Mediante a Orde do 30 de decembro de 2016 reguláronse os criterios de repartición e establecéronse as bases reguladoras e a convocatoria de subvencións da liña en concorrencia non competitiva e da liña en concorrencia competitiva do Fondo de Compensación Ambiental para o ano 2017, de forma individual e mediante o sistema de xestión compartida, destinadas a entidades locais de Galicia (DOG núm. 14, do 20 de xaneiro).
Esta orde tramitouse como expediente anticipado de gasto de acordo coa Orde da Consellería de Economía e Facenda do 11 de febreiro de 1998, sobre tramitación anticipada de expedientes de gasto, modificada polas ordes da mesma consellería do 27 de novembro de 2000 e do 25 de outubro de 2001, e co establecido no Proxecto de lei de orzamentos xerais da Comunidade Autónoma, aprobado polo Consello da Xunta na súa reunión do 2 de decembro de 2016, na cal se acordou a súa remisión ao Parlamento de Galicia para a súa tramitación.
A orde pola que se regulan os criterios de repartición do Fondo de Compensación Ambiental, logo da modificación realizada a través da Orde do 22 de xuño de 2017 (DOG núm. 119, do 23 de xuño), destina un total de 2.680.487,69 € ao financiamento de subvencións en concorrencia competitiva.
Ao terse producido unha transferencia de crédito á aplicación que financia esta liña de subvencións, co fin de poder amparar un maior número de solicitudes presentadas estímase conveniente ampliar a dotación orzamentaria consignada para a liña en concorrencia competitiva, a través do suposto previsto no artigo 30.2 do Decreto 11/2009, do 8 de xaneiro e nos artigos 2.1.b) e 37 da Orde do 30 de decembro de 2016.
De conformidade cos devanditos preceptos regulamentarios, o órgano concedente debe publicar a ampliación de crédito nos mesmos medios que a convocatoria, sen que tal publicidade implique a apertura de prazo para presentar novas solicitudes nin o inicio dun novo cómputo de prazo para resolver.
En consecuencia co exposto, de acordo coa Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental; co Decreto 72/2013, do 25 de abril, polo que se establece a estrutura orgánica da Vicepresidencia e da Consellería de Presidencia, Administracións Públicas e Xustiza; coa Lei 9/2007, do 13 de xuño, de subvencións de Galicia, co Decreto 11/2009, do 8 de xaneiro, polo que se aproba o regulamento da Lei de subvencións, e co disposto na Orde do 30 de decembro de 2016 pola que se regulan os criterios de repartición e se establecen as bases reguladoras e a convocatoria de subvencións da liña en concorrencia non competitiva e da liña en concorrencia competitiva do Fondo de Compensación Ambiental para o ano 2017, de forma individual e mediante o sistema de xestión compartida, modificada pola Orde do 22 de xuño de 2017,
Dispoño:
Artigo único
1. Amplíase a dotación orzamentaria destinada a financiar a liña en concorrencia competitiva das subvencións do Fondo de Compensación Ambiental para o ano 2017, que se establece no artigo 2.a) e no artigo 13 da Orde do 30 de decembro de 2016 pola que se regulan os criterios de repartición e se establecen as bases reguladoras e a convocatoria de subvencións da liña en concorrencia non competitiva e da liña en concorrencia competitiva do Fondo de Compensación Ambiental para o ano 2017, de forma individual e mediante o sistema de xestión compartida.
2. O incremento da dotación será de 13.502,04 € con cargo á aplicación orzamentaria 05.23.141A.461.0 e de 501.760,41 € con cargo á aplicación orzamentaria 05.23.141A.761.0, ambas as dúas consignadas no estado de gastos dos orzamentos xerais da Comunidade Autónoma de Galicia para o ano 2017.
A contía máxima das subvencións que se concedan na liña en concorrencia competitiva do Fondo de Compensación Ambiental para o ano 2017 queda así establecida en 3.195.750,14 €, coa seguinte distribución por aplicación orzamentaria:
Aplicación orzamentaria |
Crédito actual |
Ampliación |
Crédito total |
05.23.141A.461.0 |
664.771,66 |
13.502,04 |
678.273,70 |
05.23.141A.761.0 |
2.015.716,03 |
501.760,41 |
2.517.476,44 |
Total |
2.680.487,69 |
515.262,45 |
3.195.750,14 |
3. Esta ampliación de crédito non afecta o prazo establecido no artigo 19.6 da Orde do 30 de decembro de 2016 para a presentación de solicitudes nin o inicio dun novo cómputo do prazo para resolver.
Disposición derradeira
Esta orde entrará en vigor o día da súa publicación no Diario Oficial de Galicia.
Santiago de Compostela, 1 de agosto de 2017
Alfonso Rueda Valenzuela
Vicepresidente e conselleiro de Presidencia, Administracións Públicas e Xustiza