Estando vacantes 13 postos de traballo do corpo administrativo da Xunta de Galicia (grupo C), escala técnica auxiliar de informática, nos servicios dependentes das consellerías de Pesca, Marisqueo e Acuicultura, Política Territorial, Obras Públicas e Vivenda, Educación e Ordenación Universitaria, Medio Ambiente, Familia e Promoción do Emprego, Muller e Xuventude, Sanidade e Servicios Sociais, Xustiza, Interior e Relacións Laborais, e sendo urxente a súa cobertura por razón das necesidades do servicio, apreciada pola Comisión de Persoal da Xunta de Galicia, en sesión celebrada o 20 de xullo de 2000, unha vez emitido o preceptivo informe previsto no artigo 7.1º da Lei 4/1988, de 26 de maio, da función pública de Galicia, esta consellería, no uso das facultades conferidas polo artigo 13 da dita lei, dispón

a cobertura dos postos de traballo, de acordo coas seguintes

BASES:

Primeira.-Obxecto.

A finalidade desta convocatoria de probas selectivas é a cobertura de 13 postos do corpo administrativo da Xunta de Galicia (grupo C), escala técnica auxiliar de informática, vacantes nos servicios centrais dependentes das consellerías de Pesca, Marisqueo e Acuicultura, Política Territorial, Obras Públicas e Vivenda, Educación e Ordenación Universitaria, Medio Ambiente, Familia e Promoción do Emprego, Muller e Xuventude, Sanidade e Servicios Sociais, Xustiza, Interior e Relacións Laborais, mediante o nomeamento de persoal interino previsto no artigo 7 da Lei 4/1988, da función pública de Galicia, que cesarán nos seus postos cando a súas prazas sexan cubertas por funcionarios de carreira.

Segunda.-Condicións dos aspirantes.

Para ser admitidos á realización das probas selectivas, os aspirantes deberán reuni-los seguintes requisitos:

a) Ser español.

b) Ter cumpridos os dezaoito anos de idade.

c) Non estar separado mediante expediente disciplinario do servicio de calquera Administración pública nin estar inhabilitado para o exercicio de funcións públicas.

d) Estar en posesión do título, ou acreditar de modo fidedigno ser:

-Bacharelato superior, formación profesional de segundo grao ou equivalente.

e) Non padecer enfermidade, nin estar afectado por limitación física ou psíquica que sexa incompatible co desempeño das correspondentes funcións.

Os requisitos sinalados deberán posuírse na data en que remate o prazo de presentación de solicitudes.

Terceira.-Probas.

A selección constará das seguintes probas:

Primeiro exercicio: contestar por escrito a un cuestionario de corenta preguntas que será o resultante do sorteo entre dous cuestionarios elaborados previamente polo tribunal, sobre o temario descrito no anexo I. Cada pregunta constará de catro respostas posibles.

Este exercicio cualificarase de 0 a 20 puntos e terá unha duración máxima de 40 minutos, sendo necesario para superalo obter unha puntuación mínima de 10 puntos. Corresponderalle ó tribunal determina-lo número de respostas correctas esixidas para alcanza-la puntuación mínima, tendo en conta que por cada tres respostas incorrectas descontarase unha correcta.

-Segundo exercicio: consistirá de dúas probas:

a) Primeira proba: consistirá na resolución dun determinado suposto, elixido por sorteo de entre dous propostos polo tribunal, mediante a oportuna codificación nalgún dos contornos visuais que figuren no temario.

b) Segunda proba: consistirá na realización dunha serie de actuacións de operacións sobre contornos Unix e/ou Windows e /ou redes locais, que será a resultante do sorteo entre dúas propostas do tribunal.

Cada unha das anteriores probas terá unha duración máxima de 2 horas e cualificarase tanto a primeira como a segunda, de 0 a 15 puntos, sendo necesario para superalas obter unha puntuación mínima de 7,5 puntos en cada unha de elas, correspondéndolle ó tribunal determina-lo nivel de coñecementos esixidos para acada-la puntuación mínima.

Terceiro exercicio: de carácter eliminatorio, escrito. Traducción dun texto técnico sobre tecnoloxías da información do idioma inglés para o galego, elixido por sorteo de entre dous propostos polo tribunal.

O tempo máximo para a realización do exercicio será dunha hora.

Este exercicio cualificarase como apto ou non apto, sendo necesario para superalo obte-lo resultado de apto, correspondéndolle ó tribunal determina-lo nivel de coñecementos esixidos para acada-lo resultado de apto.

O presidente de cada tribunal adoptará as medidas oportunas para garantir que os exercicios que se realicen en forma escrita sexan corrixidos sen que se coñeza a identidade dos aspirantes, utilizando para iso os impresos adecuados.

