O Decreto 99/2012, do 16 de marzo, polo que se regulan os servizos sociais comunitarios e o seu financiamento, publicado no Diario Oficial de Galicia do 30 de marzo2, establece no seu artigo 43.1 que, unha vez finalizado o correspondente exercicio orzamentario e, en todo caso, co día límite do 5 de febreiro do exercicio inmediatamente posterior, todas as corporacións locais financiadas consonte o presente decreto deberán presentar ante o órgano de dirección da Administración xeral da Comunidade Autónoma de Galicia con atribucións en materia de servizos sociais comunitarios a xustificación e avaliación da execución do proxecto anual de servizos sociais comunitarios municipais, así como o proxecto anual de servizos sociais comunitarios municipais correspondente ao ano en curso. A esta data límite do 5 de febreiro tamén fai referencia o artigo 58.6 do dito Decreto 99/2012, do 16 de marzo, para a presentación, de maneira integrada coa documentación correspondente á xustificación e avaliación do proxecto anual de servizos sociais, da certificación do órgano competente da corporación local acreditativa do gasto realizado para o desenvolvemento do servizo de axuda no fogar para persoas en situación de dependencia, e demais datos que se lle requiran en relación coa xestión deste servizo.

A causa de problemas técnicos na actualización da aplicación informática a través da cal todas as corporacións locais teñen que elaborar necesariamente os formularios para a xustificación e avaliación da execución do proxecto anual de servizos sociais comunitarios municipais correspondente ao exercicio 2012, así como a presentación do proxecto anual de servizos sociais comunitarios municipais correspondente ao exercicio 2013, esta aplicación informática non puido estar dispoñible coa antelación suficiente para que as corporacións locais puidesen consignar nela os datos referentes ao financiamento dos servizos sociais comunitarios municipais dentro do prazo establecido nos artigos 43.1 e 58.6 do dito Decreto 99/2012, que remataba o 5 de febreiro de 2013, o que deu lugar á publicación dunha orde para a ampliación do devandito prazo no Diario Oficial de Galicia do pasado 1 de febreiro (DOG nº 23, do 1 de febreiro), a Orde do 28 de xaneiro de 2013 pola que se amplía o prazo para a xustificación e avaliación da execución do proxecto anual de servizos sociais comunitarios municipais correspondente ao exercicio 2012, así como para a presentación do proxecto anual de servizos sociais comunitarios municipais correspondente ao ano 2013, que ampliou o prazo ata o 5 de marzo de 2013.

Debido á persistencia dalgúns problemas técnicos na súa actualización, a dita aplicación informática aínda non está dispoñible, polo que, tendo en conta que o prazo ampliado está cerca de rematar, cómpre ampliar novamente o dito prazo de xustificación e avaliación da execución do proxecto anual de servizos sociais comunitarios municipais correspondente ao exercicio 2012, así como a presentación do proxecto anual de servizos sociais comunitarios municipais correspondente ao exercicio 2013, para os efectos de compensar estas deficiencias e de garantir que as corporacións locais poidan rexistrar adecuadamente nela os datos referentes ao financiamento dos servizos sociais comunitarios municipais dentro de prazo.

Por todo o anterior, de conformidade coa disposición derradeira segunda do Decreto 99/2012, do 16 de marzo, polo que se regulan os servizos sociais comunitarios e o seu financiamento, que faculta a persoa titular da consellería competente no sistema galego de servizos sociais para ditar, no ámbito das súas competencias, cantas disposicións sexan precisas para o desenvolvemento e aplicación do presente decreto, e en concreto para o desenvolvemento mediante orde dos aspectos procedementais relativos ao financiamento dos servizos sociais comunitarios das corporacións locais, e en uso das facultades que teño atribuídas pola Lei 1/1983, do 22 de febreiro, de normas reguladoras da Xunta e da súa Presidencia, desenvolvida polo Decreto 227/2012, do 2 de decembro, polo que se establece a estrutura orgánica da Xunta de Galicia, e o Decreto 109/2012, do 22 de marzo, polo que se establece a estrutura orgánica da Consellería de Traballo e Benestar,

DISPOÑO:

Artigo único. Amplíase o prazo para a presentación da xustificación e avaliación da execución do proxecto anual de servizos sociais comunitarios municipais correspondente ao exercicio 2012, así como para a presentación do proxecto anual de servizos sociais comunitarios municipais correspondente ao exercicio 2013, ata o día 27 de marzo de 2013, incluído.

Disposición derradeira única

Esta disposición entrará en vigor o mesmo día da súa publicación.

Santiago de Compostela, 27 de febreiro de 2013

Beatriz Mato Otero
Conselleira de Traballo e Benestar