Pola Resolución do 8 de outubro de 2015, da Secretaría Xeral da Igualdade (DOG núm. 194, do 9 de outubro), establecéronse as bases reguladoras e convocáronse as axudas e subvencións a entidades locais para a promoción da igualdade no ano 2015 que se desenvolverán a través dos seguintes programas:
a) Programa de fomento da conciliación da vida persoal, laboral e familiar.
b) Programa de prevención e tratamento integral da violencia de xénero.
c) Programa de apoio aos centros de información ás mulleres.
Segundo o artigo 15.3 da citada resolución, e de conformidade co establecido no artigo 59.6.b) da Lei 30/1992, do 26 de novembro, de réxime xurídico das administracións públicas e do procedemento administrativo común, a notificación individual das resolucións das axudas poderá ser substituída pola publicación no Diario Oficial de Galicia e na páxina web da Secretaría Xeral da Igualdade.
Unha vez rematada a fase de instrución das solicitudes recibidas na Secretaría Xeral da Igualdade, avaliadas as solicitudes pola comisión de valoración prevista no artigo 13 das bases reguladoras, vista a proposta de resolución formulada polo órgano instrutor e tendo en conta as dispoñibilidades orzamentarias,
RESOLVO:
Primeiro. Conceder as axudas e subvencións para o financiamento dos programas das entidades locais que se indican no anexo I, como consecuencia da aplicación dos criterios establecidos no artigo 14 das bases reguladoras, por un importe total de 3.963.851,30 € distribuídos nas aplicacións orzamentarias que se indican.
|
Aplicación |
Código de proxecto |
Importe |
|
05.11.312G.460.1 |
2015 00144 |
314.152,71 € |
|
Ejercicio 2015 05.11.313B.460.0 |
2015 00144 |
2.697.729,50 € |
|
Ejercicio 2016 05.11.313B.460.0 |
2015 00144 |
951.969,09 € |
|
TOTAL |
3.963.851,30 € |
|
Estas subvencións están cofinanciadas ao 80 % con fondos europeos no marco do programa operativo FSE Galicia 2014-2020. A partida orzamentaria 05.11.312G.460.1, destinada ao financiamento do Programa de fomento da conciliación, no obxectivo temático 8 «promover a sustentabilidade e a calidade no emprego e favorecer a mobilidade laboral», prioridade de investimento 8.4 «a igualdade entre homes e mulleres en todas as áreas, incluído o acceso ao emprego e á carreira profesional e a conciliación da vida laboral e a privada, así como a promoción do salario igualitario pola realización do mesmo traballo», obxectivo específico 8.4.2 «(Re) integrar no mercado laboral as persoas con dependentes ao seu cargo, a través de medidas de conciliación da vida persoal e laboral, e fomentar a igualdade de xénero»; e no caso da partida orzamentaria 05.11.313B.460.0, destinada ao financiamento dos outros dous programas, no obxectivo temático 9 «promover a inclusión social, loitar contra a pobreza e calquera forma de discriminación», prioridade de investimento 9.3 «a loita contra toda forma de discriminación e o fomento da igualdade de oportunidades», obxectivo específico 9.3.1 «aumentar a integración sociolaboral das persoas pertencentes a colectivos máis vulnerables, a través de actuacións que fomenten a igualdade de xénero e a conciliación da vida persoal e laboral, evitando pola súa vez a discriminación múltiple».
Segundo. Excluír e declarar desistidas as solicitudes que se relacionan no anexo II, con indicación da causa específica, por non cumpriren o requisito de emenda e/ou achega dos documentos preceptivos no prazo establecido segundo o disposto no artigo 12 das bases reguladoras, ou ben por non cumpriren os requisitos establecidos nas bases reguladoras.
