Mediante Acordo adoptado pola Xunta de Goberno local, en sesión extraordinaria que tivo lugar o día 23 de setembro de 2014, procedeuse, entre outras cuestións, á aprobación inicial da modificación puntual do Plan parcial do parque empresarial de Celanova, a cal sométese a información pública en cumprimento do establecido no artigo 11.1 do Real decreto lexislativo 2/2008, do 20 de xuño, polo que se aproba o texto refundido da Lei do solo, artigo 86.1.a), en relación co artigo 93.4 da Lei 9/2002, do 30 de decembro, de ordenación urbanística e protección do medio rural de Galicia, e, con carácter supletorio, o artigo 128 do Real decreto 2159/1978, do 23 de xuño, polo que se establece o Regulamento de planeamento urbanístico. A dita modificación puntual do Plan parcial do parque empresarial de Celanova non necesita de sometemento ao procedemento de avaliación ambiental estratéxica nin de sometemento ao procedemento de impacto ambiental.
O prazo de consultas e información pública será de dous meses a partir da publicación deste anuncio no Diario Oficial de Galicia. Durante o dito prazo o expediente e o documento definitivo de modificación puntual do Plan parcial do parque empresarial de Celanova porase de manifesto na Secretaría do Concello de Celanova, en horario de atención ao público, de luns a venres, das 9.00 ás 14.00 horas. No dito prazo, igualmente os interesados poderán formular as alegacións que teñan por conveniente para a defensa dos seus dereitos e intereses.
Así mesmo, faise públcio que, en aplicación do artigo 77.2 da Lei 9/2002, do 30 de decembro, de ordenación urbanística e protección do medio rural de Galicia, e, con carácter supletorio, do artigo 120.1 do Real decreto 2159/1978, do 23 de xuño, polo que se establece o Regulamento do planeamento urbanístico, se suspende o outorgamento de licenzas naqueles ámbitos do territorio obxecto do planeamento cuxas novas deteminacións supoñan a modificación da ordenación urbanística vixente. A duración da suspensión é de dous (2) anos e, en todo caso, extinguirase coa aprobación definitiva da modificación puntual do plan parcial. As devanditas áreas afectadas pola suspensión son as seguintes: polígonos 2 e 3 do ámbito territorial do parque empresarial.
Celanova, 13 de outubro de 2014
José Luis Ferro Iglesias
Alcalde