Con data do 23 de abril de 2015, a conselleira de Medio Ambiente, Territorio e Infraestruturas emitiu resolución de aprobación definitiva da delimitación da liña límite de edificación da estrada autonómica OU-154, no seu treito situado entre os puntos quilométricos 1+440 e 2+100, co seguinte contido:

«Antecedentes:

1. O 13 de xaneiro de 2015 asínase o informe da Área de Planificación e Programación para iniciar a tramitación do expediente de redución extraordinaria da liña límite de edificación, ao cal se fai referencia no encabezamento deste informe, segundo o previsto no artigo 41.3 da Lei 8/2013, do 28 de xuño, de estradas de Galicia.

2. Mediante Resolución do 15 de xaneiro de 2015, a dirección da Axencia Galega de Infraestruturas aprobou, ao abeiro do establecido no artigo 41.3 da Lei 8/2013, do 28 de xuño, de estradas de Galicia, con carácter provisorio a delimitación anterior, e resolveu tramitala segundo o procedemento establecido no artigo 85 do Regulamento xeral de estradas, aprobado por Real decreto 1812/1994, do 2 de setembro.

3. A delimitación provisoria foi sometida a información pública, polo prazo de trinta días hábiles, mediante Anuncio do 19 de xaneiro de 2015, publicado no Diario Oficial de Galicia núm. 26, do luns 9 de febreiro de 2015, e no taboleiro de anuncios do Concello de Piñor, a fin de que calquera persoa física ou xurídica formulase as alegacións que estimase pertinentes.

4. O expediente estivo exposto ao público en días e horas hábiles de oficina nos locais da Axencia Galega de Infraestruturas en Santiago de Compostela e na Casa do Concello de Piñor.

5. Mediante Informe do 25 de marzo de 2015, a Área de Planificación e Programación indicou que non se presentaron alegacións durante o período de información pública da delimitación provisoria e que tampouco foi emitido informe ningún ao respecto, por parte das entidades locais consultadas.

Consideracións legais:

A conselleira de Medio Ambiente, Territorio e Infraestruturas é competente para resolver o expediente de delimitación da liña límite de edificación previsto no artigo 41.3 da Lei 8/2013, do 28 de xuño, de estradas de Galicia, ao abeiro do indicado no artigo 85.4 do Regulamento xeral de estradas, aprobado polo Real decreto 1812/1994, do 2 de setembro, por analoxía coa estrutura da Administración xeral do Estado.

Visto todo o que antecede e, en particular, o informe de resposta da Área de Planificación e Programación,

RESOLVO:

Aprobar, ao abeiro do establecido no artigo 41.3 da Lei 8/2013, do 28 de xuño, de estradas de Galicia, con carácter definitivo, a delimitación da liña límite de edificación da estrada autonómica OU-154, no seu treito situado entre os puntos quilométricos 1+440 e 2+100, segundo o plano que se xunta, que supón as seguintes reducións, con respecto á establecida con carácter xeral na antedita lei:

1. Pola marxe dereita redúcese a liña límite de edificación de 15 metros.

a) A 13 metros desde o eixe da estrada, entre os puntos quilométricos 1+440 e 1+530.

b) A 8 metros desde o eixe da estrada, entre os puntos quilométricos 1+530 e 1+580.

c) A 11 metros desde o eixe da estrada, entre os puntos quilométricos 1+580 e 1+800.

d) a 8 metros desde o eixe da estrada, entre os puntos quilométricos 1+800 e 2+040.

2. Pola marxe esquerda redúcese a liña límite de edificación de 15 metros.

a) A 7,5 metros desde o eixe da estrada, entre os puntos quilométricos 1+510 e 1+570.

b) A 11 metros desde o eixe da estrada, entre os puntos quilométricos 1+570 e 1+660.

c) A 6 metros desde o eixe da estrada, entre os puntos quilométricos 1+660 e 1+840.

d) A 7 metros desde o eixe da estrada, entre os puntos quilométricos 1+840 e 2+040.

e) A 6,5 metros desde o eixe da estrada, entre los puntos quilométricos 2+040 e 2+100.

Contra esta resolución de aprobación, con carácter definitivo en vía administrativa, cabe interpoñer potestativamente o recurso de reposición ante o mesmo órgano que o ditou no prazo dun mes, contado a partir do día seguinte ao da súa publicación no Diario Oficial de Galicia, segundo establecen os artigos 116.1º e 117 da Lei 30/1992, do 26 de novembro.

Porén, poderase impugnar directamente o acto que se notifica ante a orde xurisdicional contencioso-administrativa (artigo 116.1º da Lei 30/1992, do 26 de novembro). Para tal efecto, poderase interpoñer recurso contencioso-administrativo, no prazo de dous meses contados desde o día seguinte ao desta publicación, ante o Tribunal Superior de Xustiza de Galicia.

No caso de que se interpoña o recurso de reposición, non se poderá interpoñer o recurso contencioso-administrativo ata que sexa resolto expresamente ou se teña producido a desestimación presunta do recurso de reposición interposto».

O que se fai público para o seu xeral coñecemento.

Santiago de Compostela, 24 de abril de 2015

Francisco Menéndez Iglesias
Director da Axencia Galega de Infraestruturas