Visto o expediente para outorgamento de autorización administrativa previa e de construción da instalación eléctrica que a seguir se cita:

Solicitante: Setec Desarrollos, S.L.

Domicilio social: parque empresarial O Carballino, 22, 32500 O Carballiño.

Denominación: liña de media tensión soterrada de 20 kV e centro de seccionamento de compañía.

Situación: lugar de Morzós, San Román das Encrobas, 15187 Cerceda (A Coruña).

Características técnicas:

Liña de media tensión soterrada a 20 kV con inicio e fin na liña de distribución entre CT túnel Ave O Rego da Iña 100 e CT Cerceda estruturas metálicas 250 (expediente IN407A 2019/80), condutor RHZ1-2OL 12/20 kV 3×(1×240 mm2) Al, lonxitude total aproximada 12 m.

Centro de seccionamento en edificio prefabricado de formigón. Tres celas prefabricadas de seccionamento (telecontroladas as de saída de liña e de derivación) con interruptores-seccionadores (24 kV, 400 A, 16 kA) e unha cela de protección con transformador de tensión para alimentación de SSAA.

Cumpridos os trámites ordenados na Lei 24/2013, do 26 de decembro (BOE núm. 310), do sector eléctrico, e no título VII, capítulo II do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, na Lei 5/2017, do 19 de outubro, de fomento da implantación de iniciativas empresariais e de acordo coa Resolución do 19 de febreiro de 2014 da Dirección Xeral de Enerxía e Minas, pola que se aproba o procedemento de autorización administrativa de construción (DOG núm. 54), esta xefatura territorial resolve:

Conceder a autorización administrativa previa e a autorización administrativa de construción da devandita instalación, cuxas características se axustarán en todas as súas partes ás que figuran no seu proxecto e ás condicións técnicas e de seguridade establecidas nos regulamentos de aplicación.

O prazo de vixencia da autorización é dun ano, contado a partir do día seguinte ao da publicación desta resolución no Diario Oficial de Galicia.

A presente autorización entenderase outorgada, salvo o dereito de propiedade e sen prexuízo do terceiro, e non poderá ser invocada para excluír ou diminuír a responsabilidade civil ou penal na que puidese incorrer o beneficiario no exercicio da actividade ou na explotación da instalación autorizada.

Esta autorización outórgase sen prexuízo das concesións e autorizacións que sexan necesarias, de acordo con outras disposicións que resulten aplicables e, en especial, as relativas á ordenación do territorio e ao ambiente.

Contra o presente acordo, que non é definitivo en vía administrativa, cabe interpor recurso de alzada ante o conselleiro de Economía, Emprego e Industria no prazo dun mes contado a partir do día seguinte ao da súa notificación ou publicación nos termos establecidos nos artigos 112, 115, 121 e 122 da Lei 39/2015, do 1 de outubro, do procedemento administrativo común das administracións públicas; sen prexuízo de que os interesados poidan interpor calquera outro recurso que se considere pertinente.

A Coruña, 6 de novembro de 2019

Isidoro Martínez Arca
Xefe territorial da Coruña