Para os efectos previstos no artigo 54 da Lei 7/2013, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o día 14 de xullo de 2017, en relación ao deslindamento parcial entre as comunidades de montes veciñais en man común de Camposancos e da Guarda, no concello da Guarda, ao respecto da estrema común dos seus montes.

Antecedentes de feito:

Primeiro. A Lei 7/2012, do 28 de xuño, de montes de Galicia (DOG número 140, do 23 de xullo) na súa disposición derradeira segunda modifica o artigo 25 da Lei 13/1989, do 10 de outubro, de montes veciñais en man común, e elimina a obriga da Administración forestal de proceder ao deslindamento e sinalización dos montes veciñais. Por tanto, esta competencia corresponde ás comunidades propietarias consonte os artigos 53 e 54 da Lei de montes de Galicia.

Segundo. Con data do 14.9.2016, as CMVMC de Camposancos e A Guarda comunican ao Xurado Provincial de Clasificación de Montes Veciñais en Man Común o acordo no linde entre ambas as dúas comunidades. A documentación que consta no expediente consonte ao artigo 53 da Lei 7/2012 é a seguinte: acto de conciliación no Xulgado de Paz da Guarda, certificados de aprobación en asemblea xeral de ambas as dúas comunidades e cartografía dixital.

Terceiro. Con data do 6.3.2017, o xefe da Sección de Topografía informa, entre outras cuestións, do seguinte «Na nova documentación recibida recórtase o deslindamento facéndoo coincidir cos límites do antigo deslindamento de utilidade pública número 480 denominado Santa Trega. Este antigo deslindamento ten as seguintes cabidas:

Superficie total: 136,97 ha.

Superficie dos encravados: 2,88 ha.

Superficie forestal: 134:09 ha.

Despois de aplicar o deslindamento parcial presentado sobre o antigo deslindamento de UP, as cabidas deste quedarían así:

Na CMVMC da Guarda:

Superficie total: 56,38 ha.

Superficie dos encravados: 0,46 ha (parte do encravado D).

Superficie forestal: 55,92 ha.

Na CMVMC de Camposancos:

Superficie total: 80,59 ha.

Superficie dos encravados: 2,42 ha (encravados A, B, C e o resto do encravado D).

Superficie forestal: 78,17 ha >.

Con data do 23.5.2017 o Servizo de Montes require as CMVMC de Camposancos e da Guarda para que acheguen un informe de validación gráfica alternativa da Dirección Xeral de Catastro; en xuño de 2017 as comunidades atenden o requirimento efectuado polo Servizo de Montes.

Cuarto. A liña poligonal que determina o deslindamento de mutuo acordo entre os montes veciñais en man común de Camposancos e A Guarda, divide o monte de utilidade pública número 480 denominado Santa Trega (deslindado e non marcado), y está formada polos seguintes puntos:

Puntos	Descrición	UTM ETRS89-H29 Coordenada X	UTM ETRS89-H29 Coordenada Y
1	Intersección coa parcela catastral 36023A2500671	511.231,00	4.638.416,00
2	Pico do Facho	510.696,80	4.637.633,64
3	Encravado C (Piñeiral da Santa)	510.712,30	4.637.555,50
4	Encravado D (Santuario de Santa Trega)	510.717,23	4.637.529,97
5	Cruz da Irmandade do Clamor	510.726,63	4.637.782,26
6	Encravado C (Santuario de Santa Tegra)	510.706,52	4.637.436,22
7	Cruz do Pico de San Francisco	510.672,72	4.637.358,84
8	Intersección coa parcela catastral 36023A02400998	510.271,00	4.637.199,00

Consideracións xurídicas:

Primeira. A Lei 7/2012, do 28 de xuño, de montes de Galicia, regula nos artigos 52 e 54 o procedemento de deslindamento de montes veciñais en man común e establece, entre outras, a obriga de publicar a resolución do Xurado no Diario Oficial de Galicia.

Segunda. Da documentación fornecida polas comunidades e do informe técnico do Servizo de Montes desta xefatura territorial, conclúese que a avinza entre as CMVMC de Camposancos e a da Guarda é congruente coas respectivas resolucións de clasificación e coas estremas nelas descritas.

Revisada a liña de deslindamento presentada, a documentación achegada e o informe técnico do Servizo de Montes da Xefatura Territorial da Consellería do Medio Rural de Pontevedra, este xurado, en atención ao disposto nos artigos 53, 54 e na disposición transitoria décimo cuarta da Lei 7/2013, de montes de Galicia, por unanimidade,

ACORDA:

Primeiro. Aprobar o deslindamento parcial realizado entre as CMVMC de Camposancos e da Guarda, respecto do seu linde común, nos termos indicados no antecedente de feito cuarto e de acordo cos planos topográficos achegados e validados mediante informe técnico do Servizo de Montes.

Segundo. Notificar este acordo ás comunidades propietarias afectadas e publicalo no Diario Oficial de Galicia para dar cumprimento ao disposto na Lei 7/2012, do 28 de xuño, de montes de Galicia.

Contra a presente resolución, que pon fin á vía administrativa, poderase interpoñer recurso de reposición con carácter potestativo ante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo ante o Xulgado do Contencioso-Administrativo de Pontevedra no prazo de dous meses contados desde o día seguinte ao da súa publicación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas e cos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Pontevedra, 15 de setembro de 2017

Antonio Crespo Iglesias
Presidente do Xurado Provincial de Clasificación de Montes
Veciñais en Man Común de Pontevedra