da Coruña a representación dos dereitos e intereses desas titularidades para efectos da tramitación do expediente, ata que sexa dictada resolución definitiva polos tribunais ordinarios.

Base 5ª.-Predios que se van expropiar e a súa valoración.

1. A xunta de compensación será beneficiaria das expropiacións que realice o Concello da Coruña respecto das propiedades non incorporadas á xunta.

2. As expropiacións axustaranse ó procedemento xeral establecido na Lei de expropiación forzosa e no seu regulamento, pero os terreos valoraranse de acordo ós criterios establecidos pola lexislación estatal sobre réxime do solo e valoracións (Lei 6/1998, do 13 de abril) .

Base 6ª.-Extinción ou transformación de dereitos e cargas.

1. O feito de que existan cargas reais sobre algún dos predios incluídos na zona que se vai urbanizar non altera a súa valoración como predio achegado,

pero se son susceptibles de subrogación real, pasarán a grava-lo predio adxudicado ó propietario, converténdose, noutro caso, en crédito sobre o mesmo predio.

2. Existindo subrogación real do predio resultante con respecto ó achegado, as cargas e dereitos reais existentes sobre este que non foran cancelados, pero que resultasen compatibles co planeamento urbanístico, non se extinguirán e, neste caso, aínda que non se lles mencione no proxecto de compensación e adxudicación posterior dos predios resultantes, non serán obxecto de valoración e os titulares de tales dereitos serán adxudicatarios no mesmo concepto no que foran anteriormente nas parcelas gravadas, por aplicación do principio de subrogación real.

3. Cando non teña lugar a subrogación real, o acordo aprobatorio do proxecto de compensación producirá a extinción dos dereitos reais e cargas constituídas sobre o predio achegado, correndo a indemnización correspondente a cargo do propietario que o achegou co importe que se fixará no mencionado acordo.

4. Nos supostos de subrogación real, se existisen dereitos reais ou cargas que se estimen incompatibles co planeamento, o acordo aprobatorio do proxecto de compensación declarará a súa extinción e fixará a indemnización correspondente por conta do propietario respectivo.

5. Existindo subrogación real e compatibilidade co planeamento urbanístico, se a situación e características do novo predio fosen incompatibles coa subsistencia dos dereitos reais ou cargas que deberían recaer sobre elas, as persoas a que estes dereitos favoreceran poderán obte-la súa transformación nun dereito de crédito con garantía hipotecaria sobre o novo predio na contía en que a carga fose valorada. O rexistrador da Propiedade que aprecie tal incompatibilidade farao constar así no asento respectivo.

6. En defecto de acordo entre as partes interesadas, calquera delas poderá acudir ó xulgado competente da orde civil para obter unha resolución declarativa de compatibilidade ou incompatibilidade e, neste último caso, para fixa-la valoración da carga e a constitución da mencionada garantía hipotecaria.

7. Non obstante o disposto nos puntos 3 e 4, as indemnizacións pola extinción de servidumes prediais ou dereitos de arrendamento incompatibles co planeamento ou a súa execución, consideraranse gastos de urbanización, correspondéndolles ós propietarios en proporción ás súas respectivas cotas.

8. Para a valoración dos dereitos reais aplicarase o réxime establecido pola lexislación expropiatoria, e, senón, o do Imposto de Transmisións Patrimoniais.

Base 7ª.-Criterios de valoración de achegas de empresas urbanizadoras.

1. A valoración da achega de empresas urbanizadoras, que de se-lo caso, se incorporen á xunta

de compensación, efectuarase tendo en conta o custo do proxecto de urbanización ou das súas partidas que vaia financiar e/ou executar en relación co valor do solo da área. No momento da incorporación convirase coa xunta se esta cifra é definitiva ou se serán de aplicación revisións de prezos ou de estabilización de custos, aprobándose o acordo de incorporación pola asemblea xeral.

2. A participación da empresa diminuirá a dos membros da xunta, a excepción dos desconformes coa dita participación que, facendo consta-lo seu compromiso ante a xunta de compensación no prazo de quince días seguintes á comunicación do acordo ou convenio entre a xunta e a empresa, deberán satisface-los gastos de urbanización que lles corresponda proporcionalmente en efectivo metálico, contra certificación que acredite a execución das unidades de obra pertinentes.

Base 8ª.-Procedemento para contrata-las obras de urbanización.

