O Servicio Galego de Promoción da Igualdade do Home e da Muller, como organismo autónomo adscrito á Consellería de Familia, Promoción do Emprego, Muller e Xuventude, créase por Lei 3/1991, do 14 de xaneiro, tendo como obxectivo principal a promoción e adopción de medidas encamiñadas á consecución da igualdade efectiva das mulleres e dos homes, removendo os obstáculos que impidan a participación e a integración da muller na vida social, cultural, educativa, económica e política de Galicia.
O artigo 3 do citado texto legal determina as funcións que desenvolve o dito servicio para o cumprimento de tales obxectivos e, entre elas, a de realizar e fomentar estudios sobre a situación das mulleres galegas, promover medidas e programas de igualdade de oportunidades entre homes e mulleres, incentiva-la participación das mulleres na vida política, económica, cultural, educativa e laboral, así como velar polo cumprimento dos convenios e tratados internacionais nos aspectos que afecten a materias de igualdade.
Neste sentido, as directrices da Unión Europea instan os estados membros a considera-la igualdade de oportunidades entre mulleres e homes como un principio democrático básico apoiado polos tratados internacionais. A incorporación da igualdade de oportunidades en tódolas políticas deixou de considerarse unha opción para converterse nunha esixencia na construcción da Europa da cidadanía. O principio de igualdade implica por unha parte a realización de medidas específicas de igualdade de oportunidades e por outra a consideración activa e explícita dos posibles efectos diferenciais que terán en homes e mulleres os programas e actuacións políticas que se van desenvolver por entidades e organismos.
Os estados membros a instancias da Unión Europea poñerán en marcha actuacións que promovan un reparto equilibrado das responsabilidades na vida política, económica, social, cultural, profesional e familiar.
Por todo isto considérase conveniente instituí-los premios Galicia en Feminino co obxecto de resaltar, coa dignidade que corresponda, as actuacións dirixidas a corrixir situacións de desigualdade por razón de sexo e de estimular e recoñece-la traxectoria e o esforzo de persoas ou entidades que desenvolvesen un labor relevante no ámbito da igualdade de oportunidades.
Polo que antecede,
DISPOÑO:
Artigo 1º
Crea-los premios Galicia en Feminino co fin de estimular e dinfundi-las actuacións que reflictan as
achegas das mulleres á sociedade, denuncien as situacións de discriminación por razón de sexo e promovan a transformación de estereotipos sexistas, así como recoñece-la traxectoria e o esforzo de persoas e entidades a favor da igualdade de oportunidades.
Artigo 2º
Aproba-las bases polas que se regulan os premios Galicia en Feminino, para cada ano, segundo anexo que se incorpora á seguinte resolución.
Disposición derradeira
Esta resolución entrará en vigor a partir do día seguinte ó da súa publicación no Diario Oficial de Galicia.
Santiago de Compostela, 14 de febreiro de 2001.
Aurora Montes Santa-Olalla
Directora xeral do Servicio Galego de Promoción
da Igualdade do Home e da Muller
ANEXO
Base 1.-Obxecto.
1. Convoca-los premios Galicia en Feminino co fin de estimular e dinfundi-las actuacións que reflictan as achegas das mulleres á sociedade, denuncien as situacións de discriminación por razón de sexo e promovan a transformación de estereotipos sexistas, así como recoñece-la traxectoria e o esforzo de persoas e entidades a favor da igualdade de oportunidades.
2. Os premios concederanse anualmente, referíndose ós méritos das candidaturas durante o ano anterior ó da súa concesión.
Base 2.-Modalidades dos premios.
As modalidades convocadas para os premios Galicia en Feminino son as seguintes:
a) Premio á participación laboral das mulleres.
b) Premio á difusión de imaxe non discriminatoria das mulleres.
c) Premio á participación artístico-cultural das mulleres.
d) Premio á participación social das mulleres.
e) Distinción honorífica pola defensa da igualdade.
Base 3.-Premio á participación laboral das mulleres.
1. Outorgarase a proxectos empresariais ou empresas promovidas por mulleres ou aquelas que melloren a situación das mulleres nos postos de traballo, implantadas en Galicia.