A puntuación final das probas virá dada pola suma das puntuacións obtidas polo aspirante no 1º e 2º exercicio. De producirse empate de puntuación entre varios aspirantes resolverase a favor do aspirante que obtivera a maior puntuación no segundo exercicio e despois no primeiro. De persisti-lo empate, resolverase a favor da primeira letra do primeiro apelido e de ser igual polo segundo, a partir da

letra resultante do sorteo que tivo lugar o día 15 de marzo de 2000 (DOG nº 59, do 24 de marzo).

O tribunal non poderá aprobar nin declarar que superaron as pruebas selectivas un número superior de aspirantes ó de prazas convocadas.

Cos aspirantes que superando os distintos exercicios, non figuren na proposta de nomeamento remitida polo tribunal, elaborarase, se é o caso, unha lista na que figurarán pola orde de puntuación recollida na base terceira.

A citada lista será utilizada no suposto de que no futuro se produzan vacantes e outras situacións previstas regulamentariamente e a súa cobertura, por persoal interino, sexa urxente e necesaria.

Estas listas terán vixencia ata o momento no que se leven a efecto novos procesos selectivos.

Para a realización do segundo e seguintes exercicios, os aspirantes serán convocados polo tribunal, cunha antelación mínima de 48 horas á data de celebración deles, mediante un anuncio que se exporá no mesmo sitio de celebración do exercicio anterior e por aqueloutros medios que o tribunal considere oportunos.

Á realización dos exercicios os aspirantes deberán ir provistos do DNI ou documento fidedigno acreditativo da súa identidade, ó xuizo do tribunal.

Cuarta.-Solicitudes.

1. As persoas que desexen participar nesta convocatoria deberán presentar instancia segundo o modelo que figura como anexo II á presente orde, no rexistro xeral da Consellería da Presidencia e Administración Pública, no das súas delegacións provinciais, oficinas comarcais da Xunta de Galicia, ou por calquera dos medios previstos no artigo 38.4º da Lei de réxime xurídico das administracións públicas e do procedemento administrativo común, no prazo de 20 días naturais, contados a partir do seguinte ó da publicación da presente orde no Diario Oficial de Galicia. Coa instancia deberá xuntarse fotocopia do DNI e xustificante de ter aboados os dereitos de exame, expedido pola entidade bancaria correspondente.

2. Como requisito necesario para participar nestas probas, deberase aboar previamente en concepto de dereitos de exame o importe de 5.640 ptas. E, de se-lo caso, os gastos de transferencia correspondentes utilizando para iso o impreso de autoliquidación sinalado no anexo III. O dito impreso seralles facilitado ós interesados no rexistro xeral da Consellería da Presidencia e Administración Pública e nos das súas delegacións provinciais, debendo cubrirse cos códigos que figuran no referido anexo III.

Estarán exentos do pagamento das taxas por dereitos de inscrición os que posúan unha discapacidade igual ou superior ó 33%, circunstancia que deberá ser acreditada documentalmente xunto coa instancia, presentando copia cotexada da cualificación da minusvalidez. A falta de cotexo será causa de exclusión.

Quinta.-Admisión de solicitantes.

A Dirección Xeral da Función Pública elaborará unha relación de aspirantes admitidos e excluídos,

que será publicada nos taboleiros de anuncios da Consellería da Presidencia e Administración Pública, nos das súas delegacións provinciais, nas oficinas comarcais da Xunta de Galicia e na Delegación Territorial da Consellería de Pesca, Marisqueo e Acuicultura en Vigo e poderase formular contra ela reclamación no prazo de dez días a partir do seguinte ó da publicación; transcorrido o dito prazo a Dirección Xeral da Función Pública publicará no Diario Oficial de Galicia as listas definitivas de admitidos e excluídos.

Por medio de anuncio no Diario Oficial de Galicia convocaranse os aspirantes admitidos á realización do primeiro exercicio, e indicarase o día, hora e lugar de realización.

Sexta.-Tribunal.

O tribunal encargado de efectua-la selección, que estará constituído por un número impar de membros, non inferior a cinco, debendo designarse o mesmo número de membros suplentes, será nomeado pola Consellería da Presidencia e Administración Pública un representante dos funcionarios da Comunidade Autónoma proposto polas organizacións sindicais presentes na Mesa Sectorial de Funcionarios. A súa composición farase pública por medio do correspondente anuncio no Diario Oficial de Galicia.

Para os efectos do disposto no artigo 26.2º do Decreto 299/1990, do 24 de maio, o tribunal ten a categoría terceira.

O tribunal poderá nomear asesores especialistas que lle presten a súa colaboración na realización das probas, que deberá comunicar á Dirección Xeral da Función Pública.

Sétima.-Resolución.