Terceiro. De acordo co establecido no artigo 14.4 da convocatoria, o sistema empregado para a valoración das solicitudes nos diferentes programas foi o seguinte:
a) Para o Programa de fomento da conciliación da vida persoal, laboral e familiar e para o Programa de prevención e tratamento integral da violencia de xénero: a aquelas solicitudes que obtiveron maior puntuación correspóndelles a maior porcentaxe sobre o custo de persoal subvencionable; estableceuse un único tramo cunha porcentaxe do 100 % do gasto subvencionable e foron atendidas todas as solicitudes que cumpren cos requisitos.
b) Para o Programa de apoio aos centros de información ás mulleres establecéronse os seguintes tramos: a aquelas solicitudes que obtiveron unha puntuación superior a 65 correspóndelles o 100 %; ás solicitudes cunha puntuación entre 30 e 65 correspóndelles o 95 %; ás solicitudes cunha puntuación entre 25 e inferior a 30 correspóndelles o 90 % e ás solicitudes cunha puntuación inferior a 25 correspóndelles un 80 %. Foron atendidas todas as solicitudes presentadas que cumpren os requisitos.
Cuarto. De conformidade co artigo 19.2 das bases reguladoras, realizarase un primeiro pagamento do 75 % da contía da subvención concedida, en concepto de pagamento anticipado, que se fará efectivo unha vez realizada a notificación da resolución. No Programa de apoio aos CIM, a contía do anticipo non poderá ser superior ao importe da subvención imputada ao exercicio 2015, e se é o caso, o importe do anticipo reducirase ata o dito límite. O 25 % restante, ou a parte que corresponda, librarase logo da xustificación por parte das entidades beneficiarias do cumprimento da finalidade para a cal se concedeu a subvención e demais condicións exixidas nesta resolución.
Quinto. Informar as entidades beneficiarias de que a aceptación da subvención comunitaria implicará a súa aparición na lista pública de operacións cos nomes dos ou das beneficiarias, no suposto de seren entidades xurídicas, así como a outra información recollida no anexo XII do Regulamento (UE) 1303/2013, en relación co artigo 115.2 da mesma norma xurídica.
Sexto. A percepción das subvencións para as actuacións e actividades recollidas nos diferentes programas desta convocatoria son incompatibles con calquera outra axuda pública para a mesma actuación ou actividade.
Sétimo. A data límite de presentación da documentación xustificativa da actuación subvencionada, de acordo co artigo 18 das bases reguladoras para cada un dos programas, é a seguinte:
1. Programa de fomento da conciliación e Programa de prevención da violencia de xénero: o prazo para a presentación da xustificación das medidas ou actuacións subvencionadas ao abeiro destes programas finaliza o 30 de decembro de 2015.
2. Programa de apoio aos CIM: o prazo para a presentación da documentación xustificativa da actuación subvencionada finaliza o 30 de abril de 2016.
As medidas e actuacións correspondentes a estes programas xustificaranse a través das modalidades de custos simplificados previstas nos artigos 67.1 b) e d) do Regulamento (UE) 1303/2013 e no artigo 14.2 b) do Regulamento (UE) 1304/2013, no caso do Programa de apoio aos CIM segundo módulo ou custo unitario por hora efectivamente traballada dedicada á atención de mulleres en situación de especial vulnerabilidade. No caso dos outros dous programas, mediante custo simplificado a tipo fixo segundo os custos directos de persoal.
Oitavo. As entidades beneficiarias deberán cumprir as obrigas establecidas no artigo 20 das bases reguladoras, na súa relación cos artigos 10 e 11 da Lei 9/2007, do 13 de xuño, de subvencións de Galicia, e na demais normativa europea de aplicación. Entre elas:
–Manter de forma separada na contabilidade os ingresos da axuda percibida, así como os custos directos de persoal no suposto dos programas de fomento da conciliación e de prevención da violencia de xénero, e conservar toda a documentación relativa á subvención e ás persoas participantes ou usuarias durante un período de tres anos que se contará a partir do 31 de decembro seguinte á presentación destas contas perante a Comisión Europea. Esta data publicarase oportunamente no Diario Oficial de Galicia.
–Dar cumprimento á obriga de dar adecuada publicidade do carácter público do financiamento en todas as actuacións que deriven da execución do proxecto, en cumprimento do artigo 15.3 da Lei 9/2007, de subvencións de Galicia, e no anexo XII do Regulamento (UE) núm. 1303/2013, do Parlamento Europeo e do Consello. Así, en todo tipo de publicidade e información relativos á actuación e actividades subvencionadas terá que constar a condición de subvencionada pola Secretaría Xeral da Igualdade e polo Fondo Social Europeo 2014/2020.
