O exercicio do dereito de folga queda condicionado ao mantemento dos servizos esenciais definidos no artigo 2 do Decreto 155/1988, do 9 de xuño (DOG do 20 de xuño).
O artigo 3 do devandito decreto faculta os conselleiros competentes, por razón dos servizos esenciais afectados, para que, mediante orde e ante cada situación de folga, determinen o mínimo de actividade necesaria para asegurar o mantemento de tales servizos, e o persoal preciso para prestalos.
A organización sindical Confederación Intersindical Galega (CIG), a organización sindical Comisións Obreiras (CC.OO.) e a organización sindical Unión Xeral de Traballadores (UGT) comunicaron a esta Administración a convocatoria dunha folga xeral no ámbito territorial do Concello das Pontes de García Rodríguez. A folga desenvolverase desde as 00.00 horas ás 24.00 horas do día 16 de outubro de 2019.
A necesaria conciliación entre o exercicio do dereito constitucional de folga e o mantemento dos servizos esenciais obriga á Administración autonómica, de acordo coa normativa vixente, a fixar uns servizos mínimos indispensables para o funcionamento dos servizos esenciais e para garantir o dereito ao traballo, que se concretan e xustifican na presente orde, no que respecta aos servizos prestados por esta consellería.
No ámbito da Consellería de Política Social, tómase en consideración para a determinación dos servizos mínimos a necesidade da presenza efectiva que garanta o funcionamento dos centros, así como a súa apertura. Estes servizos mínimos fixados no ámbito dos servizos sociais considéranse imprescindibles para garantir unha atención axeitada ás persoas residentes ou usuarias destes centros, máxime cando é necesario dar unha resposta inmediata ás diferentes situacións de emerxencia social.
De acordo coa normativa citada e cos argumentos expostos, e oído o comité de folga,
DISPOÑO:
Artigo 1. Centro de día As Pontes
Para o persoal que desempeña o seu traballo no centro de referencia terán a consideración de servizos mínimos os seguintes:
1 xerocultor/a na quenda de mañá.
1 xerocultor/a na quenda de tarde.
Artigo 2. Centro sociocomunitario As Pontes
En todo caso, quedará garantida a apertura e peche do centro mediante a designación dun/dunha traballador/a na súa quenda habitual.
Artigo 3. Garantía dos usuarios
Sen prexuízo do que establecen os artigos anteriores, deberanse observar as normas legais e regulamentarias vixentes en materia de garantías dos usuarios dos correspondentes centros.
Disposición derradeira
A presente orde entrará en vigor o mesmo día da súa publicación no Diario Oficial de Galicia.
Santiago de Compostela, 11 de outubro de 2019
Fabiola García Martínez
Conselleira de Política Social
