Reunidos, no Concello de Sada, o 25 de xaneiro de 2018.

Dunha parte, Óscar Benito Portela Fernández, alcalde do Concello de Sada, en representación deste, consonte as competencias outorgadas polo artigo 21.1.j) da Lei 7/1985, do 2 de abril, reguladora das bases de réxime local.

Doutra parte, Antonio Muíño Temprano, maior de idade, con DNI núm. 32424561N; Mª Elena Muiño Temprano, maior de idade, con DNI núm. 76288036A e José Manuel Muíño Temprano, maior de idade, con DNI núm. 76336872X, actuando en nome propio, con enderezo para os efectos de notificacións, en Sada, rúa Linares Rivas, núm. 2, 15160, e teléfono 981 62 15 28, en calidade de propietarios dos terreos que se describen no expoñendo I.

Actúa como fedatario público o secretario do Concello de Sada, Emilio Seijo Frías,

Expoñen:

Primeiro. O obxecto do presente convenio é a obtención anticipada dos terreos destinados a viario no fronte da rúa Abegondo, pertencente ao municipio de Sada e incluídos no ámbito do APR-PERI-D3.6, do Plan xeral de ordenación municipal de Sada, aprobado definitiva e parcialmente pola Consellería de Medio Ambiente e Ordenación do Territorio o 11 de outubro de 2017, para os efectos de regularizar a dita rúa eliminando unha construción en situación de fóra de ordenación e permitindo continuar o tránsito peonil en condicións de seguridade coa execución dunha nova beirarrúa.

Os terreos afectados por este convenio contan coa referencia catastral 0499111NH6909N0001FO, e segundo a escritura outorgada o 8 de novembro de 1965, co núm. de protocolo 938, ante o notario Julián Marcos Alonso cítase o seguinte:

«B. Predio matriz resultante: ...

Terreo no sitio da Braña de cento corenta e sete metros e cincuenta decímetros cadrados. Linda: norte, parcela segregada; sur, camiño serventío que separa campón de herdeiros de Aguiar; leste, estrada de Sada ao Espírito Santo, e oeste, xunqueira de herdeiros de Manuel Aguiar, gabía no medio».

Segundo. A obtención dos ditos terreos supón o recoñecemento aos seus propietarios do aproveitamento urbanístico recoñecido no PXOM do Concello de Sada, cun coeficiente de edificabilidade de 0,50 m2/m2, cun aproveitamento tipo de 0,50 utc e referido á tipoloxía de vivenda plurifamiliar en bloque aberto, que se materializará no ámbito da área de planeamento remitido APR-PERI-D3.6.

Para os efectos de posibilitar a actuación sinalada, as partes aproban as seguintes

Cláusulas.

Primeira. Para realizar o obxecto deste convenio as partes asinantes comprométense ao seguinte:

O titular da propiedade: á inmediata cesión en propiedade ao Concello de Sada da parcela catastral referida, clasificada como solo urbano non consolidado e destinado a viario e zona verde e sen prexuízo da realización dun levantamento topográfico que acredite a realidade física da superficie que se pretende ocupar.

O Concello de Sada: a recoñecer o aproveitamento urbanístico de 0,50 m2 de uso característico residencial na APR-PERI-D3.6, correspondentes á superficie realmente existente consonte a medición que se realizará. En calquera caso, será obxecto de cesión o 10 % do aproveitamento urbanístico consonte as obrigas establecidas na Lei 2/2016 para os propietarios de solo urbano non consolidado.

Os gastos de demolición da dita construción preexistente, así como os de urbanización da superficie cedida e incluída na dita APR-PERI-D3.6, serán asumidos polo Concello de Sada e posteriormente repercutidos, coa actualización debida, como gastos de urbanización imputables ao dito ámbito e con cargo aos seus propietarios, de conformidade co réxime de repartición de cargas e beneficios para esta categoría de solo.

O convenio, en todo caso, estará suxeito aos límites establecidos na Lei 2/2016, do 10 de febreiro, e ao Decreto 143/2016, do 22 de setembro, polo que foi aprobado o regulamento da Lei do solo, e realízase consonte o previsto nos artigos 129.3.e) e 167 da LSG/2016 e no artigo 400 do dito regulamento da Lei do solo.

Segunda. Facúltanse expresamente os propietarios para inscribir o correspondente aproveitamento urbanístico resultante deste convenio, consonte o previsto nos artigos 33 e seguintes do Real decreto 1093/1997, do 4 de xullo, polo que foi aprobado o regulamento para inscrición no Rexistro da Propiedade dos actos de natureza urbanística, e consonte o previsto no artigo 403.3 do Regulamento da Lei do solo, unha vez que sexa asinado o texto definitivo do convenio no prazo máximo dos quince días seguintes ao da notificación da aprobación do texto definitivo, e quedará sen efecto de non subscribirse no dito prazo.

Terceira. O presente convenio de execución urbanística seguirá a tramitación prevista nos artigos 167 e 168 da LSG/2016 e dos artigos 401, 402 e 403 do regulamento da Lei do solo.

Sen prexuízo do anterior, a propiedade consente expresamente neste acto a ocupación polo Concello de Sada da dita parcela, con referencia catastral 0499111NH6909N0001FO, para a realización das correspondentes obras municipais.

Xúntanse como anexos a este convenio:

• Ficha de planeamento remitido (APR-PERI-D3.6) do PXOM de Sada.

• Consulta descritiva e gráfica catastral.

• Escritura pública acreditativa da titularidade dos terreos.

E, como proba de conformidade, asínase por triplicado en cada unha das súas follas, no lugar e data enriba sinalados.

Sada, 7 de febreiro de 2018

Óscar Benito Portela Fernández
Alcalde