O Decreto 36/2010, do 11 de marzo, polo que se regula o procedemento para o nomeamento de persoal emérito no ámbito sanitario, regula o procedemento para o recoñecemento, con carácter excepcional, da condición de persoal emérito das institucións sanitarias do Servizo Galego de Saúde, así como os dereitos inherentes a este recoñecemento e o réxime de actividades deste persoal.

Preténdese así recoñecer o prestixio e a importancia profesional de profesionais sanitarios xubilados/as, así como facilitar, durante o período de tempo establecido e mentres as condicións de saúde llelo permitan, a existencia dunha relación activa coa institución sanitaria de adscrición, realizando funcións de consultoría, asesoría e formación, aproveitando desa forma a experiencia e os coñecementos adquiridos durante a vida laboral previa á súa xubilación.

Tanto o Decreto 36/2010 como a Orde do 27 de outubro de 2010 que o desenvolve establecen que, unha vez elaborada a proposta de nomeamento pola comisión de valoración creada para o efecto, a Xerencia do Servizo Galego de Saúde a elevará á persoa titular da consellería, quen procederá, se é o caso, ao nomeamento do persoal emérito.

A Orde do 27 de xullo de 2010 establece que o nomeamento de persoal emérito que se pode realizar anualmente será como máximo de seis persoas.

De acordo co anterior, en uso das facultades atribuídas polo Decreto 36/2010, do 11 de marzo, o Decreto 310/2009, do 28 de maio, polo que se establece a estrutura orgánica da Consellería de Sanidade, e o Decreto 311/2009, do 28 de maio, polo que se establece a estrutura orgánica dos servizos centrais do Servizo Galego de Saúde,

RESOLVO:

Nomear como persoal emérito as persoas que figuran no anexo da presente resolución por un período dun ano, que se poderá prorrogar por períodos de igual duración.

Contra a presente resolución cabe interponer recurso contencioso-administrativo ante os xulgados do contencioso-administrativo de Santiago de Compostela, de conformidade co establecido na Lei reguladora da xurisdición contencioso-administrativa, no prazo de dous meses contados a partir do día seguinte ao da publicación da presente resolución, sen prexuízo da interposición do recurso de reposición ante o mesmo órgano, conforme o establecido nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 21 de agosto de 2012

Rocío Mosquera Álvarez
Conselleira de Sanidade

ANEXO