No prazo dun mes a partir da finalización das probas o tribunal cualificador elevará ó conselleiro da Presidencia e Administración Pública a proposta dos aspirantes que superaran as probas, que será publicada no DOG e a partir da dita publicación os aspirantes seleccionados disporán do prazo de 10 días naturais para presentar na Dirección Xeral da Función Pública os documentos que a seguir se relacionan:

a) Fotocopia cotexada do DNI.

b) Declaración xurada ou promesa de que non foi separado por medio de expediente disciplinario do servicio de calquera Administración pública e de que non foi inhabilitado para o exercicio das funcións públicas.

c) Fotocopia cotexada do título requirido na convocatoria.

d) Certificado médico oficial acreditativo de que non padece enfermidade e, de se-lo caso de estar afectado por algunha limitación física ou psíquica, certificado expedido polo órgano competente acreditativo de que tal limitación é compatible co desempeño das correspondentes funcións.

Oitava.-Nomeamento.

Entregada e comprobada a documentación os aspirantes seleccionados serán nomeados interinos do

grupo C, escala técnica auxiliar de informática, sección programador por orde do conselleiro da Presidencia e Administración Pública, que será publicada no DOG.

Os aspirantes que no prazo establecido na base anterior non presenten a documentación ou o fagan de maneira incompleta, perderán tódolos seus dereitos, salvo nos casos de forza maior.

Novena.-Toma de posesión.

A toma de posesión realizarase no prazo de 5 días a partir do día seguinte ó da publicación no DOG da orde do nomeamento do conselleiro da Presidencia e Administración Pública.

Santiago de Compostela, 12 de setembro de 2000.

Jaime Pita Varela

Conselleiro da Presidencia e Administración Pública

ANEXO I

GRUPO C: ESCALA TÉCNICA AUXILIAR DE INFORMÁTICA

1. Principios e funcionamento dos ordenadores. Arquitectura e compoñentes.

2. Sistemas operativos. MS-DOS, Windows, Unix. Comandos básicos de administración. Realización de copias de seguridade.

3. Estructuras da información. Ficheiros. Sistemas de xestión de bases de datos. SQL.

4. Linguaxes de programación. Tipos de linguaxes. Codificación estructurada e orientada a obxecto. Contornos visuais de desenvolvemento. C,C++, Visual Basic. Linguaxes de Internet: HTML, Java, linguaxes de Script.

5. Técnicas de proba do software. Xogos de ensaio.

6. Seguridade informática. Autentificación, integridade, confidencialidade. Virus.

7. Redes de comunicacións. Infraestructuras básicas. Redes locais. Topoloxías. Elementos de interconexión de redes. Concentradores, conmutadores, encamiñadores, pontes e pasarelas. Tipos de cableados.

8. Configuración de redes Windows. Compartición de recursos en Windows 9X/NT.

9. Internet. Evolución e estado actual. Servicios baseados en Internet e os seus protocolos. Correo electrónico, a transferencia de ficheiros, a WEB, Telnet.

10. Ferramentas ofimáticas. Procesadores de textos, follas de cálculos, bases de datos de PC. MS Office.

11. Virus. Tipos. Medios preventivos. Programas antivirus.

12. Lexislación sobre protección de datos. Lei orgánica 15/1999, de protección de datos de carácter persoal. Real decreto 994/1999, de medidas de seguridade. A Axencia de Protección de Datos.

13. A función informática na Xunta de Galicia. Rede corporativa de comunicacións. Sistema de xestión de procedementos administrativos. Comisión de informática.

Instruccións para o/a interesado/a.

* Instruccións xerais.

-Escriba soamente á máquina ou con bolígrafo sobre superficie dura, empregando maiúsculas de tipo imprenta.-Asegúrese de que os datos resultan claramente lexibles.-Evite dobra-lo papel e realizar correccións, emendas ou riscadas.-Non escriba nos espacios reservados.-Non esqueza asina-lo impreso.-Non esqueza achega-lo impreso de autoliquidación de taxas debidamente cuberto e selado pola entidade bancaria.-Non esqueza xuntar fotocopia do seu DNI ou documentación acreditativa segundo a convocatoria.

-Non esqueza xuntar copia cotexada da cualificación da minusvalidez, de se-lo caso.

* Instruccións particulares.

1. Corpo. Consigne o texto e o código correspondente segundo a táboa seguinte:

01. Corpo superior de Administración da Xunta de Galicia (grupo A).

02. Corpo de xestión de Administración da Xunta de Galicia (grupo B).

03. Corpo administrativo da Xunta de Galicia (grupo C).

2. Escala. Consigne o texto da escala correspondente.

-Escala de sistemas e tecnoloxía da información.

-Escala de xestión de sistemas de informática.

-Escala técnica auxiliar de informática.