2. O xurado valorará as realizacións encamiñadas a posibilita-la inserción laboral por conta propia ou allea, a impulsa-la conciliación da vida profesional e familiar, a promove-la diversificación profesional e a favorece-lo acceso ós postos de decisión.
Base 4.-Premio á difusión dunha imaxe non discriminatoria das mulleres.
1. Poderán optar profesionais do xornalismo que desenvolvan o seu labor na Comunidade Autónoma de Galicia e programas continuados e puntuais de medios de comunicación e campañas publicitarias.
2. O xurado valorará a contribución á modificación de estereotipos tradicionais no tratamento da imaxe das mulleres nos distintos ámbitos, o uso dunha linguaxe non sexista, a divulgación dos logros e contribución das mulleres e o labor expreso na defensa da igualdade de oportunidades entre mulleres e homes.
Base 5.-Premio á participación artístico-cultural das mulleres.
1. Outorgarase a persoas individuais destacadas en actividades artístico-culturais ou a entidades e programas que promovan o protagonismo cultural das mulleres galegas.
2. O xurado valorará o labor realizado para resalta-las achegas das mulleres á arte e á cultura, dignificando os logros obtidos e visibilizando a importancia das actividades realizadas tradicionalmente por mulleres no ámbito cultural de Galicia.
Base 6.-Premio á participación social.
1. Poderán recibi-lo premio entidades que promovan a incorporación activa das mulleres a tódolos ámbitos de desenvolvemento social de Galicia.
2. O xurado valorará o traballo realizado para fomenta-la participación social das mulleres nun plano de igualdade atendendo especificamente á participación promovida naqueles ámbitos en que existen dificultades engadidas por tratarse dos colectivos máis desfavorecidos pola sociedade.
Base 7.-Distinción honorífica pola defensa da igualdade.
1. Outorgarase a persoas ou entidades que de xeito continuado e relevante contribúan á igualdade de oportunidades das mulleres galegas.
2. O xurado estudiará as propostas que estean avaladas por organismos públicos, asociacións de mulleres ou entidades de iniciativa social que se presentarán acompañadas dun resumo de motivacións e méritos que consideren que concorren na persoa ou entidade que propoñen.
Base 8.-Candidaturas.
1. Cada membro do xurado propoñerá candidaturas por cada modalidade de premio, acompañando unha memoria explicativa dos valores e méritos de cada unha delas, que permita ós membros do xurado valorar cada proposta.
2. O xurado elixirá os/as premiados/as, en cada modalidade, entre as candidaturas propostas polos seus membros, durante as súas sesións de traballo.
Base 9.-Carácter dos premios.
Os premios Galicia en Feminino outorgaranse con carácter exclusivamente honorífico e non xerarán dereito a ningún devengo nin efecto económico.
Base 10.-Xurado.
1. Para efectos de concesión dos premios constituirase un xurado, formado polos seguintes membros:
-A directora xeral do Servicio Galego de Promoción da Igualdade do Home e da Muller, que actuará como presidenta.
-Vocais: ata un número de seis vocais designados pola presidenta do xurado, por proposta do Pleno do Consello do Servicio Galego de Promoción da Igualdade do Home e da Muller, entre as organizacións representativas dos sectores ou ámbitos ós que van dirixidas cada unha das modalidades previstas na base 2.
-A secretaría será desempeñada pola secretaria do Servicio Galego de Promoción da Igualdade do Home e da Muller, que actuará con voz pero sen voto.
Base 11.-Procedemento de actuación do xurado.
O procedemento de actuación do xurado será o seguinte:
1. O xurado será convocado pola presidenta, podendo xuntarse cantas veces esta coide oportuno.
2. Para a válida constitución do órgano, para os efectos da celebración de sesións, deliberacións e toma de acordos, requirirase a presencia da presidenta e secretaria e a da metade, polo menos, dos seus membros.
3. O xurado adoptará os seus acordos por maioría de votos, dirimindo o voto de calidade da presidenta en caso de empate. A decisión do xurado será inapelable.
4. O xurado poderá declara-los premios e distincións desertos ou conceder premios compartidos.
5. Correspóndelle á secretaria do xurado levantar acta das sesións.
Base 12.-Entrega dos premios.
Os premios entregaranse no transcurso dun acto público, no mes de marzo de cada ano, con motivo da celebración do Día Internacional das Mulleres.