As publicacións do Real decreto 289/2003, do 7 de marzo, sobre comercialización dos materiais forestais de reprodución e a do Real decreto 1220/2011, do 5 de setembro, polo que modifica o Real decreto 289/2003, incorporan á nosa lexislación nacional a Directiva 1999/105/CE do Consello, do 22 de decembro de 1999, sobre a comercialización dos materiais forestais de reprodución que refunde e actualiza toda a normativa anterior para o efecto.
No punto 1 do artigo 3 do Real decreto 289/2003, antes mencionado, establécese que para a produción de materiais forestais de reprodución destinados á comercialización, se utilizarán unicamente materiais de base autorizados.
O punto 2 do mesmo artigo di que os materiais de base só poderán obter a condición de autorizados se garanten as exixencias establecidas nos anexos II, III, IV ou V, segundo se trate da produción de materiais forestais de reprodución identificados, seleccionados, cualificados ou controlados, respectivamente, e se están referidos a unha unidade denominada unidade de admisión, que estará identificada mediante unha única referencia no correspondente rexistro.
Así mesmo, o punto 2 do artigo único do Real decreto 1220/2011 que modifica o punto 3 do artigo 3 do Real decreto 289/2003, indica que a autorización dos materiais de base para a produción dos materiais forestais de reprodución identificados, seleccionados, cualificados e controlados, a efectuará o órgano competente da respectiva comunidade autónoma, que en Galicia é a Consellería do Medio Rural e do Mar, quen comunicará os ditos materiais de base á Dirección Xeral de Desenvolvemento Rural e Política Forestal do Ministerio de Agricultura, Alimentación e Medio Ambiente.
O artigo 3 do Decreto 135/2004, do 17 de xuño, polo que se crea o Rexistro Galego de Materiais de Base para a Produción de Materiais Forestais de Reprodución, recolle que se deberá solicitar autorización dos materiais de base para a produción de materiais forestais de reprodución para a súa comercialización con destino á selvicultura, á Dirección Xeral de Montes, como órgano competente da Administración da comunidade autónoma nesta materia, quen resolverá de acordo co artigo 4 do mencionado decreto.
Segundo o artigo 1.3 do Decreto 135/2004, a Dirección Xeral de Montes procederá á inscrición do material de base autorizado no Rexistro Galego de Materiais de Base.
O artigo 13.1 do Decreto 46/2012, do 19 de xaneiro, polo que se establece a estrutura orgánica da Consellería do Medio Rural e do Mar, e do Fondo de Garantía Agrícola recolle as funcións da Secretaría Xeral do Medio Rural e Montes.
En consecuencia, realizada a comprobación do cumprimento dos requisitos mínimos para a autorización dos materiais de base destinados á produción de materiais de reprodución das categorías identificado, seleccionado e cualificado, conforme o disposto nos anexos II, III e IV, respectivamente, do Real decreto 289/2003, e de acordo co disposto na Lei 1/1983, do 22 de febreiro, reguladora da Xunta e da súa Presidencia e demais normativa aplicable, a Secretaría Xeral de Medio Rural e Montes, mediante a Resolución do 11 de xullo do 2012, procedeu á autorización de tres unidades de admisión da categoría «material identificado» de Quercus robur L.; dunha unidade de admisión da categoría «material seleccionado» de Pseudotsuga menziesii Franco.; dunha unidade de admisión da categoría «material seleccionado» de Quercus rubra L.; dunha unidade de admisión da categoría «material cualificado» de Prunus avium L. e de sete unidades de admisión da categoría «material cualificado» de Híbridos artificiais de Castanea sativa Mill. no territorio da Comunidade de Galicia que aparece relacionado no anexo desta orde, así como á súa inscrición no Rexistro Galego de Materiais de Base para a Produción de Materiais Forestais de Reprodución.
Santiago de Compostela, 16 de xullo de 2012
Tomás Fernández-Couto Juanas
Secretario xeral de Medio Rural e Montes