BDNS: (Identif.): 304799
De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo pode consultarse na Base de datos nacional de subvencións (http://www.pap.minhap.gob.es/bdnstrans/index):
Primeiro. Beneficiarios
a) Concellos, agrupacións de concellos ou mancomunidades da Comunidade Autónoma, así como as entidades resultantes da fusión de municipios a que se refire a Lei 5/1997, do 22 de xullo, de Administración local de Galicia.
b) Concellos que pertenzan a unha mesma zona sen constituír mancomunidade para estes efectos e acorden desenvolver programas conxuntos de actuación. Neste suposto, todos os concellos quedarán obrigados solidariamente ao cumprimento das obrigas que deriven da concesión da subvención.
Segundo. Obxecto
A finalidade das axudas é potenciar a información xuvenil a través dos servizos municipais de información xuvenil integrados na Rede galega de información xuvenil e fomentar as actividades de educación non formal dirixidas á mocidade e a participación xuvenil no ámbito local, especialmente aquelas que promovan o emprendemento e faciliten a empregabilidade das mozas e mozos.
Para estes efectos, poden ser obxecto de axuda os custos derivados do funcionamento dun servizo de información xuvenil e as actividades de dinamización da información que se leven a cabo desde este e, ademais, as actividades formativas e educativas, as relacionadas co espírito creativo e emprendedor da mocidade, os programas de información e asesoramento e, en xeral, os que faciliten a participación xuvenil en actividades de educación non formal e os relacionados co asociacionismo e liderado xuvenil, todos eles destinados á mocidade de idades comprendidas entre os 12 e os 35 anos.
Terceiro. Bases reguladoras e convocatoria
Orde do 21 de abril de 2016 pola que se aproban as bases que rexen as subvencións destinadas ás entidades locais de Galicia para a promoción da información xuvenil e para a realización de actividades dirixidas á mocidade, no ámbito da educación non formal e da participación durante o ano 2016, e se procede á súa convocatoria.
Cuarto. Contía
A contía global da convocatoria é de 592.754,14 euros.
No caso de solicitudes individuais, a contía máxima será de 3.000 euros. Para as conxuntas, a contía máxima será de 8.000 euros para o suposto de agrupación de dúas entidades locais e de 15.000 euros no caso de tres ou máis entidades agrupadas.
Quinto. Prazo de presentación de solicitudes
Un mes, que se contará a partir do día seguinte ao da publicación da orde de convocatoria no Diario Oficial de Galicia.
Sexto. Outros datos
O período subvencionable abrangue desde o 1 de xaneiro ata o 15 de outubro de 2016.
As entidades locais deberán participar no financiamento cun mínimo do 25 % do orzamento total.
A concesión da axuda tramítase en réxime de concorrencia competitiva. Requírese unha puntuación mínima de 40 puntos. No caso de que o crédito dispoñible resulte insuficiente para outorgarlles a subvención máxima a todas as entidades solicitantes que acaden os 40 puntos, a distribución efectuarase directamente proporcional á puntuación obtida.
Santiago de Compostela, 21 de abril de 2016
José Manuel Rey Varela
Conselleiro de Política Social