Dentro do programa de actividades de formación da Escola Galega de Administración Pública (EGAP) para o ano 2002, e conforme as funcións atribuídas pola Lei 4/1987, do 27 de maio, de creación da escola e pola Lei 10/1989, do 10 de xullo, de modificación da anterior, convócanse os cursos referidos no anexo I á presente resolución, que se desenvolverán de conformidade coas seguintes bases xerais e específicas:
Primeira.-Solicitudes.
1. O persoal que desexe participar nos cursos programados deberá solicitalo coa presentación da instancia e certificación que, como modelo oficial, se recollen nos anexos II e III desta resolución, respectivamente.
2. A falsidade ou ocultación de datos esenciais para a selección dos aspirantes dará lugar á exclusión automática do curso solicitado, así como á imposibilidade de participar noutro curso no presente ano.
3. O prazo de presentación de instancias rematará o día 5 de agosto de 2002.
4. As solicitudes, dirixidas ó director da EGAP, presentaranse no rexistro xeral da escola, sita na rúa de Madrid, 2-4, Polígono das Fontiñas, 15707 Santiago de Compostela, ou en calquera das dependencias recollidas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Segunda.-Acceso ás actividades.
Poderá participa-lo persoal que cumpra os requisitos específicos esixidos para cada curso no aludido anexo I.
Terceira.-Selección.
1. A selección efectuarase de acordo co previsto para cada curso no anexo I.
2. As relacións de seleccionados para participar nos cursos previstos publicaranse nos taboleiros de anuncios da EGAP e do Centro de Información Administrativa e Atención ó Cidadán e, se é o caso, nas delegacións provinciais da Consellería da Presidencia, Relacións Institucionais e Administración Pública.
Cuarta.-Certificacións de asistencia.
1. Outorgaráselle-lo correspondente certificado de asistencia ós alumnos que participen con regularidade e dedicación no desenvolvemento dos cursos.
Para os efectos de avalia-los coñecementos adquiridos polos alumnos, a EGAP poderá fixa-la realización das probas ou a presentación dos traballos cando o considere oportuno.
2. É obrigatoria a asistencia e puntualidade a tódalas sesións dos cursos. Toda ausencia deberá ser xustificada debidamente polo interesado. A falta de asistencia, aínda que sexa xustificada, a máis do 15% das horas lectivas programadas, impedirá a expedición da certificación anteriormente referida e dará lugar á baixa no curso coa perda de tódolos dereitos.
3. Para coñecemento e constancia no seu expediente, os participantes nos cursos deberán facilitar unha copia da certificación recibida ós servicios de persoal do centro directivo ó que estean adscritos.
Quinta.-Modificacións.
1. A EGAP poderá modifica-lo desenvolvemento e mailos contidos dos cursos anunciados co fin de adaptalos ás necesidades da Administración, así como ás distintas continxencias que poidan xurdir.
2. No suposto de que o número de seleccionados sexa inferior ó 50% das prazas convocadas, a EGAP reserva para si o dereito de suspende-la realización do curso de que se trate, utilizando para o efecto os medios de notificación ós interesados previstos na normativa vixente. O mesmo poderá suceder se durante a realización do curso se constata unha asistencia inferior a esa cifra.
Santiago de Compostela, 19 de xuño de 2002.
Domingo Bello Janeiro
Director da Escola Galega de Administración Pública
ANEXO I
Curso de portugués, nivel I (3 edicións)
1. Obxectivos.
Comprende-la información global e específica das menxases orais e escritas da lingua portuguesa relativas ás diversas situacións habituais da comunicación, emitidas directamente por falantes ou polos medios de comunicación.
Producir mensaxes orais e escritas no portugués, utilizando recursos lingüísticos e non lingüísticos, nas diversas situacións habituais da comunicación, para conseguir que esta sexa fluída e satisfactoria.
2. Destinatarios.
Persoal de Administración da Xunta de Galicia, da Administración local, das universidades de Galicia, do Parlamento, do Consello de Contas e do Valedor do Pobo. Terán preferencia os alumnos que obtiveron o certificado de asistencia no curso básico realizado o ano pasado. As prazas sobrantes cubriranse en función do resultado dunha proba de nivel de portugués, que deberá realiza-lo resto dos candidatos no día, hora e lugar que determine a escola (en Santiago de Compostela terá lugar na sede da
EGAP o día 2 de setembro ás 17 h). Dentro do nivel adecuado daráselles preferencia ós candidatos que acrediten a relación do posto de traballo co contido do curso.
3. Desenvolvemento.
3.1. Duración: 60 horas.
3.2. Lugar: EGAP, Ourense e Vigo.
3.3. Datas: de setembro a decembro.
3.4. Horarios: luns e mércores de 17 h a 19 h.
3.5. Prazas: 20.
4. Contido básico.
-Comunicación oral.
-Comunicación escrita.
-Actitudes.
Curso de portugués, nivel II (3 edicións)
1. Obxectivos.
Profundar na comprensión da información global e específica das menxases orais e escritas da lingua portuguesa relativas ás diversas situacións habituais da comunicación, emitidas directamente por falantes ou polos medios de comunicación.
Producir mensaxes orais e escritas no portugués, utilizando recursos lingüísticos e non lingüísticos, nas diversas situacións habituais da comunicación para conseguir que esta sexa fluída e satisfactoria.
2. Destinatarios.
Persoal de Administración da Xunta de Galicia, da Administración local, das universidades de Galicia, do Parlamento, do Consello de Contas e do Valedor do Pobo. Terán preferencia os alumnos que obtiveron o certificado de asistencia no curso básico realizado o ano pasado. As prazas sobrantes cubriranse en función do resultado dunha proba de nivel que deberán realiza-lo resto dos candidatos no día, hora e lugar que determine a escola (en Santiago de Compostela terá lugar na sede da EGAP o día 2 de setembro ás 18.30 h). Dentro do nivel adecuado daráselles preferencia ós candidatos que acrediten a relación do posto de traballo co contido do curso.
3. Desenvolvemento.
3.1. Duración: 60 horas.
3.2. Lugar: EGAP, Lugo e Vigo.
3.3. Datas: de setembro a decembro.
3.4. Horarios: luns e mércores de 19 h a 21 h, agás en Lugo que será de 17 a 19 h.
3.5. Prazas: 20.
4. Contido básico.
-Comunicación oral.
-Comunicación escrita.
-Actitudes.
SERVICIO GALEGO DE PROMOCIÓN DA IGUALDADE DO HOME
E DA MULLER
