O Pleno do Concello de Vigo, en sesión do 24 de febreiro de 2014, adoptou o seguinte acordo:

«Primeiro. Ter por desistida a Montserrat Bares Fernández do convenio urbanístico de planeamento para a ordenación da parcela existente en Tomás Alonso, nº 207, no lugar coñecido como O Castro Castriño (AOP-10), incorporado no procedemento de aprobación do PXOM de Vigo, dar por concluídas as actuacións seguidas para a súa sinatura e efectos e proceder ao seu arquivamento.

Segundo. Iniciar o procedemento para a redacción e informe dunha modificación puntual de planeamento xeral no ámbito definido no dito convenio urbanístico e suspender o procedemento de outorgamento de licenzas de parcelación de terreos, edificacións e demolicións no ámbito afectado polo prazo máximo dun ano, co fin de estudar a súa formación ou reforma, de conformidade co disposto no artigo 77.1 da Louga e proceder á publicación deste acordo no DOG e nun dos xornais de maior difusión da provincia.

Terceiro. Dar traslado do presente acordo á interesada, significándolle que pon fin á vía administrativa e contra o cal poderá interpoñer potestativamente recurso de reposición no prazo dun mes ou, alternativamente, recurso contencioso-administrativo ante o órgano xurisdicional competente, no prazo de dous meses, contado en ambos os casos a partir do día seguinte ao da súa notificación, ben que contra o punto dispositivo segundo unicamente poderá interpoñer recurso contencioso-administrativo no prazo de dous meses contado desde a súa publicación.»

De conformidade co disposto no artigo 77.1 da Louga, procédase á publicación deste acordo no Diario Oficial de Galicia e nun dos xornais de maior difusión da provincia.

Vigo, 5 de marzo de 2014

(Resolución do 8.2.2013)
Mª del Carmen Silva Rego
Vicepresidenta da Xerencia Municipal de Urbanismo