O día 30 de outubro de 2017, a Vicepresidencia e Consellería de Presidencia, Administracións Públicas e Xustiza publicou a Orde conxunta do 27 de outubro de 2017 mediante a cal se establecen as bases reguladoras e a convocatoria de axudas previstas no Decreto 102/2017, do 19 de outubro, de medidas urxentes de axuda para a reparación de danos causados polos incendios que se produciron en Galicia durante o mes de outubro do ano 2017.
No seu artigo 21 establécese a convocatoria de axudas, en réxime de concorrencia non competitiva por rateo, por danos para a reposición de infraestruturas e equipamentos privados danados e por danos nas explotacións agrícolas e gandeiras afectadas polos incendios. Código de procedemento administrativo MR616A.
Na base décimo oitava do citado artigo 21 precísanse as aplicacións orzamentarias e o importe económico previsto para o financiamento das ditas axudas, tanto nas liñas de axuda forestais (liñas I, II e III) como nas liñas de axuda agrícola e gandeira (liñas IV, V, VI e VII).
Así mesmo, no artigo 4 da orde sinálase que as dotacións iniciais se poderán incrementar.
Dado que a dotación orzamentaria desa orde para as axudas correspondentes a danos nas explotacións agrícolas e gandeiras ascende á cantidade de 500.000 euros, para o ano 2018, e posto que esa dotación é insuficiente tendo en conta o importe das solicitudes recibidas, cómpre, mediante esta orde, ampliar a dotación orzamentaria para a concesión das mencionadas axudas.
En consecuencia, de conformidade co previsto no artigo 30.1.3 do Estatuto de autonomía de Galicia e no uso das facultades que me confire a Lei 9/2007, do 13 de xuño, de subvencións de Galicia, de acordo co disposto na Lei 1/1983, do 22 de febreiro, reguladora da Xunta e da súa Presidencia, e demais normativa concorrente,
DISPOÑO:
Artigo 1. Incremento de crédito
1. Ampliar a dotación orzamentaria asignada na Orde conxunta do 27 de outubro de 2017, mediante a cal se establecen as bases reguladoras e a convocatoria de axudas previstas polo Decreto 102/2017, do 19 de outubro, de medidas urxentes de axuda para a reparación de danos causados polos incendios que se produciron en Galicia durante o mes de outubro do ano 2017, nas liñas de axuda agrícola e gandeira (IV, V, VI e VII) da Consellería do Medio Rural en 600.000 euros, con cargo aos remanentes existentes noutras axudas desa orde.
Como resultado desta ampliación, o orzamento total asignado á presente orde é o seguinte:
• Ano 2018: 1.100.000 euros na aplicación orzamentaria 13.03.712B.772.0, C.P. 2016 183 (390.000) e C.P. 2016 00185 (710.000).
2. En todo caso, a concesión das axudas reguladas na dita orde estará limitada ás dispoñibilidades orzamentarias.
Artigo 2. Ausencia de efectos sobre o prazo de solicitudes
O incremento de crédito previsto no artigo 1 desta orde non afecta o prazo de presentación de solicitudes establecido na Orde do 27 de outubro de 2017 (DOG núm. 206, do 30 de outubro).
Artigo 3. Recursos
A presente orde, que pon fin á vía administrativa, poderá ser impugnada potestativamente en reposición no prazo dun mes desde a súa publicación, de conformidade co disposto no artigo 123 da Lei 39/2015, de 1 de outubro, do procedemento administrativo común das administracións públicas, ou ser impugnada directamente ante a Sala do Contencioso-Administrativo do Tribunal Superior de Xustiza de Galicia, no prazo de dous meses, segundo o disposto no artigo 46.1 da Lei 29/1998, do 13 de xullo, reguladora da xurisdición contencioso-administrativa, contados a partir do día seguinte ao da publicación desta orde.
Disposición derradeira
Esta orde terá efectos a partir do mesmo día da súa publicación no Diario Oficial de Galicia.
Santiago de Compostela, 21 de xuño de 2018
Ángeles Vázquez Mejuto
Conselleira do Medio Rural