Visto o expediente para outorgamento de autorización administrativa e aprobación do proxecto de execución da instalación eléctrica que a seguir se describe:

Solicitante: Hidroeléctrica de Silleda, S.L.

Enderezo social: avda. do Parque, 11-apdo. 6, 36540 Silleda.

Denominación: reforma C.T. Sierra-Laro.

Situación: Silleda.

Descricións técnicas: reforma do centro de transformación (160 kVA) situado en Sierra-Laro, Silleda consistente na instalación dunha cela de interruptor automático, dúas celas de liña motorizadas, unha cela de protección de transformador, unha cela de media tensión de barras, armario de planta, armario de telecontrol para un total de 3 posicións (1PE+2LE) e sistema de alimentación ininterrompida, todo no interior dun edificio prefabricado e modificación das conexións de servizo de media tensión ao citado C.T.

Cumpridos os trámites ordenados na Lei 54/1997, do 27 de novembro, do sector eléctrico, e no capítulo II, título VII do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, esta xefatura territorial resolve:

Autorizar e aprobar o proxecto de execución das devanditas instalacións, cuxas características se axustarán en todas as súas partes ás que figuran nel e ás condicións técnicas e de seguranza establecidas nos regulamentos de aplicación, e nos condicionados establecidos polos ministerios, organismos ou corporacións que constan no expediente.

Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras das instalacións autorizadas.

O prazo de posta en marcha da instalación, de acordo co artigo 131 do Real decreto 1955/2000, será de 12 meses a partir da recepción da presente resolución. Para os efectos da posible solicitude de prórroga, o peticionario deberá ter en conta o disposto no capítulo IV do Decreto 1775/1967, do 22 de xullo.

Contra a presente resolución poderase interpoñer recurso de alzada ante o conselleiro de Economía e Industria no prazo dun mes contado a partir de día seguinte ao da notificación desta resolución; tamén se poderá interpoñer calquera outro recurso que se considere pertinente.

Pontevedra, 4 de xuño de 2012

Ignacio Rial Santomé
Xefe territorial de Pontevedra