En todo caso, nos espazos de atención ás usuarias e nas comunicacións contarán co emblema da Unión Europea e coa referencia ao Fondo Social Europeo, e nos lugares de realización da actuación informarase do apoio dos fondos a través dun cartel dun tamaño mínimo A3 nun lugar destacado e visible. Tamén se informará na páxina web, no caso de dispoñer dela, sobre o proxecto e a axuda financeira recibida da Unión Europea e sobre os obxectivos e resultados da operación financiada.
–Informar, se é o caso, as persoas destinatarias de que as actuacións en que participan están financiadas pola Xunta de Galicia (Secretaría Xeral da Igualdade) e polo FSE, así como dos obxectivos dos fondos. Os emblemas figurarán, como mínimo, nos partes de asistencia/participación, relacións e follas de seguimento, enquisas de avaliación ou certi-ficados de asistencia.
–Realizar as actuacións precisas para recoller a información suficiente relativa ao des-envolvemento das actuacións que permita dar cumprimento aos requisitos de información a través de indicadores de execución e resultados previstos no artigo 5 do Regulamento (UE) núm. 1304/2013 do Parlamento Europeo e do Consello, do 17 de decembro de 2013, relativo ao FSE. Neste sentido, na súa cobertura deberá respectarse o principio de integridade dos datos. Os datos de execución relativos ás entidades e ás persoas participantes cubriranse durante o desenvolvemento da actuación, e nas catro semanas seguintes á súa finalización deberán cubrirse os indicadores de resultado inmediato, que deberán facilitarse no período de xustificación da correspondente subvención consonte os modelos de follas de seguimento relacionadas para cada programa no artigo 18 desta convocatoria. Así mesmo, a Administración poderá requirir a actualización destes datos no prazo de seis meses desde que finalice esta actividade, coa finalidade de formalizar os indicadores de resultado a longo prazo descritos no dito regulamento.
–Facilitar toda a información requirida pola Secretaría Xeral da Igualdade, polos órganos verificadores que se establezan en aplicación dos artigos 72, 73 e 74 do Regulamento (UE) núm. 1303/2013 do Parlamento Europeo e do Consello, do 17 de decembro de 2013, así como pola Intervención Xeral da Comunidade Autónoma, o Tribunal de Contas, o Consello de Contas e outros órganos de control impostos pola normativa comunitaria no exercicio das súas funcións de fiscalización e control.
Noveno. De acordo co disposto no artigo 22 das bases reguladoras, o incumprimento das obrigas contidas nelas ou demais normativa aplicable, así como das condicións que, se é o caso, se establezan na resolución de concesión dará lugar á obriga de devolver total ou parcialmente as subvencións percibidas, así como os xuros de demora correspondentes. Para facer efectiva a devolución a que se refire o punto anterior, tramitarase o oportuno procedemento de reintegro, que se axustará ao previsto no título II da Lei 9/2007, do 13 de xuño, de subvencións de Galicia, e na súa normativa de desenvolvemento. No citado artigo 22 recóllese expresamente como causa de minoración da axuda recibida o incumprimento dalgunha das obrigas recollidas no artigo 20, números 2, 3 e 4.
Décimo. Esta resolución esgota a vía administrativa e contra ela poderá interpoñerse recurso potestativo de reposición, ante a secretaria xeral da Igualdade, no prazo dun mes contado desde o día seguinte ao desta publicación, de conformidade co establecido nos artigos 107, 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común, na súa redacción dada pola Lei 4/1999, do 13 de xaneiro, ou ben directamente recurso contencioso-administrativo, ante o Tribunal Superior de Xustiza de Galicia, no prazo de dous meses contados a partir do día seguinte ao desta publicación, de acordo co establecido nos artigos 10 e 46 da Lei 29/1998, do 13 de xullo, reguladora da xurisdición contencioso-administrativa.
Disposición derradeira
Esta resolución entrará en vigor o día seguinte ao da súa publicación no Diario Oficial de Galicia.
Santiago de Compostela, 22 de decembro de 2015
Susana López Abella
Secretaria xeral da Igualdade
