O Pleno do Concello, na sesión do 31 de xaneiro de 2013, aprobou as bases da convocatoria do XXXI Premio de novela longa Blanco Amor, co seguinte contido literal:

«Réxime xurídico:

Esta convocatoria rexerase polo disposto na Lei 38/2003, xeral de subvencións, no Real decreto 887/2006, polo que se aproba o Regulamento xeral de subvencións, e polo resto de lexislación que lle resulte aplicable.

Consideracións xerais:

Primeira. O premio estará dotado con 12.020 euros, que se imputará á aplicación orzamentaria 05101/3301/48000 do orzamento de 2013.

Segunda. Poderán participar nel todos os autores e autoras, de calquera nacionalidade, que presenten unha ou varias obras escritas en lingua galega segundo a normativa oficial.

Terceira. As novelas terán unha extensión mínima de 150 folios DIN A-4 mecanografados ou escritos en ordenador (tamaño de fonte 12) a unha soa cara e con espazado de 1,5 ou de 75 folios mecanografados ou escritos en ordenador (tamaño de fonte 12) a dúas caras e a espazado de 1,5.

Cuarta. As obras presentadas terán que ser inéditas e non poderán ter sido premiadas na data de presentación en ningún outro certame ou premio. Este requisito deberá ser acreditado mediante declaración responsable asinada para o efecto.

No suposto de que se teña coñecemento do incumprimento deste requisito o xurado non admitirá o autor/a afectado.

No caso de que a obra presentada a este premio sexa, pola súa vez, premiada noutro premio ou certame de carácter literario, con carácter previo á resolución do xurado, o/a autor/a afectado/a deberá renunciar ao outro.

Quinta. De cada obra presentaranse cinco copias asinadas cun lema, en paquete sen remite dirixido á Concellaría de Cultura do Concello de Ferrol, praza de Armas, s/n, 15402 Ferrol, facendo constar no exterior «Para o XXXI Premio Blanco Amor». Nun sobre anexo, pechado e baixo o mesmo lema, indicaranse o nome e enderezo do autor ou autora, a declaración responsable a que se refire a cláusula cuarta destas bases, o seu teléfono e o enderezo electrónico.

Sexta. O prazo de admisión dos orixinais rematará o día 15 de xuño de 2013. O ditame do xurado darase a coñecer no mes de setembro de 2013.

Sétima. O xurado do premio, nomeado nesta convocatoria polo Concello de Ferrol, estará composto por cinco membros (presidente e catro vogais) de traxectoria acreditada no ámbito da cultura galega, e actuará como secretaria unha funcionaria do Negociado de Cultura do Concello de Ferrol, que actuará con voz e sen voto.

Oitava. O premio poderase declarar deserto de non existiren obras de calidade adecuada a xuízo do xurado. Neste caso, o importe destinarase a divulgar a obra de Eduardo Blanco Amor entre as escolas e os centros culturais de Galicia.

Novena. O xurado fará públicas as razóns en que se fundou para a concesión do premio.

Décima. A concesión do premio non implicará cesión dos dereitos de propiedade sobre a obra premiada. As obras non premiadas devolveranse aos/ás autores/as que o soliciten, no prazo dun mes, contando desde o día do veredicto. Os gastos de devolución serán por conta dos/as autores/as. No caso de non se recolleren dentro deste prazo, os orixinais serán destruídos.

Décimo primeira. A entrega do premio terá lugar no mes de novembro de 2013, nun acto público que se convocará oportunamente.

Décimo segunda. O feito de concorreren a este premio presupón que os/as autores/as aceptan as súas bases.

Décimo terceira. Nos aspectos non recollidos nestas bases decidirá a entidade organizadora».

Ferrol, 25 de xaneiro de 2013

José Manuel Rey Varela
Alcalde