Con data do 7 de febreiro de 2013, as universidades da Coruña, Santiago de Compostela e Vigo asinaron un acordo de resolución do consorcio do Parque Científico-Tecnolóxico Universitario de Galicia.
Con esta mesma data asinouse a escritura de resolución ante Inmaculada Espiñeira Soto, notaria do Ilustre Colexio de Galicia.
Para os efectos da necesaria publicidade e ao abeiro do artigo 6 da Lei 30/1992, do 26 de novembro, de réxime xurídico das administracións públicas e do procedemento administrativo común, procede a súa difusión pública e a publicación no Diario Oficial de Galicia (DOG).
Por todo o anterior, procede publicar o acordo de resolución do convenio de colaboración entre as tres universidades galegas para a creación do Parque Científico-Tecnolóxico Universitario de Galicia mediante consorcio, que figura como anexo a esta resolución.
Santiago de Compostela, 13 de febreiro de 2013
Juan José Casares Long
Reitor da Universidade de Santiago de Compostela
ANEXO
Acordo de resolución do convenio de colaboración entre a Universidade da Coruña, a Universidade de Santiago de Compostela e a Universidade de Vigo para a creación do Parque Científico-Tecnolóxico Universitario de Galicia
Santiago de Compostela, 7 de febreiro de 2013
Reunidos
Dunha parte, Xosé Luís Armesto Barbeito, reitor da Universidade da Coruña, cargo que desempeña en virtude do nomeamento efectuado segundo o Decreto 251/2011, do 29 de decembro (DOG nº 8, do 12 de xaneiro de 2012), no exercicio das competencias que lle outorga o artigo 20 de la Lei orgánica de universidades 6/2001, do 21 de decembro (BOE do 24 de decembro).
Doutra parte, Juan José Casares Long, reitor da Universidade de Santiago de Compostela, cargo que desempeña en virtude do nomeamento efectuado segundo o Decreto 99/2010, do 17 de xuño, da Xunta de Galicia (DOG nº 119, do 24 de xuño), no exercicio das competencias que lle outorga o artigo 20 da Lei orgánica de universidades 6/2001, do 21 de decembro (BOE do 24 de decembro) e no artigo 87 dos estatutos desta universidade, aprobados polo Decreto 28/2004, do 22 de xaneiro, da Xunta de Galicia (DOG nº 27, do 9 de febreiro).
Doutra parte, Salustiano Mato de la Iglesia, reitor da Universidade de Vigo, cargo que desempeña en virtude de nomeamento efectuado polo Decreto da Comunidade Autónoma de Galicia 90/2010, do 10 de xuño, publicado no DOG nº 114, do 17 de xuño, actuando no exercicio das competencias que lle outorga o artigo 20 da Lei orgánica de universidades 6/2001, do 21 de decembro, modificada pola Lei orgánica 4/2007, do 12 de abril, e o artigo 58 dos estatutos desta universidade, aprobados mediante o Decreto 7/2010, do 14 de xaneiro (DOG nº 21, do 2 de febreiro).
EXPOÑEN:
1. Que o 28 de decembro de 2001 as tres universidades públicas de Galicia asinaron un convenio para a creación do Parque Científico-Tecnolóxico Universitario de Galicia que se instrumenta mediante a creación dun consorcio ao abeiro do artigo 6.5 da Lei 30/1992, do 26 de novembro, de réxime xurídico das administracións públicas e do procedemento administrativo común, e se aprobaron na mesma data os estatutos do consorcio. Estes acordos eleváronse a escritura pública o 26 de febreiro de 2002 e foron publicados, pola Resolución do 11 de marzo de 2003 dos reitores das tres universidades galegas, no Diario Oficial de Galicia do 24 de marzo de 2003.
2. Que o convenio establecía na cláusula terceira que o obxecto consorcial sería a creación de infraestruturas e organización do Parque Científico-Tecnolóxico Universitario de Galicia coas finalidades descritas nos estatutos da entidade.
3. Que desde a sinatura do convenio non se realizaron as finalidades descritas nos estatutos da entidade.
4. Que a cláusula sétima do convenio dispón: «Será causa de resolución do convenio a non realización da súa finalidade, así como calquera outro incumprimento grave das cláusulas establecidas».
Tendo en conta as anteriores manifestacións, as partes
ACORDAN:
Resolver o convenio para a creación do Parque Científico-Tecnolóxico Universitario de Galicia, asinado o 28 de decembro de 2001 e, en consecuencia, proceder á extinción do Consorcio do Parque Científico-Tecnolóxico Universitario de Galicia.
En proba de conformidade e aceptación, asinan o presente acordo no lugar e na data indicados.
Juan José Casares Long |
Xosé Luís Armesto Barbeito |
Salustiano Mato de la Iglesia |
Reitor da Universidade de Santiago de Compostela |
Reitor da Universidade da Coruña |
Reitor da Universidade de Vigo |