A Lei 5/2007, do 7 de maio, de emerxencias de Galicia, creou a Axencia Galega de Emerxencias configurándoa como unha entidade instrumental da Xunta de Galicia para o estudo e a execución da política autonómica en materia de protección civil e xestión de emerxencias, nos termos establecidos en dita lei.
Por Resolución do 5 de abril de 2011 ordenouse a publicación do Acordo do Consello da Xunta de Galicia do 17 de marzo de 2011 polo que se aproba o cadro de persoal da Axencia Galega de Emerxencias (DOG nº 72, do 12 de abril).
O artigo 14 do Decreto 223/2007, do 5 de decembro, polo que se aproba o Estatuto da Axencia Galega de Emerxencias dispón, ao respecto dos tipos de persoal da entidade, que estará constituido por:
a) Persoal contratado en réxime de dereito laboral pola Axencia Galega de Emerxencias.
b) Persoal laboral procedente da Dirección Xeral de Protección Civil en que a Axencia se subrogue na posición de empregadora.
c) Persoal funcionario da Dirección Xeral de Protección Civil que quede adscrito á Axencia, sen alteración da súa situación administrativa.
d) Calquera persoal funcionario ao servizo da Comunidade Autónoma de Galicia que se adscriba á Axencia a través dos sistemas de provisión de postos de traballo previstos na normativa vixente, sen alteración da súa situación administrativa.
No actual cadro de persoal, adscrito á Secretaría Xeral, figura o posto denominado Área de coordinación xurídico-administrativa e asuntos financeiros, co NRP 4020003, configurado para ser ocupado por titulado/a superior, laboral grupo I, coa categoría de xefatura de área, sinalándose como sistema de provisión o concurso-oposición.
Co obxectivo de acadar a maior eficacia e eficiencia no aparato administrativo da Axencia, a modificación proposta no cadro de persoal consiste en darlle unha nova configuración ao antedito posto de Xefatura de Área de coordinación xurídico-administrativa e asuntos financeiros, propóndose que se modifique o tipo de persoal, forma de provisión e relación laboral, pasando a recollerse no cadro a súa cobertura por persoal funcionario, atendendo ás funcións que ten atribuídas esta xefatura de área.
De conformidade co artigo 9.2.g) do Decreto 223/2007, do 5 de decembro, corresponde á Presidencia da Axencia Galega de Emerxencias propoñerlle ao Consello da Xunta de Galicia a aprobación da estrutura e cadro de persoal.
En consecuencia, por proposta da Presidencia da Axencia, previa obtención de informe conxunto favorable da Dirección Xeral de Planificación e Orzamentos e da Dirección Xeral da Función Pública, o Consello da Xunta de Galicia, na súa reunión do día 12 de xullo de 2018, adoptou o seguinte
ACORDO:
Primeiro. Aprobar a modificación do cadro de persoal da Axencia Galega de Emerxencias en que se refire á relación laboral e forma de provisión do posto de Área de coordinación xurídico-administrativa e asuntos financeiros.
Segundo. Ordenar a publicación da modificación do cadro de persoal no Diario Oficial de Galicia, para os efectos da entrada en vigor a partir do día seguinte ao da súa publicación.
Visto o Acordo adoptado polo Consello da Xunta de Galicia na súa reunión do día 12 de xullo de 2018, relativo á modificación do cadro de persoal da Axencia Galega de Emerxencias, coa finalidade de cumprir o dito acordo, dispoño que se publique no Diario Oficial de Galicia como anexo a esta resolución.
Santiago de Compostela, 16 de xullo de 2018
Alfonso Rueda Valenzuela
Presidente da Axencia Galega de Emerxencias