De conformidade co artigo 8 da Lei 19/2013, do 9 de decembro, de transparencia, acceso á información pública e bo goberno, dáse publicidade da seguinte encomenda coas seguintes características:
– Resolución do 2 de agosto de 2019, da Consellería do Mar, pola que se lle encarga ao medio propio Fundación Centro Tecnolóxico do Mar (Cetmar) a realización, mediante o sistema de administración, dun servizo de oficina técnica para o apoio ao deseño e a construción dunha embarcación patrulleira para o Servizo de Gardacostas de Galicia da Consellería do Mar.
– Actividade: realización das actuacións relativas á execución por parte do Centro Tecnolóxico do Mar-Fundación Cetmar de accións de apoio á Consellería do Mar, que teñen como finalidades últimas o seguimento no deseño e na construción dunha embarcación patrulleira de altura apta para tarefas de inspección e vixilancia pesqueira, control e apoio á frota pesqueira de Galicia. Esta embarcación patrulleira colaborará en operacións de procura e salvamento marítimo e participación en actividades de loita contra a contaminación mariña.
– Natureza e alcance da xestión encomendada: encomenda de xestión a medios propios ao ter a Fundación Centro Tecnolóxico do Mar (Cetmar) a consideración de medio propio instrumental e de servizo técnico da Administración xeral da Comunidade Autónoma de Galicia, en cumprimento do establecido nos artigos 10 e 47 e seguintes da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
– Prazo de vixencia: desde o 2 de agosto de 2019 ata o 30 de decembro de 2020.
– Financiamento: con cargo aos orzamentos da Comunidade Autónoma de Galicia para os anos 2019 e 2020, na aplicación orzamentaria 15.02.723A.640.1, código do proxecto 2016 00287.
Santiago de Compostela, 2 de setembro de 2019
Mª Isabel Concheiro Rodríguez-Segade
Secretaria xeral técnica da Consellería do Mar