A actual estructura orgánica da consellería, o gran volume da actividade administrativa, así como a experiencia acumulada ata a data, fan desexable que, dentro do respecto ós principios informadores da actuación administrativa e con suxeición á legalidade vixente, se deleguen nos directores xerais e delegados territoriais determinadas funcións, co fin de acadar unha meirande axilización administrativa en beneficio dos cidadáns e da propia Administración.

Na súa virtude, facendo uso das facultades que me confire o artigo 43.3º da Lei 1/1983, do 22 de febreiro, reguladora da Xunta e do seu presidente, e conforme o sinalado no artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, así como no 72.4º do texto refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro, e demais disposicións de xeral aplicación,

DISPOÑO:

Artigo 1º

Deléganse nos directores xerais as seguintes competencias:

a) Autorizar e dispoñe-los gastos con cargo ós créditos, do estado de gastos dos orzamentos xerais, asignados ós seus respectivos centros directivos (servicios orzamentarios), que non se atopen reservados á aprobación do Consello da Xunta de Galicia.

b) Recoñece-las obrigas de gasto e propoñe-los pagamentos correspondentes ós créditos indicados no anterior punto, coas limitacións que nel se expresan.

Artigo 2º

Deléganse nos delegados territoriais as seguintes competencias:

a) Autorizar e dispoñe-los gastos con cargo ás aplicacións orzamentarias do capítulo II do estado de gastos dos orzamentos xerais, ata o límite dos créditos que para tal fin sexan distribuídos polo titular da consellería, que non se atopen reservados á aprobación do Consello da Xunta de Galicia.

b) Recoñece-las obrigas de gasto e propoñe-los pagos correspondentes ós créditos sinalados no punto anterior, cos límites igualmente indicados.

Artigo 3º

As resolucións administrativas que se adopten facendo uso das delegacións contidas nesta orde farán constar expresamente esta circunstancia e consideraranse dictadas pola autoridade que as conferiu.

Artigo 4º

En calquera momento o conselleiro poderá reclama-lo exercicio das competencias que son delegadas por esta orde.

Artigo 5º

En caso de ausencia ou enfermidade, as atribucións contidas nesta orde quedarán delegadas, durante o tempo que persistan as devanditas causas, segundo se indica a continuación:

a) Cando se trate dos directores xerais, nos subdirectores xerais que deles dependan, sendo prevalente o máis antigo e, no suposto de igualdade, o de máis idade.

b) Tratándose dos delegados territoriais, nos secretarios territoriais respectivos.

Disposición derradeira

Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 30 de xaneiro de 2003.

Enrique César López Veiga

Conselleiro de Pesca e Asuntos Marítimos