De conformidade co establecido nos artigos 524, número 1, e 526, número 2, da Lei orgánica 6/1985, do 1 de xullo, do poder xudicial; no artigo 56 e seguintes do Real decreto 1451/2005, do 7 de decembro, polo que se aproba o Regulamento de ingreso, provisión de postos de traballo e promoción profesional do persoal funcionario ao servizo da Administración de xustiza, e no Decreto da Xunta de Galicia 119/2005, do 6 de maio, polo que se crea o Instituto de Medicina Legal de Galicia (DOG do 18 de maio), anúnciase a provisión, polo sistema de libre designación, do posto de traballo cuxa descrición e requisitos necesarios para o seu desempeño se especifican no anexo I desta convocatoria, de acordo coas seguintes bases:
Primeira. Participantes
1. O posto de traballo que se convoca poderá ser solicitado por funcionarios de carreira pertencentes ao corpo de tramitación procesual e administrativa, calquera que sexa a súa situación administrativa, con excepción dos que se encontren nalgunha das situacións previstas no número 2, sempre que reúnan as condicións xerais exixidas e os requisitos determinados nesta convocatoria na data en que finalice o prazo de presentación de solicitudes e os manteñan ata a resolución do concurso.
2. Non poderán tomar parte nesta convocatoria: a) os declarados suspensos en firme, mentres dure a suspensión; b) os funcionarios que se encontren en situación de excedencia voluntaria por interese particular, durante o período mínimo obrigatorio de permanencia na dita situación; c) os sancionados con traslado forzoso, ata que transcorran un ou tres anos, se se trata dunha falta grave ou moi grave, respectivamente, para destino na mesma localidade na cal se lles impuxo a sanción.
Segunda. Presentación de solicitudes
Os interesados deberán presentar as súas solicitudes segundo o anexo II, cubertas cos datos que se piden nel, no prazo de dez días hábiles contados desde o seguinte ao da publicación desta convocatoria no Boletín Oficial del Estado.
As solicitudes irán dirixidas á Dirección Xeral de Xustiza da Vicepresidencia e Consellería de Presidencia, Administracións Públicas e Xustiza, rúa Madrid, 2-4, 2ª planta, polígono das Fontiñas, 15781 Santiago de Compostela, e deberanse presentar no Rexistro Xeral da Xunta de Galicia ou nas oficinas a que se refire o artigo 16.4 da Lei 39/2015, do 1 de outubro, do procedemento administrativo común das administracións públicas.
Terceira. Resolución e adxudicación de destino
A resolución desta convocatoria levarase a cabo mediante resolución da Dirección Xeral de Xustiza e o nomeamento efectuarase no prazo máximo de dous meses contados desde a finalización do prazo de presentación de solicitudes.
A persoa designada poderá ser cesada con carácter discrecional pola mesma autoridade que a nomeou.
Cuarta. Publicación da resolución
A resolución desta convocatoria publicarase no Boletín Oficial del Estado e poderase declarar deserta se se considera oportuno.
Quinta. Recursos
Contra esta resolución, que pon fin á vía administrativa, as persoas interesadas poderán interpor recurso potestativo de reposición, ante a Dirección Xeral de Xustiza, no prazo dun mes contado desde o día seguinte ao da súa publicación no Boletín Oficial del Estado, de conformidade co establecido na Lei 39/2015, do 1 de outubro, do procedemento administrativo común das administracións públicas, ou poderán impugnala directamente, ante o xulgado do contencioso-administrativo competente, no prazo de dous meses contados a partir da mesma data, segundo o establecido na Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 18 de outubro de 2019
Juan José Martín Álvarez
Director xeral de Xustiza
ANEXO I
Posto
Centro xestor: Dirección xeral de Xustiza.
Centro de destino: Instituto de Medicina Legal de Galicia (Imelga). Dirección. Santiago de Compostela (A Coruña).
Posto |
Tipo de posto |
Forma de provisión |
Corpo |
Complemento específico anual |
Código do posto: XG9251810015770701.05 Secretario/a de dirección |
Singularizado (S) |
Libre designación (LD) |
Tramitación procesual e administrativa |
6.703,68 € |