1. Mediante a Resolución do 26 de decembro de 2017 desta dirección, referida no encabezamento, publicada no Diario Oficial de Galicia número 21, do 30 de xaneiro de 2018, acordouse a aprobación das bases reguladoras xunto coa convocatoria de subvencións, cuxo procedemento administrativo de concesión se tramitará en réxime de concorrencia competitiva, para proxectos de equipamentos que utilicen biomasa como combustible e outras instalacións de enerxías renovables que utilicen como fonte enerxética a xeotermia, a aerotermia e a solar térmica, executados en Galicia para a Administración local, entidades sen ánimo de lucro, comunidades de montes, empresas e autónomos.
2. Tal e como consta na parte expositiva da citada resolución, o financiamento desta convocatoria faise con cargo aos orzamentos do Instituto Enerxético de Galicia para o ano 2018. A procedencia dos fondos é de diversa natureza: fondos da Comunidade Autónoma e fondos comunitarios derivados do programa operativo Feder Galicia 2014-2020.
No transcurso do procedemento administrativo de concesión das axudas, cando xa rematou o prazo de presentación de solicitudes, constátase que nalgunha das epígrafes o número de solicitantes é inferior ao esperado, mentres que noutras o volume de axuda solicitada superou a dispoñibilidade orzamentaria, polo que cómpre facer unha redistribución de fondos entre as distintas epígrafes e minorar o crédito orzamentario.
O artigo 3 da resolución, relativo ao financiamento, prevé unha dotación inicial de 3.128.546,00 euros e no parágrafo segundo dese mesmo artigo establécese que o crédito máximo poderá ser redistribuído se nalgunha das epígrafes non se rexistran solicitudes suficientes para esgotar os fondos dispoñibles ou a calidade dos proxectos solicitados non alcanza a puntuación mínima exixida.
Por todo o anterior, coa finalidade de incrementar a eficacia administrativa e a eficiencia na asignación de recursos públicos, maximizando o impulso de proxectos de aforro e eficiencia enerxética,
RESOLVO:
Primeiro. Minorar a dotación de fondos inicialmente prevista para esta convocatoria na contía de 750.872,66 euros polo que o importe total asignado para estas axudas tras esta modificación ascende a 2.377.673,34 euros.
Segundo. Unha vez minorados os fondos, estes redistribúense do seguinte xeito:
Medida: fomento das actividades asociadas ao ciclo de aproveitamento de biomasa.
Distribución por líña de axuda |
Dotación orzamentaria inicial (€) |
Modificacións (€) |
Dotación orzamentaria final (€) |
Empresas e autónomos biomasa tipoloxía B (Feder) |
1.383.416 |
-756.629,12 |
626.786,88 |
Administración pública local biomasa (Feder) |
900.000 |
- 45.332,23 |
854.667,77 |
Entidades sen ánimo de lucro biomasa (Feder) |
100.000 |
51.088,69 |
151.088,69 |
Empresas e autónomos biomasa tipoloxía A (fondos propios) |
145.130 |
-73.278,19 |
71.851,81 |
Empresa e autónomos xeotérmica (fondos propios) |
300.000 |
- 51.704,07 |
248.295,93 |
Empresas e autónomos aerotermia e solar térmica (fondos propios) |
300.000 |
124.982,26 |
424.982,26 |
Total |
3.128.546 |
-750.872,66 |
2.377.673,34 |
Santiago de Compostela, 18 de xuño de 2018
Ángel Bernardo Tahoces
Director do Instituto Enerxético de Galicia