O titular do centro de ensinanzas artísticas elementais e profesionais de música Cantiga, de Ourense solicita a autorización de apertura e funcionamento do centro para impartir as ensinanzas elementais e profesionais de música.
Logo da tramitación do expediente de acordo co disposto no Decreto 253/1995, do 29 de setembro, de autorización a centros docentes privados para impartir ensinanzas artísticas, coa Orde do 5 de decembro de 1996, que o desenvolve e co Real decreto 303/2010, de 15 de marzo, que establece os requisitos mínimos dos centros que impartan ensinanzas artísticas reguladas na Lei orgánica 2/2006, do 3 de maio, de Educación, e por proposta da Dirección Xeral de Centros e Recursos Humanos,
DISPOÑO:
Primeiro. Autorizar a apertura e funcionamento do centro que se sinala a continuación:
Denominación xenérica: centro autorizado de ensinanzas artísticas elementais e profesionais de música.
Denominación específica: Cantiga.
Código do centro: 32020884.
Titular: Benigno Pérez Álvarez.
Domicilio: rúa Bedoya, 9.
Localidade: Ourense.
Código postal: 32004.
Concello: Ourense.
Provincia: Ourense.
Ensinanzas elementais de música: 100 postos escolares.
Ensinanzas profesionais de música: 180 postos escolares.
Segundo. Para a posta en funcionamento das ensinanzas que se autorizan, a Xefatura Territorial da Consellería de Cultura, Educación e Ordenación Universitaria de Ourense, logo do informe do Servizo Territorial de Inspección Educativa, aprobará expresamente a relación de persoal que impartirá docencia no devandito centro, así como o equipamento axeitado.
Terceiro. Esta orde dará lugar á correspondente inscrición no Rexistro de Centros da Consellería de Cultura, Educación e Ordenación Universitaria.
Cuarto. O centro queda obrigado ao cumprimento da normativa vixente e a solicitar a oportuna revisión cando teñan que modificarse calquera dos datos que se sinalan nesta orde.
Contra esta orde, que esgota a vía administrativa, as persoas interesadas poderán formular recurso potestativo de reposición ante esta consellería, no prazo dun mes, contado a partir do día seguinte ao da súa publicación no Diario Oficial de Galicia, segundo o disposto nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común ou ben, directamente, o recurso contencioso-administrativo no prazo de dous meses desde a mesma data, ante a Sala do Contencioso-Administrativo do Tribunal Superior de Xustiza de Galicia, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 10 de maio de 2016
Román Rodríguez González
Conselleiro de Cultura, Educación e Ordenación Universitaria