A planificación hidrolóxica ten como obxectivos xerais acadar o bo estado e a axeitada protección das augas das demarcacións hidrográficas, a satisfacción das demandas de auga, o equilibrio e a harmonización do desenvolvemento rexional e sectorial, incrementando as dispoñibilidades do recurso, protexendo a súa calidade, economizando o seu emprego e racionalizando os seus usos en harmonía co ambiente e cos demais recursos naturais.

O 22.1.2016 publicouse no Boletín Oficial del Estado o Real decreto 11/2016, do 8 de xaneiro, polo que se aproban os plans hidrolóxicos das demarcacións hidrográficas de Galicia-Costa, das bacías mediterráneas andaluzas, do Guadalete e Barbate e do Tinto, Odiel e Piedras.

De acordo co establecido no artigo 14 do Regulamento da planificación en materia de augas de Galicia, aprobado polo Decreto 1/2015, do 15 de xaneiro, polo que se aproba o Regulamento da planificación en materia de augas de Galicia e se regulan determinadas cuestións no desenvolvemento da Lei 9/2010, do 4 de novembro, de augas de Galicia, cada seis anos debe revisarse o plan hidrolóxico da demarcación hidrográfica.

O artigo 11.4 do regulamento citado prevé que na primeira etapa de elaboración e proposta de revisión do plan hidrolóxico se elabore un esquema de temas importantes en materia de xestión das augas na demarcación hidrográfica Galicia-Costa.

Segundo se establece no artigo 11.5 do regulamento citado, o esquema de temas importantes porase á disposición do público cunha antelación mínima de dous anos respecto ao inicio do período a que se refira o plan e polo prazo de seis meses para que se poidan formular observacións e suxestións.

De acordo co previsto no artigo 77.1 da Lei 9/2010, do 4 de novembro, de augas de Galicia, correspóndelle á entidade pública empresarial Augas de Galicia a competencia para formular e elaborar o plan hidrolóxico da demarcación hidrográfica Galicia-Costa, o que inclúe todas as etapas no seu procedemento de elaboración,

Consonte o exposto,

RESOLVO:

Someter a consulta pública durante un prazo de seis meses o Esquema provisional de temas importantes en materia de xestión das augas do terceiro ciclo de planificación hidrolóxica (período 2021-2027) da demarcación hidrográfica Galicia-Costa.

Para estes efectos, o citado documento poderase consultar desde o día seguinte ao da publicación deste anuncio no Diario Oficial de Galicia e polo período de seis meses nos seguintes puntos:

1. Na páxina web oficial de Augas de Galicia (actualmente, https://augasdegalicia.xunta.gal), na epígrafe de participación pública.

2. Nas seguintes oficinas de Augas de Galicia:

a) Servizos centrais: praza de Camilo Díaz Baliño, 7-9, 15781 Santiago de Compostela.

b) Servizo Territorial da Zona Hidrográfica Galicia-Norte: Edificio Administrativo da Xunta de Galicia en Monelos, rúa Vicente Ferrer, 2, 9º, 15008 A Coruña.

c) Servizo Territorial da Zona Hidrográfica Galicia-Centro: rúa Tomiño, 16, baixo, 15781 Santiago de Compostela.

d) Servizo Territorial da Zona Hidrográfica Galicia-Sur: rúa San Salvador, 2, 4º, 36201 Vigo.

Dentro do prazo establecido, poderanse realizar achegas e formular as observacións e suxestións que se consideren oportunas en calquera das formas previstas no artigo 16.4 da Lei 39/2015, do 1 de outubro, do procedemento administrativo común das administracións públicas.

Para o suposto de ser un suxeito obrigado a relacionarse a través de medios electrónicos coas administracións públicas ou de optar por este medio, as comunicacións deberán realizarse presentando o formulario do procedemento Presentación electrónica de solicitudes, escritos e comunicacións que non dispoñan dun sistema electrónico específico nin dun modelo electrónico normalizado, con código de procedemento PR004A, dispoñible na sede electrónica da Xunta de Galicia (https://sede.xunta.gal/detalle-procedemento?codtram=PR004A). Neste caso, deberá escollerse como destinatario final do formulario a Augas de Galicia.

Calquera dúbida sobre o proceso pode dirixirse ao correo electrónico augasdegalicia.dma@xunta.gal

Santiago de Compostela, 11 de xullo de 2019

Teresa María Gutiérrez López
Directora de Augas de Galicia