O artigo 28.2º da Constitución española recoñece o dereito á folga como dereito fundamental das persoas traballadoras en defensa dos seus intereses.
O exercicio deste dereito na Administración e nas empresas, entidades e institucións públicas ou privadas que presten servizos públicos ou de recoñecida e inaprazable necesidade no ámbito e competencias da Comunidade Autónoma de Galicia está condicionado ao mantemento dos servizos esenciais fixados no artigo 2 do Decreto 155/1988, do 9 de xuño, polo que ditan normas para garantir a prestación dos servizos esenciais no ámbito da Comunidade Autónoma. O artigo 3 deste decreto faculta as persoas titulares das consellerías competentes por razón dos servizos esenciais afectados para que, mediante orde e ante cada situación de folga, determinen o mínimo de actividade necesaria para asegurar o mantemento de tales servizos, así como para a fixación do persoal preciso para a súa prestación.
O sindicato F.E.CC.OO. comunicou a convocatoria de folga para o día 21 de maio, dirixida ao persoal docente e non docente dos centros de asistencia e educación infantil do primeiro ciclo (0-3) recollidos no ámbito funcional do XI Convenio colectivo de ámbito estatal de centros de asistencia e educación infantil.
A folga comunicada afecta todos os centros privados de asistencia e educación infantil, calquera que sexa a nacionalidade da entidade titular, así como aquelas empresas ou entidades privadas que xestionen centros de titularidade pública.
O exercicio do dereito de folga supera o plano das relacións entre empresa e traballadores/as para ingresar no campo do público cando a empregadora resulta ser a propia Administración pública ou se afectan os servizos esenciais respecto dos cales esta cumpre unha función de garantía. Neste sentido a atención educativa e asistencial dos nenos e nenas de 0-3 anos ten este carácter esencial para a comunidade.
O servizo esencial xustifícase pola exixencia constitucional de garantir o dereito da comunidade a non se ver privada de determinados bens ou servizos, que prevalece sobre o dereito fundamental de folga.
O seguimento desta folga, sen a determinación anticipada dunha prestación mínima, podería xerar un prexuízo tanto para os nenos e nenas usuarios como para as súas familias e para o persoal do centro que non a secunde.
En virtude do anterior, e de conformidade co disposto na Lei 1/1983, do 22 de febreiro, de normas reguladoras da Xunta e da súa Presidencia, e no Decreto 155/1988, do 9 de xuño, polo que se ditan as normas para garantir a prestación dos servizos esenciais en caso de folga no ámbito da Comunidade Autónoma,
ACORDO:
Artigo 1
A folga convocada polo Sindicato Federación Española de Comisións Obreiras (F.E.CC.OO.) para o día 21 de maio, das 00.00 horas ás 24.00 horas, nas escolas infantís 0-3 dependentes da Axencia Galega de Servizos Sociais (Agass) e mais do Consorcio Galego de Servizos Sociais con xestión externa entenderase condicionada á prestación dos servizos mínimos establecidos no artigo 2.
Artigo 2
Establécense como servizos mínimos durante o día de folga a que fai referencia o artigo anterior os seguintes: 1 traballador/a por centro na súa quenda habitual co fin de garantir a súa apertura e peche.
Artigo 3
O disposto nos artigos anteriores non significará ningún tipo de limitación dos dereitos que a normativa reguladora da folga lle recoñece ao persoal nesta situación, nin tampouco sobre a tramitación e efectos das peticións que a motiven.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 20 de maio de 2019
Fabiola García Martínez
Conselleira de Política Social