Descargar PDF Galego | Castellano| Português

DOG - Xunta de Galicia -

Diario Oficial de Galicia
DOG Núm. 28 Xoves, 8 de febreiro de 2018 Páx. 9310

VI. Anuncios

b) Administración local

Concello de San Cibrao das Viñas

ANUNCIO de aprobación definitiva do plan especial de infraestruturas e dotacións do polígono industrial de San Cibrao das Viñas.

Mediante acordo do Pleno municipal, en sesión extraordinaria que tivo lugar o día 21 de decembro de 2017, aprobouse definitivamente o Plan especial de infraestruturas e dotacións do polígono industrial de San Cibrao das Viñas, o que se publica para os efectos dos artigos 82 e 88 da Lei 2/2016, do 10 de febreiro, do solo de Galicia, e nos artigos 199 e 208 do seu regulamento, transcribíndose literalmente o seu contido:

Por secretaría, de orde do Sr. alcalde, procedeuse a dar lectura á proposta da Alcaldía, con data do 15 de decembro de 2017, presentada en relación con este asunto, transcribíndose deseguido de xeito literal o seu contido:

«Visto que aprobada definitivamente pola Consellería de Medio Ambiente a modificación puntual do Plan xeral de ordenación municipal de San Cibrao das Viñas, no ámbito do polígono industrial David Ferrer Garrido, procede proseguir a tramitación da aprobación do Plan especial de infraestruturas e dotacións do polígono industrial de San Cibra das Viñas, todo iso de conformidade co artigo 75.1.d) da Lei 2/2016, do 10 de febreiro, do solo de Galicia.

Visto que con data do 29 de decembro de 2016 se aprobou provisionalmente o plan especial, mediante acordo adoptado polo Pleno da Corporación.

Visto que posteriormente, con data do 10 de marzo de 2017 se adoptou acordo de corrección de erros materiais existentes en dous planos do documento.

Visto que constan no expediente os informes sectoriais solicitados ás administracións e organismos afectados, e que se emitiron informes por parte dos servizos xurídicos en relación coas alegacións presentadas e os informes, a conformidade do plan coa lexislación vixente, así como coa calidade técnica da ordenación proxectada.

Visto o informe-proposta de Secretaría con data do 14 de decembro de 2017 e de conformidade co disposto nos artigos 75.4 da Lei 2/2016, do 10 de febreiro, do solo de Galicia, co artigo 186.4 do seu regulamento e co artigo 22.2.c), da Lei 7/1985, do 2 de abril, reguladora das bases do réxime local, esta Alcaldía, propón ao Pleno da Corporación a adopción dos seguintes

ACORDOS:

Primeiro. Aprobar definitivamente o Plan especial de infraestruturas e dotacións do polígono industrial de San Cibrao das Viñas redactado polo equipo técnico IDOM, coas modificacións resultantes da corrección dos erros materiais detectados no seu momento.

Segundo. Publicar a aprobación definitiva no Diario Oficial de Galicia, para os efectos do establecido no artigo 82 da Lei 2/2016, do 10 de febreiro, do solo de Galicia. Esta publicación deberá realizarse no prazo dun mes desde á adopción da aprobación definitiva.

Igualmente, xunto á publicación deste acordo, publicarase a indicación das medidas adoptadas para o seguimento dos efectos no ambiente da aplicación do plan e a referencia ao enderezo electrónico no que figurará o contido íntegro do plan a disposición do público.

Terceiro. Comunicar o acordo de aprobación definitiva, en virtude do artigo 88 da Lei 2/2016, do 10 de febreiro, do solo de Galicia, á consellería competente en materia de urbanismo, para a súa inscrición no Rexistro de Plan Urbanístico de Galicia, achegando un exemplar en soporte dixital, debidamente diligenciado.

Cuarto. Notificar individualmente a aprobación definitiva do plan especial a todas as persoas titulares catastrais dos terreos afectados ás que xa se lles notificou a aprobación inicial deste, de conformidade co artigo 186.4 do Regulamento da Lei 2/2016, do 10 de febreiro, do solo de Galicia, aprobado por Decreto 143/2016, do 22 de setembro».

O Sr. alcalde informa aos asistentes que se trata de levar a cabo a aprobación definitiva do Plan especial de infraestruturas e dotacións do polígono industrial de San Cibrao das Viñas, engadindo que anteriormente xa foi aprobado provisionalmente polo pleno, e posteriormente se aprobou unha corrección de erros, contando, ademais, cos informes sectoriais pertinentes, e con todos os informes preceptivos favorables, seguíndose todos os trámites legais establecidos, polo cal o grupo de goberno votará a favor desta aprobación.

Non houbo intervencións na quenda aberta para tal efecto polo Sr. alcalde, polo cal este procedeu a someter directamente a votación ordinaria por proposta da alcaldía, resultando esta aprobada, tal e como figura redactada, por maioría de nove (9) votos a favor dos concelleiros/as do grupo do PP, e dous votos (2) votos de abstención dos concelleiros/as do grupo do PS de G-PSOE, sendo once (11) os concelleiros/as que legalmente forman a corporación municipal».

Así mesmo, estará á disposición dos interesados na sede electrónica deste concello. O contido íntegro do documento aprobado pódese consultar en: http://sancibrao.sedelectronica.es no punto de transparencia -> 7. Urbanismo -> 7.1 Planeamento -> Plan especial, ou directamente no enlace http://sancibrao.sedelectronica.es/transparency/575597ce-ac2d-4c58-9ef1-9b6391c7d9df/.

Contra o presente acordo, en aplicación do artigo 112.3 da Lei 39/2015, do 1 de outubro, do procedemento administrativo común das administracións públicas, e dado que aproba unha disposición de carácter xeral, poderá interporse recurso contencioso-administrativo, ante a Sala do Contencioso-Administrativo do Tribunal Superior de Xustiza de Galicia con sede na Coruña, no prazo de dous meses, contado desde o día seguinte ao da recepción da presente notificación, de conformidade co artigo 46 da Lei 29/1998, do 13 de xullo, da xurisdición contencioso-administrativa. Todo iso sen prexuízo de que poida interpor Vd. calquera outro recurso que puidese estimar máis conveniente ao seu dereito.

San Cibrao das Viñas, 18 de xaneiro de 2018

Manuel Pedro Fernández Moreiras
Alcalde