Mediante Resolución do 21 de decembro de 2017 publicouse o acordo do Consello de Dirección do Instituto Galego de Promoción Económica, que aprobou as bases reguladoras dos obradoiros e das axudas á dixitalización Industria 4.0, cofinanciadas polo Fondo Europeo de Desenvolvemento Rexional no marco do programa operativo Feder Galicia 2014-2020, e se procede á súa convocatoria en réxime de concorrencia competitiva (DOG núm. 245, do 28 de decembro).
No punto terceiro do resolvo establecíanse dous prazos para a presentación das solicitudes de axuda. O primeiro (liña IG240.1 axudas) comprendía desde o día seguinte ao da publicación da resolución da convocatoria no Diario Oficial de Galicia ata o 15.3.2018 e o segundo prazo (liña IG240.2 axudas) abriuse o 1.6.2018 e remata o 5.9.2018.
A publicación da resolución da primeira convocatoria está prevista para este mes de xullo. A publicación da concesión de axudas adoita xerar interese entre as empresas en xeral e fai que algunhas tomen a súa decisión de solicitar unha axuda á vista do resultado das convocatorias anteriores. O segundo prazo de solicitudes está previsto que remate o 5 de setembro, tan só tres días hábiles despois de rematado o período de vacacións na maior parte das empresas. Estas circunstancias unidas fan que o segundo prazo de solicitudes se presente, na práctica, como insuficiente, polo que consideramos que debe ampliarse o dito prazo a 12 días hábiles máis, é dicir, ata o 21 de setembro de 2018.
Por todo o anterior, de conformidade co disposto no artigo 32 da Lei 39/2015, do 1 de outubro, do procedemento administrativo común das administracións públicas, e dado que non se causan prexuízos a terceiros,
RESOLVO:
Primeiro. Ampliar ata o 21 de setembro de 2018 o prazo de presentación de solicitudes da liña IG240.2 (axudas), establecido no punto terceiro do resolvo da Resolución do 21 de decembro de 2017 pola que se publicou o acordo do Consello de Dirección do Instituto Galego de Promoción Económica que aprobou as bases reguladoras dos obradoiros e das axudas á dixitalización Industria 4.0, cofinanciadas polo Fondo Europeo de Desenvolvemento Rexional no marco do programa operativo Feder Galicia 2014-2020, e se procede á súa convocatoria en réxime de concorrencia competitiva.
Segundo. Esta resolución entrará en vigor o día seguinte ao da súa publicación no Diario Oficial de Galicia.
Santiago de Compostela, 9 de xullo de 2018
Juan Manuel Cividanes Roger
Director xeral do Instituto Galego de Promoción Económica