Mediante as ordes do 12 de abril de 2016 (Diario Oficial de Galicia número 85, do 4 de maio) convocáronse os procesos selectivos ordinario e extraordinario de consolidación para o ingreso no corpo facultativo superior de administración especial da Administración xeral da Comunidade Autónoma de Galicia, subgrupo A1, escala de ciencias, especialidade de química.
Os tribunais designados para cualificar os ditos procesos acordaron facer públicas e elevar á Dirección Xeral da Función Pública as relacións de aspirantes que os superaron, mediante resolucións do 25 de setembro de 2018 (DOG número 201, do 22 de outubro) no caso do proceso ordinario, e do 26 de febreiro de 2019 (DOG número 48, do 8 de marzo) no caso do proceso extraordinario de consolidación.
Unha vez acreditado o cumprimento dos requisitos exixidos na convocatoria por parte das persoas aspirantes, e co obxecto de que poidan ser nomeadas persoal funcionario de carreira, esta consellería
DISPÓN:
Primeiro. Convocar as persoas aspirantes que superaron os procesos selectivos ordinario e extraordinario de consolidación, pola orde que se relaciona no anexo I, ao acto de elección de destino provisional que terá lugar no salón de actos número 2 (pequeno) da Vicepresidencia e Consellería de Presidencia, Administracións Públicas e Xustiza (Edificio Administrativo San Caetano, s/n, Santiago de Compostela) o día 24 de xullo de 2019, ás 10.00 horas.
Segundo. As persoas aspirantes poderán elixir entre os postos que se relacionan no anexo II desta orde, sempre que reúnan os requisitos exixidos nel.
Os/as aspirantes que pretendan optar aos postos para cuxo desempeño é preciso estar en posesión dun doutoramento ou acreditar experiencia en investigación deberán presentar certificación acreditativa no acto de elección de destino. A dita certificación será expedida pola Secretaría Xeral Técnica da consellería na cal figure adscrita a dita praza.
Os/as aspirantes que figuran no anexo I correspondente ao proceso ordinario terán, en todo caso, preferencia sobre a aspirante do proceso extraordinario de consolidación.
Terceiro. As persoas aspirantes deberán ir provistas de DNI ou doutro documento que acredite fidedignamente a súa identidade; no caso de non comparecer persoalmente, poderán ser representadas por terceiras persoas con poder notarial suficiente.
Cuarto. Ás persoas aspirantes que non comparezan persoalmente ou por medio de representantes seranlles adxudicadas en destino provisional os postos que lles correspondan atendendo á orde de publicación destes e ao número obtido no proceso selectivo, unha vez concluído o proceso de adxudicación dos postos ás persoas aspirantes presentes ou representadas, entre os que quedasen sen adxudicar.
Quinto. As persoas aspirantes poderán solicitar ser declaradas en excedencia voluntaria por prestación de servizos no sector público ou por interese particular, reguladas, respectivamente, nos artigos 174 e 173.3.d) da Lei 2/2015, do 29 de abril, do emprego público de Galicia. Nestes supostos deberanse presentar ao chamamento cun certificado do/da responsable da súa unidade de persoal en que conste a condición con que prestan servizos na actualidade.
Sexto. Contra esta orde, que pon fin á vía administrativa, poderase presentar recurso potestativo de reposición, ante o conselleiro de Facenda, no prazo dun mes contado desde o día seguinte ao da publicación desta orde no Diario Oficial de Galicia, ou directamente recurso contencioso-administrativo, no prazo de dous meses contados desde esa mesma data, ante a Sala do Contencioso-Administrativo do Tribunal Superior de Xustiza de Galicia, conforme o disposto na Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 12 de xullo de 2019
Valeriano Martínez García
Conselleiro de Facenda
ANEXO I
Proceso ordinario.
Nº de orde |
DNI |
Apelidos e nome |
1 |
***5583** |
Vázquez Hernández, Manuel |
2 |
***1221** |
Ónega Folgueira, Marina |
Proceso extraordinario de consolidación.
Nº de orde |
DNI |
Apelidos e nome |
1 |
***7232** |
López Souto, María Dolores |