A Consellería de Política Social convocou en réxime de concorrencia competitiva para os anos 2018 e 2019, a través da Orde do 24 de agosto de 2018 (Diario Oficial de Galicia núm. 171, do 7 de setembro) as axudas para a posta en marcha de casas do maior.
O prazo e forma de presentación de solicitudes regúlase no artigo 10 da dita Orde do 24 de agosto de 2018 e no artigo 11 determínase a documentación que se deberá xuntar coa solicitude.
Unha vez revisadas as solicitudes presentadas ao abeiro da dita orde de convocatoria polo órgano encargado da instrución do procedemento, identificáronse aquelas que non reúnen a documentación necesaria, ben por non tela presentada, ben por conter erros, ou ben por non ser suficiente para a determinación do cumprimento dos requisitos exixidos. Segundo establece o artigo 13 da Orde do 24 de agosto de 2018 unha vez revisadas as solicitudes e feitas as emendas e solicitado informe da dirección xeral competente, aquelas que reuniron os requisitos foron remitidas á comisión de valoración, órgano creado no artigo 14 da Orde do 24 de agosto de 2018.
O órgano instrutor, á vista dos informes realizados pola comisión de valoración, formulou proposta de resolución, que se elevou ao órgano competente para resolver.
Por tratarse dun procedemento baixo o réxime da concorrencia competitiva e consonte o indicado no artigo 45 da Lei 39/2015, do 1 de outubro, do procedemento administrativo común das administracións públicas, tal e como sinala o artigo 17 da Orde do 24 de agosto de 2018, publicaranse no Diario Oficial de Galicia os actos administrativos deste procedemento. Esta publicación producirá os efectos de notificación.
Polo exposto,
RESOLVO:
Primeiro. Ordenar a publicación no Diario Oficial de Galicia do contido íntegro da Resolución do 31 de decembro de 2018, ditada no procedemento BS212A para a concesión de axudas destinadas á posta en marcha de casas do maior para os anos 2018 e 2019 ao abeiro da Orde do 24 de agosto de 2018 e que se xunta a esta resolución no anexo.
Segundo. Comunicar que a Resolución do 31 de decembro de 2018, que finaliza o procedemento, ponlle fin á vía administrativa e contra ela poderán interpoñerse recurso potestativo de reposición ante o mesmo órgano que ditou a resolución, no prazo dun mes contado a partir do día seguinte ao da súa publicación no Diario Oficial de Galicia ou directamente o recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contados desde o día seguinte ao da súa publicación no Diario Oficial de Galicia.
Santiago de Compostela, 29 de xaneiro de 2019
Ildefonso de la Campa Montenegro
Director xeral de Maiores e Persoas con Discapacidade
ANEXO
Resolución do 31 de decembro de 2018 de concesión das axudas previstas na Orde do 24 de agosto de 2018 pola que se regulan as bases que rexerán o procedemento de concesión de axudas para a posta en marcha de casas do maior e se convocan en réxime de concorrencia competitiva para os anos 2018 e 2019 (código de procedemento BS212A)
De acordo co establecido na Orde do 24 de agosto de 2018 pola que se regulan as bases que rexerán o procedemento de concesión de axudas para a posta en marcha de casas do maior e se convocan, en réxime de concorrencia competitiva, para os anos 2018 e 2019 (DOG núm. 171) e tendo en conta que:
Primeiro. As axudas teñen por obxecto a posta en marcha de experiencias piloto destinadas á atención de mulleres e homes maiores de 60 anos de idade, en situación de dependencia moderada e severa, grao I e grao II respectivamente, mediante o establecemento da casa do maior nos concellos de menos de 5.000 habitantes.
Segundo. Ás subvencións obxecto desta convocatoria destínase un orzamento total de 1.360.637 €, que se imputará ás aplicacións orzamentarias 12.04.312E.470.0 e 12.312E.770.0.
Serán subvencionables a reforma e adaptación da vivenda destinada a servir de casa do maior así como o seu equipamento e dotación material nos termos previstos no artigo 4 así como a prestación da atención individualizada dos maiores de 60 anos con dependencia graos I e II, nas condicións previstas no artigo 2 da Orde do 24 de agosto de 2018.
Terceiro. A avaliación das solicitudes, con base no establecido no artigo 14 da citada orde, efectuouna a comisión de valoración constituída para tal efecto e de acordo cos criterios de valoración recollidos no artigo 15, o día 19 de decembro de 2018. A comisión de valoración, tendo en conta o crédito orzamentario e os topes xerais establecidos nas bases, fixou un limiar mínimo de 7 puntos para a obtención das axudas.
Cuarto. Que á vista do expediente e do informe da comisión de valoración, o órgano instrutor elaborou a correspondente proposta de resolución con data 20 de decembro de 2018, na cal se recollen a orde de puntuación e o importe da axuda que corresponde a cada solicitude, e condicionan a súa concesión á emenda das deficiencias e/ou ao cumprimento de todos os requisitos recollidos no artigo 11.2 da orde, no prazo de dous meses desde a recepción da resolución de concesión, ampliable a tres para os supostos de constitución dunha cooperativa de traballo asociado.
De acordo co informe da comisión de valoración encargada da valoración das solicitudes para o outorgamento das axudas a que se refire a Orde do 24 de agosto de 2018 e a proposta presentada pola órgano instrutor do procedemento,
RESOLVE:
Primeiro. Acordar a concesión de axudas para a posta en marcha de casas do maior aos solicitantes que figuran no anexo I da presente resolución.
A percepción polo beneficiario do importe correspondente queda condicionado ao cumprimento dos seguintes requisitos:
– Emenda das deficiencias e/ou cumprimento dos requisitos recollidos no artigo 11.2 da orde, no prazo de dous meses desde a recepción da resolución de concesión, ampliable a tres para o suposto de constitución dunha cooperativa de traballo asociado, nos termos previstos no anexo I desta resolución.
– Cumprimento dos requisitos establecidos nas bases reguladoras e das obrigas das entidades beneficiarias establecidas no artigo 20 da Orde do 24 de agosto de 2018 e, en todo caso, as establecidas nos artigos 10 e 11 da Lei 9/2007, do 13 de xuño, de subvencións de Galicia.
Segundo. Non estimar os expedientes relacionados no anexo II polas causas que figuran nel.
Terceiro. Ordenar a publicación no Diario Oficial de Galicia desta resolución de conformidade co artigo 45 da Lei 39/2015, do 1 de outubro, do procedemento administrativo común das administracións públicas e no artigo 17 da Orde do 24 de agosto de 2018, pola que se aproban as bases que rexerán o procedemento de concesión de axudas para a posta en marcha de casas do maior e se convocan en réxime de concorrencia competitiva para os anos 2018 e 2019.
Contra esta resolución os interesados poderán interpoñer recurso potestativo de reposición no prazo dun mes contado a partir do día seguinte ao da recepción da notificación, ou ben interpoñer directamente recurso contencioso-administrativo no prazo de dous meses contados desde o día seguinte da notificación, perante do Tribunal Superior de Xustiza de Galicia.
Santiago de Compostela, 31 de decembro de 2018.
A conselleira de Política Social. P.D. (Artigo 16.1 da Orde do 24.8.2018; DOG núm. 171, do 7 de setembro). Ildefonso de la Campa Montenegro, director xeral de Maiores e Persoas con Discapacidade.