A teor do previsto no artigo 9.4 da Lei 8/2013, do 28 de xuño, de estradas de Galicia, os cambios de titularidade das estradas ou treitos delas, cando non se trate de travesías urbanas ou treitos delas que estean incluídos no inventario de travesías da súa Administración titular, deberán ser aprobados por decreto da Xunta de Galicia, por proposta da consellería competente en materia de estradas e logo do acordo entre as administracións afectadas.
Por outra parte, a citada Lei de estradas dispón no artigo 9.7 que os cambios de titularidade poderán abranguer estradas, treitos delas, elementos funcionais e/ou espazos da zona de dominio público adxacente.
O Concello de Oleiros solicita á Consellería de Infraestruturas e Vivenda o cambio de titularidade do treito situado entre o p.q. 0+000 ata o límite do solo urbano de Santa Cruz, que identifica como p.q. 4+300 da estrada AC-173.
A Axencia Galega de Infraestruturas, de acordo co informe emitido polos servizos competentes, formulou a proposta favorable á transferencia de titularidade do treito da estrada AC-173 Perillo (rotonda de Sta. Cristina)-Mera (paseo Marítimo) comprendido entre os pp.qq. 0+000 (rotonda de Sta. Cristina) e 4+460 (intersección coa rúa Río Seixo), cunha lonxitude de 4,46 km, a prol do Concello de Oleiros.
Por outra banda, o treito da estrada autonómica que non se transfire e que segue pertencendo á Rede autonómica de estradas de Galicia pasará a denominarse: AC-173 O Porto de Santa Cruz (rúa Río Seixo)-Mera (paseo Marítimo).
De conformidade co anteriormente exposto, por proposta da conselleira de Infraestruturas e Vivenda, logo de deliberación do Consello da Xunta de Galicia, na súa reunión do día vinte e oito de xullo de dous mil dezasete,
DISPOÑO:
Artigo 1
Apróbase o cambio de titularidade a prol do Concello de Oleiros:
– Treito da estrada AC-173 Perillo (rotonda de Sta. Cristina)-Mera (paseo Marítimo) comprendido entre os pp.qq. 0+000 (rotonda de Sta. Cristina) e 4+460 (intersección coa rúa Río Seixo), cunha lonxitude de 4,46 km.
O treito da estrada autonómica que non se transfire e que segue pertencendo á Rede autonómica de estradas de Galicia pasará a denominarse: AC-173 O Porto de Santa Cruz (rúa Río Seixo)-Mera (paseo Marítimo).
Artigo 2
En aplicación dos números 4 e 6 do artigo 10 da Lei 8/2013, do 28 de xuño, de estradas de Galicia, o Concello de Oleiros deberá modificar o seu catálogo de estradas para incluír o cambio de titularidade a que se refire o presente decreto.
Artigo 3
De acordo co establecido no artigo 9.6 da Lei 8/2013, do 28 de xuño, de estradas de Galicia, o cambio de titularidade será efectivo o día seguinte ao da publicación deste decreto no Diario Oficial de Galicia. A entrega dos bens formalizarase no prazo dos dous meses seguintes a esta publicación mediante a sinatura da correspondente acta de entrega.
Artigo 4
Corresponderanlle ao Concello de Oleiros, a partir da formalización da entrega, todas as actividades de xestión, mantemento, conservación e explotación das vías, así como o exercicio das funcións de disciplina viaria e calquera outra que puidese corresponderlle como nova Administración titular das estradas.
Disposición derradeira
O presente decreto producirá efectos desde o día seguinte ao da súa publicación no Diario Oficial de Galicia.
Santiago de Compostela, vinte e oito de xullo de dous mil dezasete
Alberto Núñez Feijóo
Presidente
Ethel Mª Vázquez Mourelle
Conselleira de Infraestruturas e Vivenda
