Dentro das actividades programadas para o ano 2018 e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, e o establecido nos artigos 38 e 39 do Decreto 243/2008, do 16 de outubro, polo que se desenvolve a Lei 4/2007, do 20 de abril, de coordinación de policías locais, anúnciase a convocatoria dun curso selectivo para o acceso á categoría de intendente da policía local, conforme as seguintes bases:

Obxectivos:

Actualizar na normativa vixente e de aplicación directa no traballo policial ao alumnado.

Desenvolver a súa capacidade de liderado, coñecendo os recursos dispoñibles para levar a cabo unha dirección de equipos eficaz e motivadora.

Aumento da capacidade de comunicación.

Destinatarios/as:

Persoal dos corpos de policía local que superaron o proceso selectivo para a categoría de intendente principal, e que non tivesen realizado este curso.

Inscrición:

A inscrición dos/as participantes será totalmente gratuíta.

Prazas:

Sen límite.

Solicitudes:

1. Os concellos deberán remitir un escrito á Academia Galega de Seguridade Pública, solicitando a participación no curso da/s persoa/s que se atopen nesta situación, para efectuar a correspondente reserva de praza para a realización do devandito curso.

2. O prazo para a remisión de escritos rematará o día 4 de outubro de 2018.

Duración e contido:

O curso ten unha duración de 200 horas. Unha vez feita a selección do alumnado, a Agasp comunicaralle ao alumnado a data de inicio do curso e o seu horario.

Conforme o establecido no artigo 38.4 e 39.3 do Decreto 243/2008, do 16 de outubro, polo que se desenvolve a Lei 4/2007, do 20 de abril, de coordinación de policías locais, a Academia homologará ao alumnado os cursos realizados cuxo programa, duración e contido o permitan.

O contido deste curso versará sobre habilidades de mando, estratexias directivas, comunicación externa e protocolo, xestión administrativa, ademais da presentación dun proxecto directivo.

A presentación do proxecto directivo, realizarase o día 10 de decembro de 2018, as 12.00 horas.

Certificado:

A Agasp emitirá un informe ao concello correspondente certificando esta circunstancia, de xeito que se poida proceder ao nomeamento como funcionario de carreira e á toma de posesión como intendente do corpo de policía local.

Modificacións:

A Academia Galega de Seguridade Pública poderá modificar o desenvolvemento normal do curso para adaptalo ás necesidades da Administración e ás continxencias que poidan xurdir.

A Estrada, 14 de setembro de 2018

Luis Menor Pérez
Director xeral da Academia Galega de Seguridade Pública