Mediante a Resolución do 30 de decembro de 2014, encoméndase ao Consorcio Galego de Servizos de Igualdade e Benestar a xestión dun servizo de transporte regular aos centros públicos competencia da Consellería de Política Social, con vixencia ata o 31 de decembro de 2015, prorrogada por períodos anuais. Na actualidade, en virtude da Resolución do 30 de decembro de 2019, modifícase e prorrógase a mencionada encomenda polo prazo dun ano.
Coa finalidade de dar cumprimento ao disposto no artigo 8.4 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, publícase no Diario Oficial de Galicia o contido mínimo da dita resolución:
– Actividade: servizo consistente no deseño de rutas e traslado dos usuarios designados pola Consellería de Política Social aos seguintes centros públicos: Centro ocupacional O Saiar, Centro de día de Alzheimer de Volta do Castro, Centro de día As Gándaras, Centro de Atención a Persoas con Discapacidade de Redondela, Centro de Atención a Persoas con Discapacidade de Sarria, Centro de Atención a Persoas con Discapacidade da Coruña e Centro de día de Burela, para o desenvolvemento das actividades propias dos centros.
O servizo consistente na modalidade de carácter regular (dez desprazamentos por semana ida e volta, de luns a venres, que supoñen un total de 246 desprazamentos anuais) das persoas usuarias de servizos de atención diúrna aboarase en función do prezo por vehículo/día.
O servizo de carácter puntual (dous desprazamentos por semana, ida e volta na fin de semana) das persoas usuarias de servizos residenciais aboarase en función do prezo por servizo/día.
– Natureza e alcance da xestión encomendada: esta encomenda ao Consorcio Galego de Servizos da Igualdade e Benestar ten natureza intrasubxectiva, tendo en conta a adscrición do Consorcio Galego de Serivzos de Igualdade e Benestar á Consellería de Política Social por razón da materia. Consonte o previsto polos artigos 47 e 95 da Lei 16/2010, do 17 de decembro, de organización e funcionamento da Administración xeral e do sector público autonómico, e para os efectos previstos nos artigos 6.3 e 32 da Lei 9/2017, do 8 de novembro, de contratos do sector público, o Consorcio Galego de Servizos de Igualdade e Benestar ten a consideración de medio propio e servizo técnico da Consellería de Política Social.
– Prazo de vixencia: o período de execución comeza o 1 de xaneiro de 2020 e rematará o 31 de decembro de 2020.
– Modalidade de financiamento: esta encomenda finánciase con fondos propios.
Santiago de Compostela, 15 de xaneiro de 2020
A Conselleira de Política Social
P.D. (Orde do 3.3.2016; DOG núm. 54, do 18 de marzo)
María Francisca Gómez Santos
Secretaria xeral técnica da Consellería de Política Social