A Lei orgánica 15/1999, do 13 de decembro, de protección de datos de carácter persoal (BOE núm. 298, do 14 de decembro), regula o tratamento de datos de carácter persoal rexistrados en soportes físicos, que os faga susceptibles de tratamento, así como toda modalidade de uso posterior destes datos polos sectores público e privado. A finalidade desta regulación é garantir e protexer as liberdades públicas e os dereitos fundamentais das persoas físicas, e especialmente a súa honra e intimidade persoal e familiar.
No artigo 20 da dita lei disponse que a creación, modificación ou supresión dos ficheiros das administracións públicas só poderá facerse por medio de disposición xeral publicada no BOE ou diario oficial correspondente, e establece no seu punto segundo as indicacións concretas que deben constar nas disposicións de creación e modificación daqueles.
Para dar cumprimento a este precepto publicouse a Orde do 14 de outubro de 2011 pola que se regulan os ficheiros de datos de carácter persoal existentes no organismo autónomo Instituto Galego de Seguridade e Saúde Laboral. A evolución da actividade administrativa fai necesaria a modificación do ficheiro que se detalla no anexo da presente orde, o que obriga, conforme a citada Lei orgánica 15/1999, do 13 de decembro, de protección de datos de carácter persoal, á modificación da Orde do 14 de outubro de 2011.
En consecuencia, e en virtude das facultades que me confire o artigo 34.6 da Lei 1/1983, do 22 de febreiro, reguladora da Xunta e da súa Presidencia, modificada parcialmente pola Lei 11/1988, do 20 de outubro,
DISPOÑO:
Artigo 1. Obxecto
Mediante esta orde da Consellería de Economía, Emprego e Industria modifícase o ficheiro de datos de carácter persoal pertencente ao Instituto Galego de Seguridade e Saúde Laboral (Issga) «Relacións informativas coa cidadanía e entidades», segundo se especifica no anexo.
Artigo 2. Contido
A información exixida no artigo 20.2 da Lei orgánica 15/1999, do 13 de decembro, de protección de datos de carácter persoal, e no artigo 54 do seu regulamento asociado, o Real decreto 1720/2007, do 21 de decembro, para as disposicións de creación de ficheiros, está contida no anexo desta orde.
Artigo 3. Finalidade e uso dos ficheiros
Os datos de carácter persoal, incluídos no ficheiro do Instituto Galego de Seguridade e Saúde Laboral modificado por esta orde, só serán utilizados para os fins expresamente previstos e declarados no anexo e polo persoal debidamente autorizado.
Artigo 4. Cesión de datos
Os datos só poderán ser cedidos nos supostos expresamente previstos pola lei e nos declarados no anexo. No suposto de cesión de datos ás administracións públicas haberá que aterse ao disposto na normativa vixente respecto a esta materia.
Artigo 5. Órgano responsable dos ficheiros
A responsabilidade sobre o ficheiro modificado por esta orde correspóndelle ao Instituto Galego de Seguridade e Saúde Laboral.
Artigo 6. Nivel de protección e medidas de seguridade
O ficheiro modificado por esta orde está clasificado atendendo ao disposto no artigo 80 e seguintes do Real decreto 1720/2007, do 21 de decembro. No anexo I aparece a clasificación (nivel básico, medio ou alto) do dito ficheiro.
A persoa titular do órgano responsable deste ficheiro adoptará as medidas técnicas, de xestión e organización que sexan necesarias para asegurar a confidencialidade e integridade dos datos, así como as conducentes a facer efectivas as garantías, obrigas e dereitos recoñecidos na Lei orgánica 15/1999 e nas súas normas de desenvolvemento.
Disposición derradeira
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 22 de maio de 2017
Francisco José Conde López
Conselleiro de Economía, Emprego e Industria
ANEXO
Modificación dun ficheiro responsabilidade do Instituto Galego de Seguridade e Saúde Laboral
Denominación do ficheiro |
Relacións informativas coa cidadanía e entidades. |
Descrición da súa finalidade e usos previstos |
Xestión das relacións informativas coa cidadanía e entidades. |
Colectivos sobre os cales se pretende obter datos ou que resulten obrigados a subministralos |
Cidadanía e residentes e quen exerza a representación de entidades que manteñen relacións informativas co Issga. |
Procedemento de recollida de datos |
Formularios en papel e electrónicos. |
Procedencia dos datos |
A propia persoa interesada ou quen exerza a súa representación legal. Entidades privadas. |
Estrutura básica do ficheiro Tipos de datos de carácter persoal (Categorías de datos) |
Datos especialmente protexidos: saúde. Datos de carácter identificativo: DNI/NIF, nome e apelidos, teléfono, teléfono móbil, enderezo, enderezo electrónico, sinatura. Núm. SS/Mutualidade. Datos de carácter persoal. Datos económicos, financeiros e de seguros. Datos de circunstancias sociais. Datos académicos e profesionais. Datos de detalle de emprego. |
Sistema de tratamento |
Mixto. |
Comunicacións ou cesións de datos |
Consellería de Sanidade da Xunta de Galicia e Servizo Galego de Saúde (Sergas) para a facturación a terceiros no marco do Programa de detección de terceiros obrigados ao pagamento na asistencia sanitaria dispensada no Servizo Público de Saúde. |
Transferencias internacionais de datos a terceiros países |
Non están previstas. |
Órgano responsable do ficheiro |
Instituto Galego de Seguridade e Saúde Laboral. |
Servizos ou unidades ante os cales poden exercer os dereitos de acceso, rectificación, cancelación e oposición |
Instituto Galego de Seguridade e Saúde Laboral. Casa da Parra. Praza da Quintana, s/n. 15704 Santiago de Compostela. |
Nivel do ficheiro |
Alto. |