1. A execución das obras de urbanización poderá realizarse, en todo ou en parte, por empresas incorporadas á xunta.

2. Noutro caso e en calquera suposto a execución será realizada pola empresa que determine o consello rector, seguindo o criterio establecido pola asemblea para a elección do contratista.

3. A contratación levarase a efecto por calquera das formas admitidas en dereito, é dicir, adxudicación directa, licitación ou concurso.

En todo caso garantirase a publicidade da oferta e o contido das condicións que rexen a licitación consultándose con, polo menos, tres empresas constructoras.

Base 9ª.-Prazos e forma de pago das cotas.

1. As cotas, ordinarias o extraordinarias, serán satisfeitas na forma prevista nos estatutos.

2. O pagamento deberá facerse en metálico, pero -mediante acordo da asemblea xeral- poderá facerse, en todo ou en parte, mediante a transmisión á xunta da propiedade de terreos incorporados ó sistema de compensación.

3. A transmisión en pleno dominio de terreos á xunta implica a correspondente diminución, para o transmitente, da súa cota de participación na xunta.

Base 10ª.-Expropiación por incumprimento de obrigacións.

1. Con independencia das expropiacións que procedan por falta de incorporación á xunta, aquelas procederán tamén por incumprimento dos membros incorporados das súas obrigas legais e estatutarias.

2. En particular son causas de expropiación:

a) O impago de cotas da xunta, unha vez expirado o prazo para efectúa-lo pago de achegas.

b) O reiterado incumprimento dalgunha das restantes obrigas, á parte o non-pago de cotas, requiríndose en tal caso, que o consello rector declare acreditado o incumprimento, logo de audiencia do interesado por prazo de 10 días.

c) Cantas resulten do incumprimento da lexislación urbanística e administrativa e leven implícita a sanción de expropiación.

3. O procedemento de expropiación será o regulado na Lei de expropiación forzosa. A Administración actuante, conforme a lexislación vixente poderá aplica-lo procedemento de taxación conxunta.

Base 11ª.-Transmisión de terreos pola xunta.

1. Con obxecto de poder facer fronte ós gastos de urbanización, na súa condición de fiduciaria dos propietarios, a xunta de compensación poderá transmitir algún dos inmobles achegados ou constituír gravames reais sobre eles logo de acordo da asemblea xeral respecto da oportunidade de facelo e do prezo.

2. O adquirente quedará subrogado en tódolos dereitos e obrigas que corresponderían ó titular primitivo do terreo en relación coa xunta de compensación minorándose proporcionalmente, a cota de participación dos anteriores asociados.

Base 12ª.-Afección real dos terreos.

1. Os terreos incorporados á xunta quedan afectos ó cumprimento das obrigas inherentes ó sistema, o que se fará constar no Rexistro da Propiedade.

2. Os predios resultantes quedarán afectos, con carga real, ó pagamento dos custos de execución do proxecto de compensación, na proporción que corresponda. Esta afectación quedará cancelada mediante certificación da xunta acreditativa de teren quedado canceladas as súas obrigas para con ela e unha vez recepcionadas as obras polo concello, conforme o establecido no art. 178 do Regulamento de xestión urbanística.

Base 13ª.-Valoración dos predios resultantes.

1. Toda a superficie que, de conformidade ó planeamento, sexa susceptible de propiedade privada, aínda que non sexa edificable, deberá ser obxecto de adxudicación ós propietarios incorporados á xunta no proxecto de compensación. Os terreos libres das parcelas adxudicaranse xunto coa superficie edificable delas.

2. Os terreos susceptibles de aproveitamento privado adxudicables ós membros da xunta, serán valorados conforme o valor básico de repercusión establecido para efectos catastrais e coas correccións, cando proceda, derivadas da situación e características de cada parcela, determinadas na forma que sinale a normativa sobre fixación de valores catastrais.

Se o valor básico de repercusión non estivese fixado pola Administración tributaria de acordo ás determinacións do plan en execución, calcularase coas mesmas regras que se utilizan para a súa fixación pola citada Administración tributaria.

Base 14ª.-Regras para a adxudicación dos predios resultantes.

1. Os propietarios incorporados á xunta de compensación, o concello, de se-lo caso e, se procedese, as empresas urbanizadoras teñen dereito á adxudicación en propiedade dos predios resultantes. O dereito dos socios será o correspondente á súa cota de participación, tendo en conta os criterios establecidos para o efecto na LSG e RXU.

