Conforme o establecido no artigo 15.1 da Lei 9/2007, do 13 de xuño, de subvencións de Galicia, e no artigo 22 da Orde do 8 de agosto de 2013, da Vicepresidencia e Consellería de Presidencia, Administracións Públicas e Xustiza, pola que se establecen as bases reguladoras e se convocan subvencións para a execución de infraestruturas de uso público destinadas aos concellos de Galicia, de forma individual e mediante o sistema de xestión compartida, cofinanciadas polo Fondo Europeo de Desenvolvemento Rexional (80 %), publicarase no Diario Oficial de Galicia a relación das concedidas con indicación das persoas beneficiarias e os importes das axudas concedidas.

Estes fondos Feder están incluídos dentro do programa operativo Feder 2007-2013, no seu eixe 5 de desenvolvemento sustentable local e urbano, tema prioritario 58, actuación 5, que ten como fin, entre outros, as axudas ás entidades locais para infraestruturas de uso público.

De acordo co anterior,

Resolvo:

Publicar no Diario Oficial de Galicia as axudas concedidas por Resolución do 13 de novembro de 2013, da Vicepresidencia e Consellería de Presidencia, Administracións Públicas e Xustiza, destinadas a subvencionar a execución de infraestruturas de uso público por parte dos concellos de Galicia, de forma individual e mediante o sistema de xestión compartida, cofinanciada con fondos Feder (80 %), cun importe total de 1.284.972,09 euros con cargo á aplicación orzamentaria 05.23.141A.760.3 correspondente aos orzamentos xerais da Comunidade Autónoma de Galicia para o ano 2013, nas contías e entidades beneficiarias que se relacionan no anexo desta resolución.

Santiago de Compostela, 14 de marzo de 2014

José Alberto Pazos Couñago
Director xeral de Administración Local

Anexo
Relación de axudas destinadas a subvencionar a execución de infraestruturas
de uso público por parte dos concellos de Galicia, cofinanciadas
con fondos Feder (80 %)