2. Cando a escasa contía dos dereitos dalgúns propietarios non permita que se lles adxudiquen predios independentes a todos eles, as parcelas resultantes adxudicaranse por partes iguais. Se a contía do dereito dalgún propietario non alcanzase o 15 por 100 da parcela mínima edificable, a adxudicación poderá substituírse por unha indemnización en metálico.

3. Non poderán adxudicarse como predios independentes as superficies inferiores á parcela mínima edificable, ou que non reúnan a configuración e características adecuadas para a súa edificación conforme o planeamento.

Base 15ª.-Regras para a distribución de beneficios e perdas.

Correspóndelle á asemblea xeral ordinaria, con motivo da aprobación das contas anuais e á vista da conta de resultados, acordar-lo traspaso de beneficios ó exercicio seguinte ou a súa distribución entre os membros proporcionalmente ás cotas de participación.

En caso de perdas, a asemblea acordará a repercusión proporcional entre os membros fixando as cotas extraordinarias.

Base 16ª.-Proxecto de compensación.

1. De acordo cos criterios establecidos nestas bases, a xunta formulará un proxecto de compensación que conterá as seguintes determinacións:

a) Descrición das propiedades antigas, segundo os títulos achegados, coas correccións procedentes e, en defecto de títulos, segundo planos. Expresaranse as cargas e gravames, condicións e demais dereitos que lles afecten; identificación do respectivo propietario e a súa cota de participación e o criterio utilizado para calculala.

b) Descrición dos predios resultantes, titulares a quen se lles adxudiquen, incluso ó Concello da Coruña como titular do 10% de aproveitamento, e concepto en que o foran. Expresarase respecto de cada predio: a antiga á que correspondan o dereito que dá lugar á adxudicación; as cargas e gravames, condicións, substitucións e demais dereitos que o afecten, por non ser incompatibles co planeamento; o aproveitamento urbanístico que a cada predio corresponda.

c) Localización dos terreos dotacionais de cesión obrigatoria.

d) Superficies de parcelas que a propia xunta se reserve, se é o caso, para transmitilas directamente,

co fin de sufraga-los gastos previstos de urbanización.

e) Compensacións en metálico, se fosen procedentes por diferencias de adxudicación.

f) Contía da participación de cada un dos predios adxudicados nos custos de urbanización, ó que quedan aquelas gravadas con carga real.

2. Unha vez aprobado definitivamente o proxecto de compensación, o concello procederá a outorgar escritura pública ou que se expedirá certificación coas solemnidades e requisitos legais e co contido esixido polo artigo 113 do Regulamento de xestión urbanística. A escritura pública ou documento administrativo será inscrito no Rexistro da Propiedade.

3. Este acordo de aprobación definitiva producirá a transmisión ó concello, en pleno dominio e libre de cargas, de tódolos terreos que sexan de cesión obrigatoria e gratuíta, segundo o plan que se executa. O concello poderá ocupar de maneira inmediata os terreos destinados a equipamento, situados no ámbito do polígono e afectalos efectivamente ós usos previstos no mesmo.

Base 17ª.-Execución das obras de urbanización.

1. En cumprimento das obrigas legalmente establecidas, a xunta de compensación executará a totalidade das obras de urbanización correspondentes ó seu ámbito, de acordo coas previsións do proxecto de urbanización debidamente aprobado.

Base 18ª.-Conservación da urbanización.

1. A xunta de compensación conservará ó seu cargo as obras de urbanización ata o momento da súa recepción definitiva por parte do Concello da Coruña, repercutindo os seus custos entre os propietarios de parcelas, en función da súa cota de participación na xunta, excepto os servicios que poidan ser medidos por contador ou aforo que o serán en proporción ó consumo e gasto habido.

2. Isto non obstante, o Concello da Coruña poderá recibir provisionalmente a urbanización, na súa totalidade ou en parte, e impoñer ós particulares que realicen obras de construcción de inmobles as cautelas necesarias ou os avais precisos para garanti-la conservación ou reposición das obras realizadas.

3. O non-pagamento das cotas de conservación dará dereito á xunta de compensación a solicitar do concello o seu cobro en vía de prema administrativa.

4. As obras de urbanización serán recibidas definitivamente polo Concello da Coruña despois do transcurso do prazo dun ano, contado a partir da data da recepción provisional.

Base 19ª.-Disposición adicional.

A aprobación, de se-lo caso, destas bases e proxecto de compensación no seu día, non implican renuncia dos dereitos que se deriven dos convenios, alegacións e/ou recursos que todos ou algún dos propietarios de terreos afectados polo ámbito teñan recoñecidos ou se lles recoñezan.